ចេញផ្សាយថ្ងៃច័ន្ទទី៦រោចខែទុតិយាសាឍឆ្នាំថោះបញ្ចស័ក.២៥៦៧ត្រូវនឹងថ្ងៃទី ៧សីហា ឆ្នាំ២០២៣
ប្រជាពលរដ្ឋរស់នៅក្រុងប៉ោយប៉ែត ប្រមាណជាង១០០គ្រួសារ ប្រមូលផ្តុំគ្នាតវ៉ាប្រឆាំងនឹងការអនុវត្ត របស់សាលាដំបូងខេត្តបន្ទាយមានជ័យ
ខេត្តបន្ទាយមានជ័យ ៖នៅព្រឹកថ្ងៃ៥រោច.ទុតិយាសាឍ ខែស្រាពណ៍ឆ្នាំថោះ ព.ស២៥៦៧ត្រូវនិងថ្ងៃអាទិត្យទី០៦.០៨.២០២៣ ក្រុងប៉ោយប៉ែតក្រោយពីទទួលបានលិខិតជូនដំណឹងមកកាន់អាជ្ញាធរក្រុងប៉ោយប៉ែត របស់សាលាដំបូងខេត្តបន្ទាយមានជ័យ ពាក់ព័ន្ធការស្នើសុំចូលរួមនីតិវិធីផ្សព្វផ្សាយលិខិតជូនដំណឹងស្ដីអំពីការអនុវត្តដោយស្ម័គ្រចិត្ត ដោយបង្គាប់ឲ្យរុះរើផ្ទះសំណង់ផ្សេងៗ ចេញពីដីលំនៅឋានទំហំ ១០០ម៉ែត្រ គុណនឹង ៣០០ម៉ែត្រ ស្មើនឹង ៣ហិកតា នៅចំណុចអាគារថ្មី ស្ថិតនៅភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
ប្រជាពលរដ្ឋកំពុងរស់នៅ ដោយសាងសង់ផ្ទះ សំណង់រឹងខ្លះរហូតទៅដល់មានច្រើនជាន់ គិតមកដល់ពេលនេះជាង១០ឆ្នាំទៅហើយនោះ នាថ្ងៃទី២ ខែសីហា ឆ្នាំ២០២៣ ដែលត្រូវជាថ្ងៃកំណត់របស់សាលាដំបូងខេត្ត ចុះមកផ្សព្វផ្សាយលិខិតជូនដំណឹងស្ដីអំពីការអនុវត្តដោយស្ម័គ្រចិត្តនោះ ក៏ស្រាប់តែប្រជាពលរដ្ឋ១២៣គ្រួសារលើកគ្នាតវ៉ាស្នើសុំការកិច្ចអន្តរាគមន៍ពីរអាជ្ញាធរក៏ដូចជាប្រឆាំងនឹងការអនុវត្តចុះឲ្យរុះរើផ្ទះ សំណង់ផ្សេងៗ របស់សាលាដំបូងខេត្តបន្ទាយមានជ័យ ។
នៅក្នុងការលើកគ្នាមកតវ៉ានេះដែរ គេសង្កេតឃើញថា ខាងប្រជាពលរដ្ឋជាង ១០០គ្រួសារ ដោយកាន់ បា៉ ដាពាក្យស្លោក .ព្រះឆាយាល័ក្ខណ៍ របស់ព្រះមហាក្សត្រ រូបថតសម្ដេចតេជោ និងឯកឧត្តម ហ៊ុន ម៉ាណែត ដោយធ្វើការស្រែកទាមទាររកយុត្តិធម៌ ក្រោយមកក៏បន្តដង្ហែរក្បួនទៅសាលាក្រុង ដោយធ្វើដំណើរថ្មើជើងតាមបណ្តោយផ្លូវជាតិលេខ៥ ក្នុងនោះមន្ត្រីសាលាក្រុងនិងលោកចៅសង្កាត់អូរជ្រៅ បានចេញមកធ្វើការសម្របសម្រួល ដោយឲ្យទៅដោះស្រាយគ្នានៅលំនៅឋានវិញ លុះមកដល់លំនៅដ្ឋាន ក៏ស្រាប់តែឃើញមន្ត្រីរបស់សាលាដំបូងខេត្ត បានចុះមកចំណុចទីតាំងទំនាស់ ដោយមិនមានអាជ្ញាធរនិងសមត្ថកិច្ចមកជាមួយនោះឡើយ ក៏ត្រូវបានប្រជាពលរដ្ឋរួមគ្នាព័ទ្ធមិនឲ្យចេញ ដោយរង់ចាំអាជ្ញាធរមកដោះស្រាយ ។
