ខេត្តរតនគិរី ក្រុងបានលុង ៖ កម្លាំងការិយាល័យប្រឆាំងគ្រឿងញៀននៃស្នងការនគរបាលខេត្តបានចុះបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន ត្រង់ចំណុចតារាងបាល់ទាត់ចាស់ ស្ថិតនៅក្នុងភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ដោយឃាត់ខ្លួនជនសង្ស័យប្រុសស្រីចំនួន២នាក់ កាលពីវេលាម៉ោង!! ១៦នឹង៣០នាទី ថ្ងៃព្រហស្បតិ៍ ៤កើត ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែកញ្ញា ឆ្នាំ២០១៨។
លោក លាង អ៉ីម នាយការិយាល័យប្រឆាំងគ្រឿងញៀនបានឲ្យដឹងថា ជនសង្ស័យទាំង២នាក់ សមត្ថកិច្ចឃាត់ខ្លួននោះ ទី១-ឈ្មោះ ឡាំ តាយ ភេទប្រុស អាយុ១៨ឆ្នាំ ជនជាតិវៀតណាម មានទីលំនៅបច្ចុប្បន្នភូមិបួន សង្កាត់កាចាញ ក្រុងបានលុង ខេត្តរតនគិរី មុខរបរមិនពិតប្រាកដ ឃាត់ខ្លួនពីបទជួញដូរ និងទី២-ឈ្មោះ ផែន ចាន់រី ភេទស្រី អាយុ១៥ឆ្នាំ ជនជាតិខ្មែរ មានទីលំនៅបច្ចុប្បន្នភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី មុខរបរមិនពិតប្រាកដ ពីបទប្រើប្រាស់។
ជាមួយគ្នានោះដែរ សមត្ថកិច្ចក៏ដកហូតវត្ថុតាង រួមមាន ម្សៅក្រាមសថ្លា សង្ស័យសារធាតុញៀន ចំនួន១កញ្ចប់ធំ ទម្ងន់៨.៤៣ក្រាមទាំងសម្បកថង់។ សមត្ថកិច្ចបានធ្វើតេស្តទឹកនោមជនសង្ស័យ ដោយរកឃើញលទ្ធផលវិជ្ជមាន(+)ទាំង២នាក់ មានន័យថា ជនសង្ស័យបានប្រើប្រាស់ថ្នាំញៀន។
បច្ចុប្បន្នជនសង្ស័យ រួមទាំងវត្ថុតាង បានឃាត់ខ្លួន និងរក្សាទុកបណ្ដោះអាសន្ន នៅការិយាល័យជំនាញ ដើម្បីបន្តកសាងសំណុំរឿងបញ្ជូនទៅអយ្យការអមសាលាដំបូងខេត្ត ចាត់ការបន្តតាមនីតិវិធី ៕
ខ្មែរអច្ឆរិយៈ
