ខេត្តបន្ទាយមានជ័យ ៖ នៅព្រឹកថ្ងៃទី ៣០ ខែមីនាឆ្នាំ ២០២២នេះ ឯកឧត្តមទេសរដ្ឋមន្ត្រីគន់ គីមអនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា អមដំណើរដោយលោកលី សារីអភិបាលរងខេត្ត តំណាងឱ្យឯកឧត្តមអ៊ុរាត្រីអភិបាលខេត្តបន្ទាយមានជ័យ និងលោកលោកស្រីប្រធានអនុប្រធានមន្ទីរអង្គភាពនានាជុំវិញខេត្ត បានអញ្ជើញចុះត្រួតពិនិត្យផ្ទះអតីតយុទ្ធជន ដែលរងគ្រោះដោយខ្យល់កន្ត្រាក់ នៅលើដីសម្បទានសង្គមកិច្ចមជ្ឈមណ្ឌល តេជោរសន្តិភាពតំបន់ការការ៉េពីរ (២២២២)ប្រមាណជាង ១០៧គ្រួសារ ឃុំប៉ោយចា ស្រុកភ្នំស្រុក ខេត្តបន្ទាយមានជ័យ កាលពីល្ងាចថ្ងៃទី២៧ ខែមីនាកន្លងមកនេះ។
ក្នុងឱកាសនោះផងដែរឯកឧត្តម ទេសរដ្ឋមន្ត្រីអនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា បានមានប្រសាសន៍បញ្ជាក់ថា ការចាត់ចែងក្រុមជាងដើម្បីធ្វើផ្ទះថ្មីជូនអតីតយុទ្ធជនដែលផ្ទះរបស់គាត់ប្រាប់ពាល់ខ្លាំងខូចខាតទាំងស្រុង ឯកឧត្តមក៏បានបញ្ជាក់ផងដែលថាត្រូវធ្វើថ្មីឱ្យហើយក្នុងរយៈពេលមួយខែក្នុងចំនួនផ្ទះ ៣៩ ខ្នងដោយឡែកផ្ទះប៉ះពាល់ស្រាលគឺប្រគល់ឲ្យអាជ្ញាធរខេត្តស្រុក ក្រុង កងកម្លាំងនិងមន្ទីរអង្គភាពទទួលបន្ទុកត្រូវ រួមគ្នាធ្វើការជួសជុលឡើងវិញ ដោយកំណត់ឲ្យហើយមុនចូលឆ្នាំខ្មែរ ក្នុងចំនួនផ្ទះ ៦៨ ខ្នង។
ឯកឧត្តមទេសរដ្ឋមន្ត្រី អនុប្រធាននិងអគ្គលេខាធិការ សមាគមអតីតយុទ្ធជនកម្ពុជាបានផ្ដាំផ្ញើរ ឱ្យបងប្អូនយុទ្ធជនទាំងអស់យកចិត្តទុកដាក់ឲ្យបានខ្ពស់ចំពោះអាកាសធាតុព្រោះរដូវនេះជារដូវ
មានភ្លៀងធ្លាក់ រួមជាមួយនឹងខ្យល់កន្ត្រាក់ផងដែរនោះនឹងអាចបង្កដោយយថាហេតុណាមួយកើតឡើងចំពោះបងប្អូនហើយត្រូវតែបន្ត នូវការការពារខ្លួនឲ្យបានខ្ពស់បំផុតនឹងត្រូវតែធ្វើតាមការណែនាំរបស់ក្រុមគ្រូពេទ្យពិសេសអនុវត្តតាមអនុសាសន៍របស់សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជាគឺវិធានការ៣ការពារនិង៣កុំទាំងអស់គ្នា។