ចេញផ្សាយថ្ងៃអង្គារទី៦រោចខែចេត្រឆ្នាំខាលចត្វាស័ក.២៥៦៦ត្រូវនឹងថ្ងៃទី ១១មេសា ឆ្នាំ២០២៣!
មណ្ឌលគិរី៖ នៅព្រឹកថ្ងៃទី១១ មេសា ២០២៣ ថ្នាក់ដឹកនាំខេត្តមណ្ឌលគិរី បានសំណេះសំណាលជាមួយបងប្អូនអ្នកភូមិដែលជួបប្រជុំគ្នានៅជើងភ្នំដោះក្រមុំ ក្នុងក្រុងសែនមនោរម្យ ដែលរៀបចំកម្មវិធីរំឮកវប្បធម៍ជនជាតិដើមភាគតិច ដោយឯកឧត្តមអភិបាលខេត្តមណ្ឌលគិរី បានលើកទឹកចិត្តឲ្យបងប្អូនទាំងអស់ ត្រូវរៀនអភិវឌ្ឍន៏ខ្លួន អភិវឌ្ឍន៏ចំណេះដឹង និងរស់នៅសម្របជាមួយការវិវត្តន៍នៃសង្គមសម័យឌីជីថល។
ឯកឧត្តម ថង សាវុន បានជម្រុញដល់អ្នកពាក់ព័ន្ឋ មិនថាអង្គការក្រៅរដ្ឋាភិបាលឬមន្ត្រីរាជការ ត្រូវចូលរួមលើកកម្ពស់ស្មារតីប្រជាសហគមន៏ជនជាតិដើមភាគតិច បញ្ជូនកូនទៅសាលារៀនឲ្យបានគ្រប់ៗគ្នា បង្កើនការដាំដុះនិងចិញ្ចឹមសត្វតាមលក្ខណៈបច្ចេក ដើម្បីជួយជីវភាពគ្រួសារ។
ក្រៅពីការអប់រំ បង្កើនជីវភាពគ្រួសារ ឯកឧត្តមអភិបាលខេត្តមណ្ឌលគិរី ក៏បានក្រើនរំឮកដល់បងប្អូនទាំងអស់ត្រូវចេះថែរក្សាប្រពៃណីពីដូនតា ទោះបច្ចុប្បន្នវិទ្យាសាស្ត្រទំនើប បង្កលក្ខណៈងាយស្រួលរស់នៅពិតមែន ប៉ុន្តែប្រពៃណីទំនៀមទំលាប់ យើងមិនត្រូវបំភ្លេចឡើយ។ព្រោះការរក្សាបាននូវអត្តសញ្ញាណផ្ទាល់នៃជាតិសាសន៏មួយ ក៏ជាផ្នែកទាក់ទាញនូវចំណូលយ៉ាងក្រាស់ក្រែល តាមរយៈវិស័យទេសចរណ៏ ។
@ធ្វើសេចក្តីរាយការណ៍ដោយអង្គភាពគេហទំព័រ”ខ្មែរអច្ឆរយ:” http://khpress.net@-ការិយាល័យនិពន្ឋនាយកៈ០១២៥០៥៣៤៤/០៨៩៨៦១៨០៨