មណ្ឌលគិរី ៖ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានអញ្ជើញជាអធិបតីភាព ក្នុងពិធីបើកបវេសន កាលថ្មីឆ្នាំសិក្សា២០១៨-២០១៩ នៅវិទ្យាល័យ ហ៊ុន សែន មណ្ឌលគិរី ដោយមានការអញ្ជើញចូលរួមពីគ្រប់មន្ទីរ អង្គភាពជុំវិញខេត្ត អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ ។ ប្រព្រឹត្តទៅ នាព្រឹកថ្ងៃ ៨រោច ខែអស្សុជ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី០១ ខែវិច្ឆិកា ឆ្នាំ២០១៨ ។
នាឱកាសនោះដែរ ឯកឧត្តម ស្វាយ សំអ៊ាង អភិបាលខេត្ត បានអានសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងថ្ងៃបើកបវេសនកាលថ្មីនេះ ។ បន្ទាប់មក ឯកឧត្តម មានប្រសាសន៍ថា ថ្ងៃបើកបវេសនកាលឆ្នាំសិក្សាថ្មី ២០១៨-២០១៩នេះ គឺជាថ្ងៃដែលមានអត្ថន័យដ៏ជ្រាលជ្រៅមួយ សម្រាប់វិស័យអប់រំ និងជាថ្ងៃបើកទំព័រឆ្នាំសិក្សាថ្មី សម្រាប់ក្មួយៗសិស្សានុសិស្សក្នុងវ័យសិក្សា ដែលជាកុលបុត្រ កុលធីតា ជាទីស្រឡាញ់របស់យើងគ្រប់គ្នា ដើម្បីចូលរៀនថ្មី ឬ បន្តការសិក្សាពីថ្នាក់ដំបូងសម្រាប់កុមារ រហូតទៅថ្នាក់ខ្ពស់ៗបន្តទៀត ។
ឯកឧត្តម បានមានប្រសាសន៍បន្តថា ទិវាដ៏មានសារៈសំខាន់នេះ ត្រូវបានប្រារព្ធធ្វើឡើង ក្នុងបុព្វហេតុ លើកតម្កើងវប្បធម៌ស្រឡាញ់ការសិក្សារៀនសូត្រ ជាការរំលឹកដាស់តឿន កូនខ្មែរគ្រប់រូប ដែលជាទំពាំងស្នងឬស្សី ដើម្បីបន្តវេនអភិវឌ្ឍន៍ប្រទេសជាតិ ។
ឯកឧត្តម ក៏បានអំពាវនាវដល់ មាតាបិតា អាណាព្យាបាល និងអាជ្ញាធរពាក់ពន្ធទាំងអស់ ត្រូវចូលរួមជម្រុញដល់កូនៗក្មួយៗ ដែលមានអាយុត្រូវចូលរៀន ឲ្យមកចូលរៀនអោយបានគ្រប់ៗគ្នា ព្រមទាំងផ្តាំផ្ញើដល់សិស្សានុសិស្សទាំងអស់ ត្រូវតែខិតខំរៀនសូត្រ ចេះរៀបចំកម្មវិធីសិក្សាអោយបានច្បាស់លាស់ទើបធ្វើអោយការសិក្សារបស់យើងទទួលបានជោគជ័យ និងត្រូវចេះស្តាប់បង្គាប់ មាតា បិតា លោកគ្រូ អ្នកគ្រូ ជាពិសេសត្រូវចៀសឲ្យឆ្ងាយពីគ្រឿងញៀន បងតូចបងធំ ក្មេងទំនើង អំពើអបាយមុខផ្សេងៗដែលខុសច្បាប់ និងសង្គមស្អប់ខ្ពើម និងត្រូវចូលគោរពច្បាប់ចរាចរណ៍អោយបានគ្រប់ៗគ្នា ។
ទន្ទឹមនឹងនោះដែរ ឯកឧត្តម ក៏បានថ្លែងអំណរគុណយ៉ាងជ្រាលជ្រៅ ដល់សមាគមន៍គ្រូបង្រៀន និង អ្នកដែលបានផ្តល់ការឧបត្ថមគាំទ្រដល់វិស័យអប់រំក្នុងខេត្ត ដែលធ្វើឲ្យការអប់រំរបស់យើងទទួលបានការរីកចំរើនដូចសព្វថ្ងៃនេះ ។
លោក ទឹម សង្វាត ប្រធានមន្ទីរអប់រំយុវជន និងកីឡាខេត្ត បានឲ្យដឹងដែរថា នៅក្នុងដំណាច់ឆ្នាំសិក្សា ២០១៧-២០១៨ សិស្សបឋមសិក្សា មានចំនួន ១៣.៦៥៤នាក់ បើធៀបនឹងដើមឆ្នាំ មានការថយចុះ ៥២២នាក់ សិស្សវិទ្យាល័យ ពីថ្នាក់ទី៧ ដល់ទី១២ មានចំនួន ២.៧៥៧នាក់ បើធៀបនឹងដើមឆ្នាំ ថយចុះ១៧៣នាក់ ។ ចំពោះលទ្ធផលសិស្សប្រលងជាប់សញ្ញាប័ត្រមធ្យមសិក្សាទុតិយភូមិ មានចំនួន៣៨០នាក់ ។
លោកបានបន្ថែមថា ចំពោះសិស្សរៀនពូកែដែលត្រូវចែករង្វាន់លើកទឹកចិត្តនាពេលនេះ រួមមាន ចំណាត់ថ្នាក់លេខ១ ដល់លេខ៥ ចាប់ពីថ្នាក់ទី៧ ដល់ទី១២ មានចំនួន ១២០នាក់ ដោយក្នុងម្នាក់ៗទទួលបាន ប៊ិច សៀវភៅ បន្ទាត់ កាបូប និងថវិការមួយចំនួនទៀតផងដែរ ៕
( ដោយខ្មែរអច្ឆរិយ:)
