ចេញផ្សាយថ្ងៃទី០៧ខែវិច្ឆិកាឆ្នាំ២០១៨
ភ្នំពេញ ៖ ទោះបីជាសេដ្ឋកិច្ចកម្ពុជានៅតែអាចបន្តមានស្ថានភាពល្អប្រសើរ ហើយរក្សាបាននូវចីរភាពនៃកំណើនយ៉ាងណាក្តី ក៏កម្ពុជាអាចប្រឈមនូវហានិភ័យមួយចំនួន ដែលបណ្តាលមកពីកត្តាខាងក្នុង និងកត្តាខាងក្រៅ ក្នុងនោះរួមមានបញ្ហាសេដ្ឋកិច្ចពិភពលោក ជម្លោះពាណិជ្ជកម្ម រវាងប្រទេសមហាអំណាច និងអស្ថិរភាពនៃទីផ្សារហិរញ្ញវត្ថុពិភពលោកជាដើម។
ក្នុងន័យនេះ សមាជិក សមាជិកា ព្រឹទ្ធសភា និងរដ្ឋសភា ត្រូវពិនិត្យ សិក្សា លើសេចក្តីព្រាងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៩នេះឱ្យបានហ្មត់ចត់ គ្រប់ជ្រុងជ្រោយ និងស៊ីជម្រៅ ជាពិសេសធ្វើឱ្យប្រាកដថាការវិភាជន៌ថវិកាពិតជាឆ្លើយតបទៅនឹងវិស័យជាអាទិភាពរបស់ជាតិ ដែលជាចលករនៃកំណើនសេដ្ឋកិច្ចរបស់កម្ពុជា និងត្រូវបង្កើនការតាមដាន និងត្រួតពិនិត្យលើការអនុវត្តច្បាប់ថវិកាឱ្យបានត្រឹមត្រូវនិងហ្មត់ចត់ ដើម្បីធានានូវប្រសិទ្ធភាពនៃការអនុវត្តច្បាប់។
នេះបើតាមការលើកឡើងរបស់ប្រធានរដ្ឋសភា សម្ដេចហេង សំរិន បានថ្លែងក្នុងឱកាសបើកសិក្ខាសាលាស្តីពីការឈ្វេងយល់អំពី «ការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់រៀបចំ សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រង ឆ្នាំ២០១៩» ដែលពិធីនេះបានប្រារព្ធធ្វើឡើង នៅព្រឹកថ្ងៃទី៦ ខែវិច្ឆិកា ឆ្នាំ២០១៨នៅវិមានរដ្ឋសភា។
ប្រធានរដ្ឋសភា បានបន្ថែមទៀតថា ការជួបជុំគ្នានៅពេលនេះក៏ជាឱកាសដ៏ល្អមួយសម្រាប់ស្ថាប័ននីតិប្បញ្ញត្តិ នីតិប្រតិបត្តិ អាជ្ញាធរសវនកម្ម ដៃគូអភិវឌ្ឍន៍ ព្រមទាំងអង្គការជាតិ និងអន្តរជាតិ បានមើលឃើញ និងយល់ច្បាស់ពីកិច្ចខិតខំប្រឹងប្រែង និងការប្តេជ្ញាចិត្តដ៏មោះមុត របស់រាជរដ្ឋាភិបាល ក្នុងការអនុវត្តកម្មវិធីកំណែទម្រង់ហិរញ្ញវត្ថុ សាធារណៈបន្ថែមលើការងារកំណែទម្រង់ផ្សេងៗជាច្រើនទៀត ទៅតាមដំណាក់កាលនីមួយៗ ប្រកបដោយភាពហ្មត់ចត់ ប្រុងប្រយ័ត្ន គ្រប់ជ្រុងជ្រោយ និងមានការចូលរួមពីគ្រប់ភាគីពាក់ព័ន្ធ។
ក្នុងនាមស្ថាប័ននីតិប្បញ្ញត្តិ លោក ហេង សំរិន បានអបអរសាទរចំពោះសមិទ្ធផលនានា ដែលរាជរដ្ឋាភិបាល សម្រេចបានក្នុងការអនុវត្តយុទ្ធសាស្ត្រចតុកោណដំណាក់កាលទី៣ នៅក្នុងនីតិកាលទី៥ នៃរដ្ឋសភាកន្លងមក ដោយរក្សាបាននូវសុខសន្តិភាពស្ថេរភាពនយោបាយ និងការឯកភាពជាតិ សម្រេចបាននូវសូចនាករសង្គមសំខាន់ៗ ជាអាទិ៍ វិស័យអប់រំ សុខាភិបាល ការគ្រប់គ្រងហិរញ្ញវត្ថុសាធារណៈ សេដ្ឋកិច្ចមានកំណើនខ្ពស់ជាមធ្យមក្នុងរង្វង់ ៧% ភាពក្រីក្ររបស់ប្រជាពលរដ្ឋត្រូវបានកាត់បន្ថយមកនៅត្រឹមក្រោម ១០% ដែលជាមធ្យម ជាង ១% ក្នុងមួយឆ្នាំ និងប្រែក្លាយប្រទេសកម្ពុជាពីប្រទេសក្រីក្រ មានចំណូលទាប ទៅជាប្រទេសមានចំណូលមធ្យមកម្រិតទាប និងឈានទៅកា្លយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ខាងមុខ ៕
(ដោយខ្មែរអច្ឆរិយ:khmer wonders website)