ខេត្តបន្ទាយមានជ័យ ៖ នៅថ្ងៃទី ០៦ ខែឧសភាឆ្នាំ ២០២២ឯកឧត្តមនាយឧត្តមសេនីយ៍ កែ គឹមយ៉ានឧបនាយករដ្ឋមន្ត្រី និងជាប្រធានអាជ្ញាធរប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះជួយមូលដ្ឋាន ខេត្តបន្ទាយមានជ័យ បានអញ្ជើញជាធិបតី ក្នុងពិធីសម្ពោធបើកការដ្ឋានសាងសង់ផ្លូវបេតុងចំនួន ០៥ ខ្សែប្រវែងជាង ២០០០ម៉ែត្រ ជូនពលរដ្ឋនៅស្រុកភ្នំស្រុក ខេត្តបន្ទាយមានជ័យ។
លោកជូ បុត្រអភិបាលស្រុកភ្នំស្រុកបានអានរបាយការណ៍ជូន ពីលទ្ធផលការងារដែលរដ្ឋបាលស្រុកបានផ្ដល់សេវាសាធារណៈជូនពលរដ្ឋកន្លងមក។ការងារអភិវឌ្ឍន៍មូលដ្ឋានការដោះស្រាយគ្រោះធម្មជាតិផ្សេងៗការងារដាំដុះកសិកម្មការប្រយុទ្ធប្រឆាំងជំងឺកូវីដ១៩ការស្តារ សេដ្ឋកិច្ចឡើងវិញនិងការដោះស្រាយបញ្ហាប្រឈមមុខនានារបស់ប្រជាពលរដ្ឋអាជ្ញាធរបានសម្រេចធ្វើផ្លូវជូនប្រជាពលរដ្ឋចំនួន ០៥ ខ្សែប្រវែងប្រជាជាង ២០០០ម៉ែត្រ។
ឯកឧត្តមនាយឧត្តមសេនីយ៍កែ គឹមយ៉ានអ្នកតំណាងរាស្ត្រមណ្ឌលខេត្តបន្ទាយមានជ័យ បានមានប្រសាសន៍ថា ការកសាងប្រព័ន្ធគនាគមន៍ គឺជាការបង្កើតសរសៃឈាមសេដ្ឋកិច្ចសម្រាប់វិស័យដឹកជញ្ជូន ពហុមធ្យោបាយតភ្ជាប់ទៅប៉ូល សេដ្ឋកិច្ចសំខាន់ៗនិងអភិវឌ្ឍន៍របៀងសេដ្ឋកិច្ចគន្លឹះឲ្យកាន់តែមានលក្ខណៈងាយស្រួល ក្នុងការប្រកួតប្រជែងក៏ដូចជាសម្រួលដល់ ការធ្វើដំណើរនិងទេសចរណ៍ជូនប្រជាពលរដ្ឋ និងភ្ញៀវទេសចរណ៍ផងដែរ។
ឯកឧត្តមក៏បានបញ្ជាក់ផងដែរថា ការបើកការដ្ឋានកសាងផ្លូវបេតុង ចំនួន ០៥ខ្សែដែលមានប្រវែងពីរពាន់ម៉ែត្រនៅស្រុកភ្នំស្រុកនាព្រឹកនេះ នឹងក្លាយជាសមិទ្ធផលថ្មីមួយទៀត ក្នុងចំណោមសមិទ្ធផលនានារបស់ខេត្តបន្ទាយមានជ័យក្នុងការរួមចំណែក ជាមួយរាជរដ្ឋាភិបាលដើម្បីអភិវឌ្ឍហេដ្ឋារចនាសម្ព័ន្ធរូបវ័ន្តមូលដ្ឋានដើម្បីបង្កើនល្បឿន ក្នុងការធ្វើដំណើរនិងដឹកជញ្ជូន ហើយបានផ្សារភ្ជាប់ទៅតំបន់សេដ្ឋកិច្ចនានាក្នុងតំបន់។
នាយឧត្តមសេនីយ៍ឧបកែ គឹមយ៉ានក៏សូមអំពាវនាវឲ្យប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត ចូលរួមបោះឆ្នោតក្រុមប្រឹក្សាឃុំ/សង្កាត់ អាណត្តិទី ០៥ ដែលនឹងប្រព្រឹត្តទៅនៅថ្ងៃទី ០៥ ខែមិថុនាឆ្នាំ ២០២២ ខាងមុខឱ្យបានគ្រប់គ្នានឹងចូលរួមទប់ស្កាត់ការរីករាលដាលជំងឺកូវីដ១៩ ដែលកំពុងបម្លែងខ្លួនថ្មីនោះ។