មណ្ឌលគិរី ៖ នៅព្រឹកថ្ងៃពុធ ៨កើត ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែតុលា ឆ្នាំ២០១៨ នៅស្នងការដ្ឋាននគរបាលខេត្តមណ្ឌលគិរី បានរៀបចំកិច្ចប្រជុំ ពិគ្រោះយោបល់ផ្លាស់ប្តូរបទពិសោធន៍ ការអនុវត្តន៍ការងារនគរបាល និងសហគមន៍ ដែលមានរយៈពេល០២ថ្ងៃ (១៧-១៨-តុលា-២០១៨) ។
កិច្ចប្រជុំនេះប្រព្រឹត្តទៅក្រោមអធិបតីភាព ឯកឧត្តម ឧត្តមសេនីយ៍ឯក អ៊ីង សំអុល ប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល ក្រសួងមហាផ្ទៃ និងលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ។
ក្នុងកិច្ចប្រជុំនេះដែរមានការអញ្ជើញចូលរួមពី លោកឧត្តមសេនីយ៍ វរសេនីយ៍ ក្រុមការងារនាយកដ្ឋានកិច្ចការប៉ុស្តិ៍នគរបាលរដ្ឋបាល, លោកស្នងការរងទទួលផែនសេនាធិការ លោកស្នងការរងទទួលការិយាល័យកិច្ចការប៉ុស្តិ៍នគរបាល រដ្ឋបាល, លោកនាយការិយាល័យកិច្ចការប៉ុស្តិ៍នគរបាលរដ្ឋបាលចំនួន ០៩ខេត្ត (មណ្ឌលគិរី រតនគិរី ក្រចេះ ស្ទឹងត្រែង កំពង់ធំ កំពង់ចាម ត្បូងឃ្មុំ ព្រៃវែង ព្រះវិហារ), លោកអធិការ អធិការរង នគរបាលក្រុងស្រុកទាំង៥ និងមន្ត្រីការិយាល័យកិច្ចការប៉ុស្តិ៍នគរបាលរដ្ឋបាល នៃស្នងការដ្ឋាននគរបាលខេត្តមណ្ឌលគិរីសរុបចំនួន៣៥នាក់ ។
?ជាកិច្ចចាប់ផ្តើមបើកកិច្ចប្រជុំលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានឡើងអានរបាយការណ៍ស្វាគមន៍ជូនអង្គពិធី និងបានលើកឡើងអំពីលទ្ធផលនានាដែលប៉ុស្តិ៍នគរបាលរដ្ឋបាលសំរេចបាន ស្តីពីការអនុវត្តន៍ការងារនគរបាល និងសហគមន៍ដែលជាលក្ខណៈប្រព័ន្ធទូលំទូលាយ និងស៊ីជម្រៅសំរាប់ការងារនគរបាលនិងសហគមន៍ក្នុងឆ្នាំ២០១៧កន្លងមកនេះ ។
បន្ទាប់មកឯកឧត្តម ឧត្តមសេនីយ៍ឯក អ៉ីង សំអុល ប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល ក្រសួងមហាផ្ទៃ បានមានប្រសាសន៍ថា កិច្ចប្រជុំផ្លាស់ប្តូរបទពិសោធន៍ក្នុងការអនុវត្តន៍ការងារនគរបាលនិងសហគមន៍ ក្នុងគោលបំណងបង្កើនការយល់ដឹង និងពង្រឹងការអនុវត្តន៍ការងារនគរបាលនិងសហគមន៍ ជាពិសេសការប្រើប្រាស់ទម្រង់ទាំង ៤ និងការងារផ្សព្វផ្សាយណែនាំ និងបើកវគ្គបណ្តុះបណ្តាលដល់មន្ត្រីជាជនបង្គោលនិងមន្ត្រីពាក់ព័ន្ធក្រោមឧិវាទ ទទួលបន្ទុកការងារប៉ុស្តិ៍នគរបាលរដ្នបាល និងមន្ត្រីប៉ុស្តិ៍នគរបាលរដ្ឋបាល អោយបានយល់ដឹងអំពីការអនុវត្តន៍ការងារនគរបាល និងសហគមន៍ ដើម្បីធានា និរន្តរភាពនិងសម្រេចបានលទ្ធផលប្រកបដោយប្រសិទ្ធភាព។
បន្ទាប់មកក្រុមការងារបានបន្តចុះធ្វើការដកបទពិសោធន៍ការងារនគរបាល និងសហគមន៍នៅតាមបណ្តាប៉ុស្តិ៍នគរបាលរដ្ឋបាលឃុំ-សង្កាត់ គោលដៅក្រុង-ស្រុកចំនួន ០៣ (ក្រុងសែនមនោរម្យ, ស្រុកពេជ្រាដា, ស្រុកកោះញែក) ៕
ដោយខ្មែរអច្ឆរិយ: