ចេញផ្សាយថ្ងៃទី០៨ខែវិច្ឆិកាឆ្នាំ២០១៨
ខេត្តសៀមរាប ៖ ក្រុងសៀមរាប
លោកស្រីឧកញ៉ា លី អ៊ុំអេង ដែលល្បីឈ្មោះខាងរឿងអាស្រូវដីធ្លីនៅក្នុងខេត្តសៀមរាប ត្រូវបានសមត្ថកិច្ចចាប់ខ្លួនកាលពីព្រឹកថ្ងៃទី០៨ខែវិច្ឆិកា ឆ្នាំ២០១៨នៅក្នុងស្នាក់ការលក់ដីឡូតិ៍របស់លោកស្រី ក្នុងតំបន់អង្គរឃ្យុងយុរ សង្កាត់ស្លរក្រាម ក្រុងសៀមរាប ពាក់ព័ន្ធនឹងការចេញមូលប្បទានបត្រ័គ្មានសាច់ប្រាក់ជាងបីលានដុល្លាអាមេរិក។
សមត្ថកិច្ចអាវុធហត្ថខេត្តសៀមរាបមួយរូបក្នុងលក្ខណ័សុំមិនបញ្ចេញឈ្មោះ បង្ហើបថា ការចាប់ខ្លួននេះគឺអនុវត្តតាមដីបង្គាប់អោយចាប់ខ្លួនដែលចេញដោយ លោក ងួន ណារ៉ា ចៅក្រមស៊ើបសួរ និងជាប្រធានសាលាដំបូងខេត្តសៀមរាប កាលពីថ្ងៃទី២៦ ខែតុលា ឆ្នាំ២០១៨ ក្រោមការចោទប្រកាន់មិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តនៅក្រុងសៀមរាប ខេត្តសៀមរាប កាលពីថ្ងៃទី២៥ ខែឧសភា ឆ្នាំ២០១៨។
ប្រភពបន្តទៀតថា មុនពេលចាប់ខ្លួនជំទាវឈ្មោះលី អ៊ុំអេង រូបនេះ បានគេចខ្លួនពីគេហដ្ឋានរបស់ខ្លួន ក្នុងបំណងមិនទទួលខុសត្រូវ។
សូមបញ្ជាក់ថាលោកស្រីឧកញ៉ា លី អ៊ុំអេង កាលពីកន្លងទៅធ្លាប់បានរំលោភដីពលរដ្ឋនៅតំបន់ឃ្យូងយូ ៩គ្រួសារ និងធ្លាប់រងបណ្តឹងច្រើនករណីពីអាជ្ញាធរជាតិអប្សរា ករណីក្លែងឯកសាររំលោភដីធ្លីរបស់រដ្ឋ ក្នុងតំបន់ឃ្យូងយូ នៃក្រុងសៀមរាប៕
(ដោយខ្មែរអច្ឆរិយៈ)