ចេញផ្សាយថ្ងៃទី២១ ខែវិច្ឆិកាឆ្នាំ២០១៨
ខេត្តមណ្ឌលគិរី ៖ នៅក្នុងឱកាសព្រះរាជពិធីបុណ្យអុំទូក បណ្តែតប្រទីប អកអំបុកនិងសំពះព្រះខែ ដែលមានរយ:ពេល០៣ថ្ងៃ ដោយឡែកនៅថ្ងៃទី០១នៃពិធីបុណ្យនេះឃើញមានភ្ញៀវជាតិនិងភ្ញៀវអន្តរជាតិមកទស្សនាកំសាន្តជាលក្ខណ:គ្រួសារយ៉ាងច្រើនអនេក ក្រោយពីបានសម្រាកពីការងារដោយមានទឹកមុខសប្បាយរីករាយ ក្រោមបរិយាកាសធម្មជាតិពណ៌បៃតងដ៏សែនត្រជាត់។
នៅក្នុងឆ្នាំនេះឃើញថា មានភ្ញៀវចំនួនច្រើនជាងឆ្នាំមុនៗ ដោយសារនៅតាមផ្ទះសំណាក់និងសណ្ធាគារនីមួយៗក្នុងខេត្តពេញទាំងអស់មាន បងប្អូនខ្លះគ្មានកន្លែងសម្រាក ដេកក្នុងរថយន្តខ្លះទៀតបោះតង់នៅលើសួន ដុតភ្នក់ភ្លើងដើម្បីបំបាត់រងារ ។
ម្យាងវិញទៀត នៅតាមភោជនីយដ្ឋានក៏ឃើញមានភ្ញៀវចូលទៅពិសារបាយ យ៉ាងច្រើនតាន់តាប់រកកន្លែងអង្គុយគ្មាន ខ្លះទៀតទិញបាយម្ហូបយកមកក្រាលកន្ទេលហូបនៅលើសួន ជាលក្ខណ:គ្រួសារ រួចនាំគ្នាទៅកំសាន្តនៅតាម រមណីយដ្ធានផ្សេងៗរៀងៗខ្លួនយ៉ាងសប្បាយ។
នៅក្នុងពិធីនេះឃើញមានសមត្ថកិច្ចបានរៀបចំសណ្តាប់ធ្នាប់ចរាចរណ៍ សន្តិសុខ ជូនភ្ញៀវបានយ៉ាងល្អ គួរអោយកត់សម្គាល់ក្រោមការចង្អុលបង្ហាញពីរលោកស្នងការនគរបាលនិង លោកមេបញ្ជាការកងរាជអាវុធហត្ថ ដោយយកចិត្តទុកដាក់បំផុត នៅក្នុងថ្ងៃទី០១នៃបុណ្យជាតិនេះ ពំុមានឃើញបញ្ហាអ្វីកើតមានឡើយ ៕
(ដោយគេហទំព័រខ្មែរអច្ឆរិយ: http://www.khpress.net)