ថ្ងៃសៅរ៍៤រោច ខែជេស្ឋ ឆ្នាំខាល ចត្វាស័ក ព.ស. ២៥៦៦ត្រូវនឹងថ្ងៃទី១៨ ខែមិថុនា ឆ្នាំ២០២២! លោក សៀក មុន្នី ប្រធានអនុសាខាកាកបាទក្រហមកម្ពុជាស្រុកអូររាំង បានអញ្ជើញចូលរួមអបអរសាទរព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល និងជាព្រះប្រធានកិត្តិយសកាកបាទក្រហមកម្ពុជា គម្រប់ខួប ៨៦ព្រះវស្សា យាងចូល ៨៧ព្រះវស្សា នៅសាខាកាកបាទក្រហមកម្ពុជាខេត្ត ប្រារព្វធ្វើឡើងនៅសាលាខេត្តមណ្ឌលគិរីមានរៀបចំពិធីសូត្រមន្ត រាប់បាតនិងប្រគេនទេយ្យទានដល់ព្រះសង្ឃ។
ពិធីសូត្រមន្តថ្វាយព្រះពរសម្តេចម៉ែ បានធ្វើឡើងក្រោមអធិបតីភាព ឯកឧត្តម ថង សាវុន ប្រធានគណៈកម្មាធិការសាខាកក្រកខេត្ត ឯកឧត្តម ម៉ែន ង៉ុយ អនុប្រធានកិត្តិយសសាខាកក្រកខេត្ត លោក លោកស្រី សមាជិក សមាជិកាគណៈកម្មាធិការសាខា អនុសាខា និងយុវជនកាកបាទក្រហមកម្ពុជា យុវជនកាយរិទ្ធជាតិ យាយជី តាជីជាច្រើនរូប។
ឆ្លៀតក្នុងឱកាសនោះដែរ ឯកឧត្តម ថង សាវុន បានអានសារថ្វាយព្រះពរ និងសម្តែងអំណរសាទរថ្វាយនូវព្រះរាជសព្ទសាធុការពរជ័យ បវរសួស្តី សិរីមង្គល វិបុលសុខមហាប្រសើរថ្លៃថ្លាថ្វាយ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត។
ទូលបង្គំ សូមព្រះបរមរាជានុញ្ញាតិអភិវន្ទលំអោនកាយវាចារចិត្ត សម្តែងនូវកត្តញ្ញូកតវេទិតាធម៌ដ៏ជ្រាវជ្រៅ និងព្រះមហាករុណាទិគុណដ៏ថ្លៃថ្លាថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ចំពោះព្រះរាជសកម្មភាពដ៏ឧត្តុងឧត្តម ដែលព្រះអង្គបានលះបង់ព្រះកាយពល ព្រះបញ្ញាញាណ ដើម្បីបុព្វហេតុជាតិមាតុភូមិជាទីស្នេហា និងប្រជារាស្ត្រខ្មែរជាកូនចៅ ចៅទួតរបស់ព្រះអង្គ។
ទន្ទឹមនឹងនោះ ឯកឧត្តម ថង សាវុន តាងនាមក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធទាំង៣ សាខាកក្រកខេត្ត មន្ត្រីរាជការ ព្រះសង្ឃ ព្រមទាំងប្រជានុរាស្ត្រទូទាំងខេត្តមណ្ឌលគិរី សូមលើកអញ្ជលីប្រណមបួងសួងដល់គុណបុណ្យព្រះរតនត្រ័យ គុណកែវទាំងបី អធិដ្ឋានដល់ព្រះបារមី នៃទេវតាថែរក្សាទឹកដី នៃព្រះរាជាណាចក្រកម្ពុជា ឫទ្ធីបារមីទេវតាថែរក្សាព្រះមហាស្វេតច្ឆត្រ ព្រះឫទ្ទានុភាព នៃដួងព្រះវិញ្ញាណក្ខន្តអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ វត្ថុស័ក្តិសិទ្ធិទាំងឡាយក្នុងលោក ព្រមទាំងទេវតាឆ្នាំថ្មីព្រះនាម កិរិណីទេវី ជាពិសេស ដួងព្រះវិញ្ញាណក្ខន្ធ ព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរៈក្សត្រ ព្រះវររាជបីតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ សូមជួយទ្រទ្រង់បីបាច់ថែរក្សា ការពារ អភិបាលប្រោះព្រំសព្វសាធុកាពរជ័យគ្រប់ប្រការថ្វាយជូន សម្តេចព្រះមហាក្សត្រី ព្រះវររាជមាតាជាតិខ្មែរ សូមព្រះអង្គមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា ព្រះជន្មាយុយឺនយូរជាងរយព្រះវស្សា និងសមប្រកបតែនឹងពុទ្ធពរទាំងបួនប្រការគឺ អាយុ វណ្ណៈ សុខៈពលៈ កុំបីឃ្លៀងឃ្លាតឡើយមកដើម្បីគង់ប្រថាប់ជាម្លប់ដ៏ត្រជាក់ត្រជុំ និងសុខក្សេមក្សាន្តលើទឹកដីកម្ពុជា និងសម្រាប់ប្រជារាស្ត្រខ្មែរ សម្បូរសប្បាយ ថ្កុំថ្កើង និងរុងរឿងជានិច្ចនិរន្តរ៍តរៀងទៅ៕
