លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ បានលើកឡើងថា គ្រប់ពេលវេលាអង្គការសហប្រជាជាតិ និងប្រទេសកម្ពុជា តែងតែធ្វើការ ជាមួយគ្នាជានិច្ចទោះស្ថិតនៅក្នុងកាលៈទេសៈណាក៏ដោយ គឺកម្ពុជាតែងតែគាំទ្រនូវការសំណូមពរជានិច្ច ទៅតាមសមត្ថភាពរបស់ខ្លួនមាន។ លោកបានលើកឡើងដូចនេះ នៅថ្ងៃទី៥ ខែវិច្ឆិកា ឆ្នាំ២០១៨នេះ ក្នុងពិធីទទួលកងកម្លាំងរក្សាសន្តិភាពកម្ពុជា ចំនួន២៨៩នាក់ ដែលធ្វើមាតុភូមិនិវត្តន៍មកកាន់ប្រទេសកម្ពុជាវិញ បន្ទាប់ពីបញ្ចប់បេសកកម្ម របស់អង្គការសហប្រជាជាតិ (UN) នៅប្រទេសអាហ្វ្រិកកណ្តាល និងស៊ូដង់ខាងត្បូង នៅមូលដ្ឋានទ័ពអាកាសពោធិ៍ចិនតុង រាជធានីភ្នំពេញ។
លោក ទៀ បាញ់ បានបន្តថា មិនតែប៉ុណ្ណោះអង្គការសហប្រជាតិ និងកម្ពុជា តែងតែគិតគូររៀបចំកម្លាំងរបស់ខ្លួនដើម្បីចេញទៅចូលរួមប្រតិបត្តិការរក្សាសន្តិភាពនៅតាមបណ្តាប្រទេសមួយចំនួនក្នុងទ្វីបអាហ្វ្រិច និងតំបន់មជ្ឈឹមបូព៌ាផងដែរ។ លោកបានបន្ថែមថា បន្ទាប់ពីកម្ពុជាទទួលបានសុខសន្តិភាព ស្ថិរភាពនយោបាយពេញលេញនៅក្នុងប្រទេស រាជរដ្ឋាភិបាលបានចូលរួមចំណែកមួយចំនួនដោយបានបញ្ជូនកម្លាំងរបស់ខ្លួនឱ្យចូលរួមប្រតិបត្តិការរក្សាសន្តិភាពនៅតាមបណ្តាប្រទេសនានាដែលជួបនូវបញ្ហាសង្គ្រាមដូចកម្ពុជាពីអតីតកាលហើយកម្ពុជានឹងខំធ្វើយ៉ាងណាដើម្បីប្រទេសទាំងនោះឆាប់ទទួលបានសុខសន្តិភាពតាមអ្វីដែលកម្ពុជាអាចធ្វើទៅបាន៕
(ដោយខ្មែរអច្ឆរិយ:)
