មណ្ឌលគិរី ៖ តំបន់ការពារធម្មជាតិ និងទេសភាពរបស់យើងក៏ស្អាតជានិច្ច, នេះជាការលើកឡើងរបស់អ្នកស្រឡាញ់បរិស្ថាន។ ការថ្លែងបែបនេះនៅគ្រាដែលមន្ត្រីឧទ្យានុរក្ស និងអាជ្ញាធរមូលដ្ឋាន បានសហការគ្នាដើររើស និងប្រមូលសំរាមនៅតាមដងផ្លូវសាធារណៈ និងទីប្រជុំជន ជាពិសេសនៅតាមដងផ្លូវចាប់ពីចំណុចស្រុកកែវសីមា រហូតមកដល់ក្រុងសែនមនោរម្យ ដែលជាទីរួមខេត្តមណ្ឌលគិរី កាលពីព្រឹកថ្ងៃទី០២ ខែតុលា ឆ្នាំ២០១៨។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានថ្លែងឲ្យដឹងថា នៅ១សប្ដាហ៍ខាងមុខទៀតនេះ ប្រជាពលរដ្ឋខ្មែរទាំងអស់នឹងចូលរួមអបអរសាទរពិធីបុណ្យភ្ជុំបិណ្ឌ ហើយក្នុងខេត្តមណ្ឌលគិរី នឹងត្រូវទទួលភ្ញៀវទេសចរចូលមកកម្សាន្តនៅតាមរមណីយដ្ឋានធម្មជាតិសំខាន់ៗនៅក្នុងខេត្តនេះ។
លោកបានឲ្យដឹងទៀតថា ដើម្បីបង្កើតសោភណភាព និងសម្អាតអនាម័យ មន្ត្រីឧទ្យានុរក្សប្រចាំដែនជម្រកសត្វព្រៃកែវសីមា ដែនជម្រកសត្វព្រៃភ្នំណាមលៀរ ដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច បានសហការជាមួយអាជ្ញាធរមូលដ្ឋាន ដើររើស និងប្រមូលសំរាមនៅតាមដងផ្លូវសាធារណៈ ពីចំណុចចាប់ពីសាលាស្រុកកែវសីមា រហូតដល់ស្រុកកោះញែក និងនៅចំណុចឃុំដាក់ដាំ ព្រមទាំងនៅក្នុងតំបន់ការពារធម្មជាតិ ដែលសម្បូរទៅដោយសម្រស់ធម្មជាតិ ដើម្បីសម្អាតភាពកខ្វក់ និងក្លិនស្អុយដែលបណ្ដាលមកពីកាកសំណល់ផ្សេងៗ។
លោកឌិន ប៊ុនធឿន នាយកដែនជម្រកសត្វព្រៃកែវសីមា បានអំពាវនាវសូមកុំឲ្យចោលសំរាមតាមដងផ្លូវ និងត្រូវទុកដាក់សំរាមឲ្យបានត្រឹមត្រូវ ដើម្បីឲ្យតម្លៃបរិស្ថានសម្រាប់យើងទាំងអស់គ្នា។ មិនខុសពីមន្ត្រីបរិស្ថាន មន្ត្រីកងរាជអាវុធហត្ថ និងមន្ត្រីនគរបាលស្រុក ក៏បានសំណូមពរដល់ភ្ញៀវទេសចរដែលចូលមកកម្សាន្តនៅក្នុងតំបន់ទេសចរណ៍ធម្មជាតិ នៃខេត្តមណ្ឌលគិរី សូមទុកដាក់សំរាមឲ្យបានត្រឹមត្រូវ និងសូមកុំចោលសំរាមតាមដងផ្លូវសាធារណៈ ដែលនាំឲ្យបាត់បង់សោភណភាព និងប៉ះពាល់ដល់សុខភាពមនុស្ស និងសត្វ។
