មណ្ឌលគិរី ÷ នៅព្រឹកថ្ងៃទី ២៧ ខែ មីនា ឆ្នាំ២០២២ រដ្ឋបាលខេត្តមណ្ឌលគិរី សហការជាមួយក្រសួងពាណិជ្ជកម្ម បានរៀបចំពិធីសម្ពោធម៉ាកសម្គាល់ភូមិសាស្ត្រទំនិញ ” ទឹកឃ្មុំព្រៃមណ្ឌលគិរី ” ក្រោមអធិបតីភាពដ៏ខ្ពង់ខ្ពស់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដោយមានការអញ្ជើញចូលរួមពី ឯកឧត្ដម ម៉ែន ង៉ុយ ប្រធានក្រុមប្រឹក្សាខេត្ត លោក ញ៉ន សិទ្ឋ អភិបាលរងខេត្ត ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការក្រសួងពាក់ព័ន្ធ ប្រធាន មន្ទីរ អភិបាលរងក្រុង តំណាងអង្គការ សមាគមដៃគូរនានា សហគមន៍ជនជាតិដើមភាគតិច ដែលពិធីនេះ ប្រព្រឹត្តទៅនៅបរិវេណសួនច្បារក្រុងសែនមនោរម្យ ខេត្តមណ្ឌលគិរី ។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងថា រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានខិតខំប្រឹងប្រែងក្នុងការចរចាចុះកិច្ចព្រមព្រៀងបើកទីផ្សារទៅកាន់ពិភពលោក ដោយទទួលបាននូវប្រព័ន្ធអនុគ្រោះពន្ធ ពីបណ្ដាប្រទេសអភិវឌ្ឍន៍ ប្រទេសកំពុងអភិវឌ្ឍន៍ និងកិច្ចព្រមព្រៀងពាណិជ្ជកម្មសេរីទ្វេរភាគីកម្ពុជា-ចិន កម្ពុជា-កូរ៉េ ដើម្បីបង្កលក្ខណ:ងាយស្រួលនិងអំណោយផលដល់ការធ្វើពិពាធកម្មទីផ្សារកសិកម្មកម្ពុជាទៅកាន់ប្រទេសក្នុងតំបន់ និងពិភពលោក ។ ក្រសួងបានសហការជាមួយនិងផ្នែកពាក់ព័ន្ធ ក្នុងការជ្រើសរើសទំនិញមានសត្ដានុពលសម្រាប់ការនាំចេញទៅទីផ្សារក្រៅប្រទេស សំដៅជំរុញពាណិជ្ជកម្ម ទាក់ទាញអ្នកវិនិយោគ បង្កើតការងារនៅមូលដ្ឋាន និងការកាត់បន្ថយភាពក្រីក្រជូនប្រជាពលរដ្ឋ ។
ឯកឧត្តមរដ្ឋមន្ត្រី បានបញ្ជាក់ថា ការចុះបញ្ជីម៉ាកសម្គាល់ភូមិសាស្ត្រទំនិញ ” ទឹកឃ្មុំព្រៃមណ្ឌលគិរី ” គឺមានគោលបំណង ១/ទទួលបានកិច្ចការពារកម្មសិទ្ធិបញ្ញា ទប់ស្កាត់ការក្លែងបន្លំម៉ាកសម្គាល់ភូមិសាស្ត្រទំនិញ នៅលើទីផ្សារក្នុងស្រុក និង ទីផ្សារអន្តរជាតិ ។
២/អភិរក្ស អភិវឌ្ឍចំណេះដឹង និងទេពកោសល្យតាមបែបប្រពៃណីជនជាតិដើមភាគតិច ។ ៣/ ផ្សព្វផ្សាយពីកេរ្ដិ៍ឈ្មោះទំនិញ អភិរក្ស តំបន់ព្រៃការពារ ធនធានធម្មជាតិ ដើម្បីទាក់ទាញភ្ញៀវទេសចរណ៍ ។ ៤/ លើកកម្ពស់គុណភាព ស្តង់ដារអនាម័យផលិតផល តម្លៃ និងបង្កើតការងារជូនប្រជាពលរដ្ឋនៅមូលដ្ឋាន ។
លោក ញ៉ន សិទ្ឋ អភិបាលរងខេត្តមណ្ឌលគិរី បានថ្លែងអំណរគុណដល់ឯកឧត្តមរដ្ឋមន្ត្រី ដូចជាអង្គការពាក់ព័ន្ធនានា ដែលបានជម្រុញការចុះបញ្ជីម៉ាកសម្គាល់ភូមិសាស្ត្រទំនិញ ” ទឹកឃ្មុំព្រៃមណ្ឌលគិរី ” ដែលបានលើកទឹកចិត្តដល់សហគមន៍ក្នុងការគ្រប់គ្រង ថែរក្សា ធនធានធម្មជាតិ ។ លោកអភិបាលរងខេត្ត ក៏បានសំណូមពរដល់ឯកឧត្តមរដ្ឋមន្ត្រីនិងផ្នែកពាក់ព័ន្ធ ជួយគាំទ្រការចុះបញ្ជីម៉ាកសម្គាល់ភូមិសាស្ត្រទំនិញកសិផលខេត្តមណ្ឌលគិរី មានដូចជា កាហ្វេមណ្ឌលគិរី ផ្លែប៊័រមណ្ឌលគិរី ផ្លែក្រូចវល្លិ៍មណ្ឌលគិរី ។ល។
តាមការបញ្ជាក់ពីប្រធានសមាគមអភិរក្សឃ្មុំព្រៃខេត្តមណ្ឌលគីរី បច្ចុប្បន្នសមាគមនេះ មានសមាជិកជាអ្នកប្រមូលឃ្មុំ សរុប៤៤៩នាក់ ដែលស្ថិតក្នុងសហគមន៍ព្រៃឈើចំនួន១១ មានក្រុមហ៊ុនចំនួនបី និងអ្នកទិញទឹកឃ្មុំចំនួន៨នាក់ ជាមធ្យមសមាជិករបស់សមាគមទាំងអស់អាចប្រមូលទឹកឃ្មុំបានប្រហែលសាមសិបតោនក្នុងមួយឆ្នាំ ដើម្បីផ្គត់ផ្គង់ទៅក្នុងទីផ្សារ ដែលអាចរកចំណូលបានចន្លោះពី៣០ទៅ៤០ម៉ឺនដុល្លារក្នុងមួយឆ្នាំ ៕