ចេញផ្សាយថ្ងៃទី២៦ខែតុលាឆ្នាំ២០១៨
ខេត្តព្រៃវែង៖ លោក បូរ ប៊ុនថន (ហៅ ចាន់ ថន) ចាងហ្វាងគេហទំព័រ ដើមរាំង បានដាក់ពាក្យប្ដឹង លោក ឧកញ៉ា ជឹម សុខ ម្ចាស់ក្រុមហ៊ុន (សុខសារិទ្ធមានជ័យ) ដែលជាឈ្មួញដ៏ល្បីឈ្មោះខាងនាំចេញសត្វគោក្របីទៅប្រទេសវៀតណាម និងមានទីលំនៅ ភូមិសឹង្ហ ឃុំកំពង់សឹង ស្រុកព្រះស្ដេច ខេត្តព្រៃវែង ទៅស្នងការខេត្តព្រៃវែង នៅរសៀលថ្ងៃទី២៥ ខែតុលា ឆ្នាំ២០១៨ ពីបទ ជេរប្រមាថ និងបរិហារកេរ្តិ៍ ដោយទាមទារសំណង ២០លានរៀល និងស្នើដល់សមត្ថកិច្ចចាត់ការតាមនីតិវិធី។
ជាមួយគ្នានោះដែរលោក ចាន់ ថន បានឲ្យដឹងថា ដើមចមដំបូងលោកបានសរសេរ ព័ត៌មានផ្សាយតាមវិជ្ជាជីវៈ នៅលើទំព័រវេបសាយ “dermrang” កាលពីល្ងាចថ្ងៃទី១៩ ខែតុលា ដែលមានចំណងជើងថា (អាជីវកម្មធ្វើស្រែលើខ្នងរាស្ត្ររបស់លោកឧញ៉ា ជឹម សុខ កំពុងទទួលបានជោគជ័យខ្លាំង) ក្នុងខ្លឹមសារនៃអត្ថបទ បានលើកឡើងអំពីការ នាំចេញសត្វគោ ក្របី ទៅប្រទេសវៀតណាម យ៉ាងច្រើនក្នុងមួយៗ និងបានរៀបរាប់ពីចំនួនលុយដែលឈ្មួញចង់ឲ្យឧកញ៉ា ជឹម សុខ ចាប់ពី៦០,០០០រៀល ទៅ១២៥,០០០រៀលសម្រាប់គោ១ក្បាល។
នៅផ្នែកខាងក្រោមនៃអត្ថបទ លោកបានទាក់ទងធ្វើបទសម្ភាសន៍ ជាមួយមន្ត្រីពាក់ព័ន្ធនិងសាម៉ីខ្លួន ប៉ុន្តែមន្ត្រីទាំងនោះបដិសេធមិនបំភ្លឺ។
លោកបន្តថា ក្រោយពេលផ្សាយបានប្រហែលកន្លះម៉ោង ស្រាប់តែលោកឧកញ៉ា ជឹម សុខ ខលទូរស័ព្ទ មកគំរាមលោកតែម្ដង ដោយប្រើពាក្យប្រមាថមើលងាយ បរិហារកេរ្តិ៍ ពួកកាសែតថោកទាប ដើរភ្លីភ្លើៗគ្មានដឹងខ្យល់អី គ្មានដឹងល្ហើយអី ក៏ថោកទាបម្លេះ ពួកលោកឯងកើតមកមានក្បាលមានខ្លួនអីទេ? ហេតុអីថោកទាបម្លេះ អាពួកសារព័ត៌មាន មុខក្រាស់ ថោកទាបដើរញុះញង់គេ។
ប្រភពដដែលបញ្ជាក់ថា លោកផ្សាយព័ត៌មានទៅតាមប្រភពដែលទទួលបាន ហើយបើសិនខុសឬត្រូវយ៉ាងណា នោះលោកឧញ៉ា ជឹម សុខ អាចស្នើឲ្យបកស្រាយឡើងវិញ ឬប្ដឹងតាមនីតិវិធី មិនមែនប្រើអំណាច អាងមានទឹកលុយ ដើរសម្លុតគេឯង ជះកំហឹងទាំងឬសគល់ ដូចមនុស្សអវិជ្ជាបែបនេះឡើយព្រោះតែស៊ូទ្រាំនឹងការប្រមាថបែបនេះមិនបានទើបលោក ចាន់ ថន សម្រេចដាក់ពាក្យប្ដឹងតែម្ដង។
ទាក់ទិននឹងបណ្ដឹងមួយនេះលោក ឧកញ៉ា ជឹម សុខ មិនអាចសុំការបកស្រាយបានទេនៅរសៀលថ្ងៃទី២៥នេះ ដោយក្រុមអ្នកសារព័ត៌មាន ខលចូលជាច្រើនដង ប៉ុន្តែលោកមិនទទួល ឯលោកឧត្ដមសេនីយ៍ទោ ស្រេង ជា ស្នងការខេត្តព្រៃវែង បានឲ្យដឹងថា ចំពោះបណ្ដឹងមួយនេះ លោកនឹងចាត់ការតាមច្បាប់៕(ដោយខ្មែរអច្ឆរិយ:)