មណ្ឌលគិរី៖ ក្រុមយុវជននៅស្រុកអូររាំងខេត្តមណ្ឌលគិរី ចំនួន៨៣នាក់ ដែលភាគច្រើនសុទ្ធតែជាជនជាតិដើមភាគតិចព្នង បានស្ម័គ្រចិត្តចូលបម្រើការងារសង្គម ជាមួយសម្ពន្ធយុវជនស្រឡាញ់សន្តិភាពខេត្តមណ្ឌលគិរី ដើម្បីមានឱកាសបានរួមចំណែក បម្រើប្រជាពលរដ្ឋ បម្រើការងារសង្គម ក៏ដូចជាការងារផ្សេងទៀតដែលក្រុមយុវជនអាចធ្វើបាន។
នៅក្នុងពិធីប្រកាសទទួលស្គាល់ថ្នាក់ដឹកនាំកិត្តិយស ថ្នាក់ដឹកនាំប្រតិបត្តិ និងសមាជិកសមាជិកា សម្ពន្ធយុវជនស្រឡាញ់សន្តិភាពស្រុកអូរាំង កាលពីរសៀលថ្ងៃទី២៨ ខែមីនា ឆ្នាំ២០២១ ដែលប្រព្រឹត្តទៅនៅសាលាស្រុកអូររាំង ខេត្តមណ្ឌលគិរី។
ក្រុមយុវជនបានលើកឡើងថា មូលហេតុដែលពួកគេចូលរួមជាមួយសម្ពន្ធយុវជនស្រឡាញ់សន្តិភាព ព្រោះពួកគេចង់រួមចំណែកចំណាយពេលវេលាខ្លះ ដើម្បីបានធ្វើការងារសង្គមជាប្រយោជន៍សាធារណៈ។
លោក សាន់ ដារិទ្ធ ប្រធានសម្ពន្ធយុវជនស្រឡាញ់សន្តិភាពខេត្តមណ្ឌលគិរី បានលើកឡើងថា បច្ចុប្បន្នប្រទេសកម្ពុជាមានសន្តិភាពពេញលេញ ក្រោមការដឹកនាំរបស់សម្ដេចតេជោហ៊ុនសែន ដែលជាពេលវេលាមួយផ្តល់ឱកាសដល់យុវជន គ្រប់ស្រទាប់វណ្ណៈក្រោកឡើងរួមគ្នា កសាងនិងអភិវឌ្ឍប្រទេសជាតិ ក្នុងបរិបទនេះសម្ពន្ធយុវជនស្រឡាញ់សន្តិភាព មានឆន្ទៈដាច់ខាតត្រូវការពារនយោបាយសុខសន្តិភាព សន្តិសុខសណ្តាប់ធ្នាប់សាធារណៈសង្គម ជាពិសេសគឺគាំទ្របម្រើប្រជាពលរដ្ឋដែលជួបការលំបាក ដោយមិនគិតពីនិន្នាការនយោបាយអ្វីទាំងអស់។ លោក បន្ថែមថា នាពេលកន្លងមក សម្ពន្ធយុវជនស្រឡាញ់សន្តិភាពខេត្តមណ្ឌលគិរី បានរួមចំណែកជួយទៅលើបញ្ហាសង្គមជាច្រើន គិតចាប់ពីឆ្នាំ២០២០មក សរុបជាថវិកាចំនួន ជាង១០០លានរៀល ។
ឯកឧត្ដម ថង សាវុន អភិបាលខេត្តមណ្ឌលគិរី បានថ្លែងថា ជាការពិតយុវជនគឺជាទំពាំងស្នងឬស្សីដែលជាកំលាំងស្នូលមួយជួយអភិវឌ្ឍប្រទេសជាតិលើគ្រប់វិស័យ និងសូមទទួលស្គាល់នូវការខិតខំរបស់ក្រុមយុវជនលើការងារស័គ្រចិត្ត និងបានចូលរួមចំណែកយ៉ាងផុសផុលក្នុងសកម្មភាពសេដ្ឋកិច្ច-សង្គម ចាប់ពីកម្រិតមូលដ្ឋានរហូតដល់ថ្នាក់ជាតិ ដោយផ្តោត ការយកចិត្តទុកដាក់ផ្សារភ្ជាប់យុវជនដែលមានចិត្តគំនិត ឆន្ទៈ និងបេះដូងក្នុងការចូលរួម និងតបស្នងត្រលប់ទៅសង្គមជាតិរបស់យើងវិញ។
ឯកឧត្ដម ថង សាវុន លើកឡើងទៀតថា ក្រៅពីការចូលរួមសកម្មភាពជាច្រើនដូចជាការឧបត្ថម្ភដល់ប្រជាពលរដ្ឋក្រីក្រនៅតាមមូលដ្ឋាន ការឧបត្ថម្ភ ជាសម្ភារៈដល់ចាស់ជរាក្រីក្រ ។ល។ សមាជិក សមាជិកា សម្ព័ន្ធយុវជនស្រឡាញ់សន្តិភាពខេត្តមណ្ឌលគិរី ក៏បានចូលរួមចំណែកជាមួយអាជ្ញាធរមូលដ្ឋាន បានលះបង់ថវិកា កម្លាំងកាយ ចិត្ត បញ្ញាស្មារតី ពេលវេលាផ្ទាល់ខ្លួនពីការងារវិជ្ជាជីវៈប្រចាំថ្ងៃរបស់ខ្លួន ដោយមិនខ្លាចនឿយហត់៕