ដោយឡែកនៅចំណុចអណ្ដូងស្នេហ៍ ឋិតក្នុងឃុំដាក់ដាំ ស្រុកអូររាំង ក៏មានការដើររើស និងប្រមូលសំរាមផងដែរ ដោយមានការចូលរួមពីឧទ្យានុរក្សដែនជម្រកសត្វព្រៃភ្នំណាមលៀរ នគរបាលប៉ុស្តិ៍ការពារព្រំដែន និងបុគ្គលិកក្រុមហ៊ុនមេហ្គាហ្វឺស បានស្ម័គ្រចិត្តដើររើសសំរាមដែលរាយប៉ាយនៅតំបន់ទេសចរណ៍ឈ្មោះអណ្ដូងស្នេហ៍ ដែលជាទីតាំងទេសចរណ៍មានទេសភាពស្រស់ស្អាតគួរឲ្យចង់គយគន់។
បុគ្គលិកនៃក្រុមហ៊ុនមេហ្គាហ្វឺស និងមន្ត្រីស្រឡាញ់បរិស្ថាន បានសំណូមពរផងដែរដល់ភ្ញៀវទេសចរ សូមកុំបោះសំរាមពាសវាលពាសកាល ដែលបណ្ដាលឲ្យបាត់បង់សោភណភាពបែបនេះ ព្រោះទីនេះ(អណ្ដូងស្នេហ៍)ជាគោលដៅទេសចរណ៍ធម្មជាតិដ៏ស្រស់ស្អាត ដែលមិនគួរមានសំរាមរាយប៉ាយឡើយ ព្រោះសំរាម ឆ្លុះបញ្ចាំងពីចំណេះដឹង មារយាទ និងការទទួលខុសត្រូវ។
លោកលី បូរ៉ា នាយករងដែនជម្រកសត្វព្រៃស្រែពក ក៏បានបំផុសចលនាដោយការដើរសំរាមនាថ្ងៃជាមួយគ្នាផងដែរ ដោយមានការចូលពីបុគ្គលិកអង្គការ WWF និងប្រជាសហគមន៍ ចាប់ពីចំណុចភូមិដេអេ រហូតដល់ស្នាក់ការអភិរក្សបរិស្ថាន។
យ៉ាងណាក៏ដោយ ការចោលសំរាម មើលទៅហាក់ដូចជារឿងតូចតាច ប៉ុន្តែទម្លាប់នេះ គឺជាកញ្ចក់ឆ្លុះបញ្ចាំង ពីចំណេះដឹង មារយាទ និងការទទួលខុសត្រូវរបស់ពលរដ្ឋខ្មែរម្នាក់ៗ។ ទម្លាប់អាក្រក់បែបនេះ បានធ្វើអោយប៉ះពាល់ដល់កិត្តិយស ភាពថ្លៃថ្នូរ និងសោភណភាពរបស់ប្រទេស ព្រមទាំងអាចជាន់ពន្លិចវិស័យទេសចរណ៍ ដែលជាប្រភពប្រាក់ចំណូលរបស់ជាតិផងដែរ។
ជាដំណោះស្រាយ ការលុបបំបាត់ការចោលសំរាមពាសវាលពាសកាល ត្រូវតែមានការចូលរួមពីគ្រប់មជ្ឈដ្ឋាន ហើយត្រូវចាប់ផ្តើមពីបុគ្គលម្នាក់ៗ និងពីគ្រួសារតូចៗទៅ។ ដើម្បីរួមចំណែកផ្លាស់ប្តូរមារយាទមិនសូវល្អនៃការចោលសំរាម គឺដល់ពេលហើយ ដែលប្រជាពលរដ្ឋខ្មែរទាំងអស់គ្នា ត្រូវចាប់ផ្តើមគិតគូរ និងអនុវត្តរឿងតូចតាចមួយនេះ ដើម្បីសង្គមជាតិយើង។ អ្នកដែលត្រូវ អនុវត្តមុនគេគឺ ឪពុកម្តាយ អាណាព្យាបាល ឬមនុស្សចាស់ គ្រូបង្រៀន និងអាជ្ញាធរ។ ប្រសិនបើយើងអាចអនុវត្តបានទាំងអស់គ្នា នោះយើងនឹងអាចលើកកម្ពស់បរិស្ថាន និងអនាម័យបានហើយ ហើយពិតអាចរួមចំណែកកសាងសោភណភាពរបស់ប្រទេសយើងបានទៀតផង។ ប្រភពមន្ទីរបរិស្ថានខេត្តមណ្ឌលគិរី។ ខ្មែរអច្ឆរិយ:
កុំភ្លេចណា… សូមកុំចោលសំរាមតាមដងផ្លូវសាធារណៈ ៕