ចេញផ្សាយថ្ងៃទី០៤ខែវិច្ឆិកាឆ្នាំ២០១៨
ភ្នំពេញ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍ដោយចីរភាព ក្នុងឱកាសអញ្ជើញបើកកិច្ចប្រជុំពិភាក្សាស្តីពីហិរញ្ញវត្ថុប្រកបដោយចីរភាព នាថ្ងៃទី០២ ខែវិច្ឆិកា ឆ្នាំ២០១៨ នៅរាជធានីភ្នំពេញ បានលើកឡើងថា ក្រសួងបរិស្ថាន បាននិងកំពុងខិតខំជំរុញដល់គម្រោងបៃតងឱ្យកាន់តែច្រើនទាំងគម្រោងវិនិយោគ ដែលយកចិត្តទុកដាក់ចំពោះប្រសិទ្ធភាពថាមពល ទាំងគម្រោងវិនិយោគក្នុងវិស័យថាមពលកកើតឡើងវិញ ដូចជាអគ្គិសនីដើរដោយថាមពលព្រះអាទិត្យ ឬខ្យល់ សំដៅចូលរួមជំរុញបន្ថែមទៀតនូវល្បឿននៃកំណើនសេដ្ឋកិច្ច និងការអភិវឌ្ឍដោយចីរភាព ដោយកាត់បន្ថយការបញ្ចេញកាបូននៅកម្រិតទាប។
ជាមួយគ្នានេះ ឯកឧត្តម សាយ សំអាល់ លើកទឹកចិត្តឱ្យមានការចូលរួមគាំទ្រហិរញ្ញប្បទានពីគ្រឹះស្ថានហិរញ្ញវត្ថុ ចំពោះផលប្រយោជន៍រយៈពេលវែង នៃគម្រោងវិនិយោគដោយចីរភាព និងសម្រួលបែបបទនីតិវីធីឥណទាន ងាយស្រួលសម្រាប់គាំទ្រដល់គម្រោង។ ដោយឡែក គ្រឹះស្ថានហិរញ្ញវត្ថុឯកជន ជាតួអង្គមួយសំខាន់នៅក្នុងប្រព័ន្ធអេកូឡូស៊ីហិរញ្ញវត្ថុ ដែលជាតួនាទីស្នូលក្នុងការអនុវត្តដោយផ្ទាល់ នូវគោលនយោបាយហិរញ្ញវត្ថុដោយចីរភាព។
ឯកឧត្តមរដ្ឋមន្ត្រី បានបញ្ជាក់បន្ថែមថា រាជរដ្ឋាភិបាល នីតិកាលទី៦ នៃរដ្ឋសភា បានដាក់ចេញ «យុទ្ធសាស្ត្រចតុកោណដំណាក់កាលទី៤» ផ្តោតការយកចិត្តទុកដាក់កាន់តែខ្លាំងឡើងទៅលើការសម្របខ្លួនរបស់កម្ពុជាចំពោះការប្រែប្រួលអាកាសធាតុ និងការអភិវឌ្ឍដោយចីរភាព បន្ថែមលើកិច្ចខិតខំប្រឹងប្រែង និងសមិទ្ធិផលផ្នែកសេដ្ឋកិច្ច សង្គម ជាច្រើន ដែលសម្រេចបានក្នុងនីតិកាលមុនៗ ជាក់ស្តែងកញ្ចប់ថវិកាជាតិ ដែលត្រូវបានវិភាជន៍សម្រាប់ការចំណាយលើការឆ្លើយតបនឹងការប្រែប្រួលអាកាសធាតុ មានការកើនឡើងជាង៣ដង នៅរយៈពេល៨ឆ្នាំចុងក្រោយនេះ។
ឯកឧត្តម បានលើកឡើងដែរថា រាជរដ្ឋាភិបាលកម្ពុជា នៅតែបន្តសកម្មភាពជាអាទិភាពរក្សាឱ្យបាននូវសន្តិភាព ស្ថេរភាពនយោបាយ និងស្ថេរភាពម៉ាក្រូសេដ្ឋកិច្ច ព្រមទាំងកំណើនវិនិយោគផ្នែកហេដ្ឋារចនាសម្ព័ន្ធបៃតង និងភាពធន់នឹងការប្រែប្រួលអាកាសធាតុផងដែរ ដែលជាមូលដ្ឋាននៃកំណើតសេដ្ឋកិច្ច និងការអភិវឌ្ឍដោយគុណភាព និងដោយចីរភាព។
សូមបញ្ជាក់ថា ក្រសួងបរិស្ថាន ក្នុងនោះមានក្រុមប្រឹក្សាជាតិអភិវឌ្ឍន៍ដោយចីរភាព ជាសេនាធិការក្នុងការផ្តល់កិច្ចសហការជាមួយក្រសួង ស្ថាប័ន វិស័យឯកជន និងដៃគូរអភិវឌ្ឍន៍ ដើម្បីកម្ពុជាមានការអភិវឌ្ឍដោយចីរភាព ហើយចូលរួមឆ្លើយតបនឹង ការប្រែប្រួលធាតុអាកាស និងគាំពារដល់ភពផែនដីយើង។
កិច្ចប្រជុំពិភាក្សាស្តីពីហិរញ្ញវត្ថុប្រកបដោយចីរភាព បានដំណើការដោយមានការចូលរួមពី លោក វ៉ាន់ ឆារស៍ ប្រធានស្តីទីនៃសមាគមធានាគារនៅកម្ពុជា លោក Kyle Kelhofer នាយកប្រចាំប្រទេស កម្ពុជា វៀតណាម ឡាវ នៃសាជីវកម្មហិរញ្ញវត្ថុអន្តរ (IFC) ព្រមទាំងមានថ្នាក់ដឹកនាំ តំណាងសហគ្រាសសាធារណៈ និងឯកជនជាច្រើនចូលរួម។
(ដោយខ្មែរអច្ឆរិយ:)