មណ្ឌលគិរី ៖ ភ្ញៀវទេសចរណ៍មកលេងកំសាន្តនៅខេត្តមណ្ឌលគិរី ឆ្នាំ២០១៨ នេះនាឱកាសបុណ្យភ្ជុំបិណ្ឌបានសម្រុកនាំគ្នាមកលេងកំសាន្តមានការ កើនឡើងជាងឆ្នាំមុនរហូតដល់ទៅជាង៣០ភាគរយ ខណៈខេត្តនៅភាគឥសាន្តនេះ ផ្លូវមានស្ថានភាពល្អប្រសើរ បូករួមនឹងខ្យល់អាកាសធាតុត្រជាក់ល្អបរិសុទ្ធ ព្រមទាំងមានស្មៅដុះនៅលើភ្នំដ៏ខៀវខ្ចីស្រស់បំព្រងគួជាទីគយគន់។
តាមរបាយការណ៍របស់ប្រធានមន្ទីរទេសចរណ៍ខេត្តមណ្ឌលគិរី លោក ងិន សុវិមាន បានឱ្យដឹងថា ភ្ញៀវទេសចរណ៍បើគិតត្រឹមតែបីថ្ងៃ គឺចាប់ពីថ្ងៃទី០៨, ០៩ និងទី១០ខែតុលាឆ្នាំ២០១៨ ឃើញថា មានចំនួន១១,៣៤៦នាក់ ក្នុងនោះភ្ញៀវជាតិ ១១,១១៤នាក់ អន្តរជាតិ២៣២នាក់។
បើធៀបនិងឆ្នាំ២០១៧ រយៈពេលដូចគ្នា គឺកើនឡើងចំពោះភ្ញៀវជាតិ៨៧០០នាក់ អន្តរជាតិ២១៥នា កើនសរុប៣០,៤១% លោកប្រធានមន្ទីរបានថ្លែងស្របជាមួយរបាយការណ៍ថា ភ្ញៀវទេសចរណ៍ អញ្ជើញមកលេងខេត្តមណ្ឌលគិរី ស្របពេលខេត្តមួយនេះអំណោយផល ដល់អ្នកទេសចរណ៍ នូវទេសភាពស្រស់ស្អាត សម្បូរដោយរមណីយដ្ឋាន ផ្លូវស្អាត បូករួមទាំងសេវាកម្មល្អប្រសើរ ពិសេសគឺសេវាសន្តិសុខរបស់កងកម្លាំងប្រចាំការ២៤ម៉ោងលើ២៤ម៉ោង។
ជាមួយគ្នានោះដែរ កងកម្លាំងប្រដាប់អាវុធក៏បានថ្លែងថា ចំពោះបញ្ហាអសន្តិសុខពុំមានបញ្ហាអ្វីកេីតមានដែររីឯគ្រោះថ្នាក់ចរាចរណ៍វិញក៏ពុំមានអ្វីគួរឱ្យកត់សម្គាល់នោះទេ៕
(ដោយខ្មែរអច្ឆរិយៈ)