ខណៈដែលប្រជាពលរដ្ឋកំពុងតែព័ទ្ធមិនឲ្យចេញក៏ស្រាប់តែឃើញវត្តមានលោក ង៉ោ ម៉េងជ្រួន អភិបាលរងខេត្ត បានចុះជួយសម្របសម្រួល អន្តរាគមន៍ភ្លាមៗ ជៀសវាងមានបាតុភាពណាមួយធ្វើឲ្យប៉ះពាល់ លោកក៏បានស្នើយកតំណាងប្រជាពលរដ្ឋចំនូន១៥ នាក់និងតំណាងភាគីម្ខាងទៀតដែលជាគូទំនាស់ រួមនឹងមន្ត្រីតុលាការ ចូលរួមប្រជុំបន្ទាន់ភ្លាមៗនៅសាលាក្រុង ដោយមិនទុកយូរទេ នាវេលាម៉ោងជិត១២ថ្ងៃត្រង់ថ្ងៃខែដដែល។
ពាក់ព័ន្ធករណីខាងលើនេះបើតាមប្រជាពលរដ្ឋបានឲ្យដឹងថា មុននឹងពួកខ្លួនហ៊ានទិញដីនេះមកសាងសង់ផ្ទះ និងសំណង់រឹងជាច្រើនជាន់នោះ ក៏ព្រោះតែមើលឃើញម្ចាស់ពុះដីឡូតិ៍លក់នោះ បានឈ្នះក្តី រហូតដល់តុលាការកំពូល ចេញសាលក្រមស្ថាពរ អាជ្ញាធរមូលដ្ឋានគ្រប់លំដាប់ថ្នាក់ បានដឹងឮ នឹងធ្វើប្លង់ជូន ព្រមទាំងបានដាក់ប្លង់នៅធនាគារ ឬអង្គការនានាដើម្បីយកប្រាក់មករកទទួលទានទៀតផង បើភាគីម្ខាងទៀតនោះអះអាងថា ជាដីរបស់ខ្លួនហេតុអ្វីក៏មិនប្តឹងជំទាស់នៅពេលដែលប្រជាពលរដ្ឋកំពុងតែធ្វើការសាងសង់ផ្ទះ ហេតុអ្វីបានទើបមកសើរើនៅពេលនេះទៅវិញ។
ពលរដ្ឋបញ្ជាក់ថា អ្នកដែលសើរើប្ដឹងជំទាស់នោះអះអាងថា ខ្លួនតំណាងប្រជាពលរដ្ឋ ចំនួន២៥០គ្រួសារ ដែលមានឈ្មោះ វែន ខេមរិន្ទ មិនដែលចេញមុខមកដោះស្រាយ ហើយប្រជាពលរដ្ឋដែលខ្លួនគ្រប់គ្រងទាំង២៥០គ្រួសារនោះ ក៏មិនដែលឃើញហើយក៏មិនដែលចេញមុខមកតវ៉ា ឬបញ្ជាក់ឯកសារណាមួយថាជាដីរបស់ខ្លួននោះដែរ ទោះបីជាប្រជាពលរដ្ឋជាង១០០គ្រួសារស្នើឲ្យចេញមុខតតាំងគ្នាយ៉ាងណាក្តី តែមិនដែលឃើញចេញមកនោះដែរ ឃើញតែប្តឹងរហូតមិនចេះចប់មិនចេះហើយ ច្រើនលើកច្រើនសារ ធ្វើឲ្យពួកគាត់រកពេលវេលារកទទួលទានសឹងពុំបាន ដោយសារតែការព្រួយបារម្ភ ដេកមិនលក់បក់មិនល្ហើយ៕អត្តបទដោយៈស៊ាង ហឿន
ធ្វើសេចក្តីរាយការណ៍ដោយអង្គភាពគេហទំព័រ”ខ្មែរអច្ឆរយ:” http://khpress.net@-ការិយាល័យនិពន្ឋនាយកៈ០១២៥០៥៣៤៤/០៨៩៨៦១៨០៨