ខេត្តរតនគិរី ៖ ចេញផ្សាយថ្ងៃទី២៤ខែតុលាឆ្នាំ២០១៨
លោកឧត្តមសេនីយ៍ត្រី គឹម រស្មីមេបញ្ជាការកងរាជអាវុទ្ធហត្ថខេត្តរតនគិរី បានថ្លែងប្រាប់ក្រុមអ្នកសារព័ត៌មាន នៅព្រឹកថ្ងៃទី២៤ ខែតុលា ឆ្នាំ២០១៨ នេះថា ខណៈដែលហាត់ សមអុំទូកនៅបឹងកន្សែងដើម្បីត្រៀមចូលរួមប្រលងប្រណាំងដណ្តើមយកជ័យលាភីនាឱកាសអបអរសារទរព្រះរាជពិធីបុណ្យអុំទូកបណ្តែតប្រទីបសំពះព្រះខែនិងអកអំបុកដែលនឹងឈានចូលមកដល់នាពេលដ៏ខ្លីខាងមុខនេះថា ចាប់ពីឆ្នាំ២០១៨នេះតទៅឯកឧត្តម ថង សាវុន អភិបាលនៃគណៈអភិបាលខេត្តរតនគិរី លោកនឹងរៀបចំអោយមាននូវ ព្រឹត្តិការណ៍ ប្រណាំងទូកដូចបណ្តាខេត្តនានានៅទូទាំងប្រទេសដែរ។
លោកឧត្តមសេនីយ៍ត្រី បានបន្តទៀតថា ឆ្នាំនេះជាលើកទី១ហើយ សម្រាប់ខេត្តរតនគិរីគឺដែលមានការប្រណាំងទូកដើម្បីចូលរួមអបអរសាទរក៏ដូចជាបង្ករឱកាសសប្បាយរីករាយជូនដល់ប្រជាពលរដ្ឋក្នុងខេត្តនាឱកាសព្រះរាជពិធីបុណ្យអុំទូកបណ្តែតប្រទីបអកអំបុកនិងសំពះព្រះខែឆ្នាំនេះដែលការប្រណាំងធ្វើឡើងនៅបឹងកន្សែងនាថ្ងៃទី១៧ដល់ថ្ងៃទី១៩ ខែវិច្ឆិកា ឆ្នាំ២០១៨។
ម្យ៉ាងវិញទៀតក៏ដើម្បីយើង រួមគ្នារក្សានូវទំនៀមទម្លាប់ប្រពៃណី និងវប្បធម៌ដ៏ផូរផង់របស់ជាតិយើងផងដែរ។ហើយចង់អោយប្រជាពលរដ្ឋក្នុងខេត្តរតនគិរី ទាំងមូលបានទស្សនាកម្សាន្តនៅប្រពៃណីមួយនេះ ដែលអ្នកខ្លះមិនអាចមានលទ្ធភាពធ្វើដំណើរទៅទស្សានានៅរាជធានីភ្នំពេញ។
លោកថា ការហាត់សមដើម្បីត្រៀមប្រណាំងយកជ័យលាភីនេះក៏មានការចូលរួមទូករបស់មេបញ្ជាការអាវុធហត្ថទាំង ៩ ស្រុកក្រុង និងមានការចូលរួមទូករបស់មន្ទីរនានានៅក្នុងខេត្តផងដែរ។
(ដោយខ្មែរអច្ឆរិយ:)