ចេញផ្សាយថ្ងៃអង្គារ ៤ កើត ខែមិគសិរ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ១១ ខែធ្នូ ឆ្នាំ ២០១៨
អត្តបទ : rachana.vong
រាជធានីភ្នំពេញ ៖ ឯកឧត្តម ឧត្ដមសេនីយ៍ទោ ទៀ សីហា ត្រូវបានព្រះមហាក្សត្រត្រាស់បង្គាប់តែងតាំងជាអភិបាលខេត្តសៀមរាប ជំនួសឯកឧត្តម ឃឹម ប៊ុនសុង ដែលត្រូវបាន ព្រះមហាក្សត្រត្រាស់ បង្គាប់ដំឡើង ឋានន្ដរស័ក្ដិ ថ្នាក់ នាយឧត្តមសេនីយ៍ និង តែងតាំងជា រដ្ឋលេខាធិការក្រសួងការពារជាតិ។
ការតែងតាំងឯកឧត្តម ឧត្ដមសេនីយ៍ទោ ទៀ សីហា ដែលជាយុវជនជំនាន់ថ្មីឲ្យដឹកនាំខេត្តសៀមរាប ទទួលបានការសាទរជាខ្លាំងពីប្រជាពលរដ្ឋដោយគេរំពឹងថា អ្នកដឹកនាំវ័យក្មេងរូបនេះ នឹងបញ្ចេញសមត្ថភាព ស្នាដៃរបស់ខ្លួនចូលរួមអភិវឌ្ឍន៍ខេត្តដ៏មាន សក្តានុពល ផ្នែកទេសចរណ៍ឲ្យ កាន់តែមាន ភាពលេច ធ្លោឡើង។
តើឯកឧត្តម ទៀ សីហា ជានរណា? មានជីវប្រវត្តិ ឬការសិក្សាដល់កម្រិតណាដែរ? ឯកឧត្តម ទៀ សីហា កើតនៅថ្ងៃទី៣១ ខែ សីហា ឆ្នាំ១៩៨០ នៅ រាជធានី ភ្នំពេញ ជាមន្ត្រីបម្រើការក្នុងកងយោធពលខេមរភូមិន្ទមានឋានន្ដរស័ក្ដិ ថ្នាក់ឧត្តម។ឯកឧត្តមជាកូនប្រុសទី២ របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួង ការពារជាតិ ។
សម្រាប់ការសិក្សាវិញកាលពីកុមារភាព ឯកឧត្តម ទៀ សីហា បានសិក្សានៅសាលាបឋមសិក្សាចតុមុខ ក្នុងខណ្ឌដូនពេញ រាជាធានីភ្នំពេញ។ លុះចូលដល់វ័យជំទង់ និងត្រូវចូលរៀនកម្រិតមធ្យមសិក្សា ឯកឧត្តម ទៀ សីហា ត្រូវបានឪពុកម្តាយបញ្ជូនឲ្យទៅសិក្សានៅសាលា Lycée Passy Saint-Honoré ប្រទេសបារាំង រហូតប្រឡងចូលមហាវិទ្យាល័យ នៅទីនោះ។
ក្នុងរយៈពេល១០ឆ្នាំ នៃការស្នាក់នៅ ដើម្បីបន្តការសិក្សានៅក្នុងប្រទេសបារាំង ឯកឧត្តម ទៀ សីហា បានបញ្ចប់បរិញ្ញាបត្រផ្នែកពាណិជ្ជកម្ម ពី មហាវិទ្យាល័យ Passy Saint-Honoré នាទី ក្រុងប៉ារីស ប្រទេសបារាំង នៅ ឆ្នាំ ២០០១។ នៅក្នុងដំណាក់កាលនោះ ឯកឧត្តម ទៀ សីហា បានចូលសិក្សារយៈពេលពេញមួយឆ្នាំនៅសាលា