ចេញផ្សាយថ្ងៃទី០៨ខែវិច្ឆិកាឆ្នាំ២០១៨
ភ្នំពេញ ៖ នៅទីស្តីការក្រសួងបរិស្ថាន នាព្រឹកថ្ងៃព្រហស្បតិ៍ ១កើត ខែកក្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៨ ខែវិច្ឆិកា ឆ្នាំ២០១៨ លោក សុខ ខេងនរិន្ទ អគ្គនាយករង នៃក្រសួងបរិស្ថាន បានដឹកនាំកិច្ចប្រជុំអន្តរក្រសួងពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) លើគម្រោងអភិវឌ្ឍន៍កោះត្រេះ ដែលមានទីតាំងស្ថិតនៅក្នុងភូមិសាស្ត្រភូមិលេខ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។
ក្រុមហ៊ុន TWIN GOLDEN LION CO., LTD. (ម្ចាស់គម្រោង) ដែលសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ(ESIA) ដោយក្រុមហ៊ុនទីប្រឹក្សា RCBCC CO., Ltd.។ លោកប្រធានអង្គប្រជុំបានធ្វើការសរុបលទ្ធផលអង្គប្រជុំដូចខាងក្រោម៖
១. ជារួម អង្គប្រជុំគាំទ្រគម្រោងអភិវឌ្ឍន៍កោះត្រេះនេះ ដែលជាគម្រោងអភិវឌ្ឍន៍ដែលផ្តល់ផល ប្រយោជន៍ច្រើនដល់ប្រជាជនក្នុងខេត្តព្រះសីហនុ តែក្រុមហ៊ុនត្រូវរក្សាផ្ទៃដីបៃតងឱ្យបានយ៉ាងតិច ៧០% នៃផ្ទៃដីសរុបសម្រាប់អភិវឌ្ឍន៍។
២. ក្រុមហ៊ុនទីប្រឹក្សាត្រូវពិភាក្សាជាមួយក្រុមហ៊ុនម្ចាស់គម្រោងលើការជួលដីរយៈពេលវែងពី៩៩ឆ្នាំ មក៥០ឆ្នាំ ដោយដាក់ក្នុងរបាយការណ៍ឱ្យបានត្រឹមត្រូវ។
៣. ក្រុមហ៊ុនត្រូវធ្វើការផ្លាស់ប្ដូរទីតាំងអាងប្រព្រឹត្តិកម្មសំណល់រាវពីកន្លែងដែលមានជម្រាលខ្លាំងទៅ តំបន់២ ឬតំបន់៣ ដែលមានជម្រាលទាបវិញ ។
៤. ក្រុមហ៊ុនត្រូវធ្វើការគ្រប់គ្រងសំណល់សំណល់រឹង-រាវ និងប្រេងឱ្យបានត្រឹមត្រូវតាមលក្ខណៈ បច្ចេកទេស ដើម្បីកុំប៉ះពាល់ដល់គុណភាពទឹកសមុទ្រ និងសោភ័ណភាពនៅលើកោះ។
៥. ក្រុមហ៊ុនត្រូវអនុញ្ញាតឱ្យប្រជាពលរដ្ឋចូលចតទូកនេសាទនៅពេលមានភ្លៀង ឬព្យុះ ។
៦. សូមឱ្យរដ្ឋបាលខេត្តព្រះសីហនុជួយតាមដាននូវរាល់បញ្ហាទាំងអស់ដែលកើតឡើងនៅលើកោះត្រេះនេះ ជាពិសេសចំពោះការប៉ះពាល់ការនេសាទរបស់ប្រជាជននៅក្បែរទីតាំងគម្រោង។
៧. ម្ចាស់គម្រោងត្រូវធ្វើការកែសម្រួលរបាយការណ៍នេះតាមរាល់មតិយោបល់ទាំងអស់របស់ក្រុមការងារ នាយកដ្ឋានជំនាញ តំណាងអគ្គនាយដ្ឋាននៃក្រសួងបរិស្ថាន និងតំណាងក្រសួង-ស្ថាប័នជំនាញពាក់ព័ន្ធដែលផ្តល់យោបល់ក្នុងអង្គប្រជុំ រួមទាងបញ្ចូលទាំងមតិបូកសរុបរបស់ប្រធានអង្គប្រជុំផង ។
សូមបញ្ជាក់ថា កិច្ចប្រជុំនេះបានប្រព្រឹត្តទៅដោយមានការចូលរួមពីឯកឧត្តម លោកតំណាងអគ្គនាយកដ្ឋាន និងអគ្គលេខាធិការដ្ឋានពាក់ព័ន្ធ នៃក្រសួងបរិស្ថាន តំណាងក្រុមប្រឹក្សាអភិវឌ្ឍន៍កម្ពុជា តំណាងក្រសួងពាក់ព័ន្ធ រដ្ឋបាលខេត្តព្រះសីហនុ មន្ទីរបរិស្ថានខេត្តព្រះសីហនុ តំណាងនាយកដ្ឋានវាយតម្លៃហេតុប៉ះពាល់បរិស្ថាន តំណាងក្រុមហ៊ុនម្ចាស់គម្រោង និងតំណាងក្រុមហ៊ុនទីប្រឹក្សាផងដែរ ៕
(ដោយខ្មែរអច្ឆរិយៈkhmer wonders website)