ថ្ងៃចន្ទ៦រោច ខែជេស្ឋ ឆ្នាំខាល ចត្វាស័ក ព.ស. ២៥៦៦ត្រូវនឹងថ្ងៃទី២០ ខែមិថុនា ឆ្នាំ២០២២
លោក សៀក មុន្នីអភិបាល នៃគណ:អភិបាលស្រុកអូររាំង បានចូលរួមកម្មវិធីរំឭកខួបអនុស្សាវរីយ៍ទី ៤៥ ទិវាចងចាំ នៅតំបន់ប្រវត្តិសាស្ត្រយោធា សម្តេចតេជោ X16 ស្ថិតក្នុងភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ ទិវាចងចាំការចេញដំណើរឆ្ពោះទៅកាន់ការសង្គ្រោះជាតិ ក្រោមអធិបតីភាពដ៏ខ្ពង់ខ្ពស់បំផុត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម ផាម មិញជិញ នាយករដ្ឋមន្ត្រីនៃសាធារណរដ្ឋសង្គមនិយមវៀតណាម។
លោកអភិបាលមានមោទនភាពដែលបានចូលរួមក្នុងព្រឹត្តិការណ៍ចងចាំជាប្រវត្តិសាស្ត្រដ៏មានសារៈសំខាន់នេះ ដែលជាការំឭកឡើងវិញនូវស្មារតីនៃក្តីសង្ឃឹម ការជឿជាក់លើប្រទេសជាតិខ្លួនឯងការមិនបោះបង់ចោលជាតិសាសន៍ និងប្រជាជនខ្លួនផងដែរ។
ពួកយើងបានត្រង់ត្រាប់ស្តាប់ប្រកបដោយការយកចិត្តទុកដាក់ និងមនោសញ្ចេតនារំភើប កោតស្ញប់ស្ញែងក្រៃលែងចំពោះប្រវត្តិតស៊ូដ៏អស្ចារ្យរបស់យុទ្ធជនមួយរូប ដែលពេលនោះកំពុងរងទុក្ខវេទនាក្រោមរបបយង់ឃ្នង់ តែបានទុកចោលនូវភាពឈឺចាប់មួយឡែក ដើម្បីងើបឡើងតស៊ូ រើបំរះពីក្រញ៉ាំពួកប្រល័យពូជសាសន៍ និងសង្គ្រោះជាតិ និងប្រជាជនចេញពីរណ្តៅមច្ចុរាជ។
គម្រូវីរភាពដ៏អង់អាចដែលយុវជនជំនាន់មុនបានធ្វើនេះ បានចាក់ឫសក្នុងក្រអៅបេះដូងរបស់យើងគ្រប់គ្នា។