ទាហាន ឈ្មោះ École Spéciale Militaire de Saint-Cyr ដែលជារាជបណ្ឌិត្យសភាយោធារបស់ប្រទេសបារាំង។ក្រោយពេលបញ្ចប់ការសិក្សា ឯកឧត្តម ទៀ សីហា បានវិលត្រឡប់មកកាន់មាតុភូមិ វិញនាឆ្នាំ២០០១ រួចចូលបម្រើ ការជាមន្ត្រីកងរាជអាវុធ ហត្ថរាជធានីភ្នំពេញ។ ក្នុងពេលបំពេញការងារជាមន្ត្រីយោធានេះ ឯកឧត្តម បានឆ្លៀតពេលបង្កើនសមត្ថភាពផ្នែកគ្រប់គ្រង នៅរាជបណ្ឌិត្យសភារដ្ឋបាលជាន់ខ្ពស់នា ឆ្នាំ ២០០៧ – ២០០៨។
នៅឆ្នាំ២០១០-២០១៣ ស្របពេលវិវាទដីធ្លីកំពុងតែកើតឡើង រាជរដ្ឋាភិបាល បានបង្កើតក្រុមនិស្សិត ស្ម័គ្រចិត្ត វាស់វែងដីធ្លីនៅទូទាំងប្រទេស ដើម្បីផ្តល់ប័ណ្ណកម្មសិទ្ធិដល់ប្រជាពលរដ្ឋ។ ឯកឧត្តម ក៏ត្រូវបានចាត់តាំងជា ប្រធានក្រុមយុវជនស្ម័គ្រចិត្តខេត្តសៀមរាប ដែលនៅក្នុងដំណាក់កាលនោះ ឯកឧត្តម ត្រូវបាន តែងតាំង ជាប្រធាន សហភាពសហព័ន្ធយុវជន កម្ពុជាខេត្តសៀមរាបផងដរ។
ឯកឧត្តម ទៀ សីហា ជានាយទាហានជាន់ខ្ពស់ នៃកងយោធពលខេមរភូមិន្ទ អត្តលេខ០១៩៨៦៤ ទទួលបានការដំឡើង ឋានន្តរស័ក្តិ ថ្នាក់ឧត្តមសេនីយ៍ត្រី ដោយ ព្រះរាជក្រឹត្យ ចុះថ្ងៃទី១៣ ខែមេសា ឆ្នាំ២០១១ និងទទួលបានការដំឡើងឋានន្តរស័ក្តិ ថ្នាក់ ឧត្តមសេនីយ៍ទោ ដោយព្រះរាជក្រឹត្យចុះថ្ងៃទី០៤ ខែមេសា ឆ្នាំ២០១៤។
ឯកឧត្តម ទៀ សីហា ជាសមាជិកគណៈកម្មាធិការ កណ្តាលគណបក្ស ប្រជាជនកម្ពុជាក្រៅពីបំពេញការងារ ជានាយទាហានជាន់ខ្ពស់ នៃកងយោពលខេមរភូមិន្ទ និងការងារផ្នែកសង្គមនៅតាមបណ្ដាមូលដ្ឋាននានា ជាមួយក្រុមយុវជនរបស់សហភាពសហព័ន្ធយុវជនកម្ពុជា ឯកឧត្តម ទៀ សីហា តែងតែអមដំណើរក្នុងបំពេញបេសកកម្មនៅក្រៅប្រទេសរបស់សម្ដេចពិជ័យសេនា ទៀ បាញ់។ ឯកឧត្តម ទៀ សីហា ក៏មានតួនាទីជា សមាជិកអចិន្ត្រៃយ៍ នៃសហភាពសហព័ន្ធ យុវជនកម្ពុជា ដែលទើបនឹងបោះឆ្នោតផ្តល់ សេចក្តីទុកចិត្តក្នុង មហាសន្និបាតនៅថ្ងៃទី២៦ ខែវិច្ឆិកា ឆ្នាំ២០១៨ កន្លងទៅថ្មីៗនេះ៕
ដោយះ គេហទំព័រ ខ្មែរអច្ឆរិយ:
http:// www.khpress.net/
