ខេត្តបន្ទាយមានជ័យ ៖ បន្ទាប់ពីមានការចុះផ្សាយព័ត៌មានពីជីវិតដ៏លំបាករបស់ស្ត្រី ពីរ នាក់ម្ដាយកូននៃគ្រួសារយោធិនពិការពលីម្នាក់នៅក្រុងប៉ោយប៉ែតដង្ហើយរកការអន្តរាគមន៍ជួយព្រោះតែភាពក្រីក្រនិងគ្មានដីគ្មានផ្ទះរស់នៅ ទើបនៅព្រឹកថ្ងៃទី ៣១ ខែមករាឆ្នាំ ២០២២ នេះក្រុមការងារសមាគមន៍អតីតយុទ្ធជនខេត្តបន្ទាយមានជ័យ ដឹកនាំដោយលោកវរសេនីយ៍ទោលឹម វាសនាប្រធានលេខាធិការដ្ឋាន ស.អ.ក តំណាងដ៏ខ្ពង់ខ្ពស់លោកឧត្តមសេនីយ៍ត្រីជឹម ប៊ុនអានប្រធានសមាគមន៍យុទ្ធជនកម្ពុជាខេត្តបន្ទាយមានជ័យសហការណ៍ជាមួយតំណាងមន្ទីរសង្គមកិច្ចអតីតយុទ្ធជនយុវនីតិសម្បទាខេត្ត ដែលមានលោកណុប ចាន់ថុលប្រធានការិយាល័យរដ្ឋបាលនៃមន្ទីរសង្គមកិច្ចខេត្តបន្ទាយមានជ័យបានចុះជួបជាក់ស្ដែងនិងធ្វើការសម្របសម្រួលជាមួយគ្រួសារខាងលើ នឹងផ្ដល់ដី០១ឡូត៍ព្រមទាំងផ្ទះមួយខ្នងនាពេលឆាប់ៗនាខាងមុខនេះ។
លោកវរសេនីយ៍លឹម វាសនាប្រាប់គ្រួសារមួយនេះថាជាការគិតគូរយ៉ាងយកចិត្តទុកដាក់បំផុតពីសម្ដេចតេជោហ៊ុន សែននាយករដ្ឋមន្ត្រីនិងជាប្រធានសហគមន៍អតីតយុទ្ធជនកម្ពុជាតាមរយៈឯកឧត្តមនាយឧត្តមសេនីយ៍គន់ គីមអនុប្រធានសមាគមអតីតយុទ្ធជនកម្ពុជាបានចង្អុលបង្ហាញឲ្យសមាគមន៍អតីតយុទ្ធជនកម្ពុជា ខេត្តបន្ទាយមានជ័យសហការណ៍ជាមួយស្ថាប័នពាក់ព័ន្ធចុះពិនិត្យជាក់ស្ដែងគ្រួសារនេះ។លោកថាថ្នាក់ដឹកនាំបានរៀបចំឱ្យគ្រួសារខាងលើនៅលើដីមួយឡូត៍ទំហំ ៣០ ម៉ែត្រគុណនិង ៥០ ម៉ែត្រព្រមទាំងផ្ទះមួយខ្នងទំហំ ០៤ម៉ែត្រគុណនិង ០៦ម៉ែត្រដែលទីតាំងផ្ដល់ឱ្យនេះស្ថិតនៅមជ្ឈមណ្ឌលតេជោសន្តិភាពការ៉េ០២ក្នុងភូមិខ្លែងពណ៌ ឃុំប៉ោយចា ស្រុកភ្នំស្រុក ខេត្តបន្ទាយមានជ័យ។
គ្រួសារខាងលើបានទទួលអំណោយដ៏ថ្លៃថ្លានេះរីករាយនិងត្រេកអរហើយក៏បានថ្លែងអំណរគុណចំពោះថ្នាក់ដឹកនាំសមាគមន៍អតីតយុទ្ធជនកម្ពុជាដែលមានសម្ដេចតេជោនាយករដ្ឋមន្ត្រីជាប្រធាន ឯកឧត្តមនាយឧត្តមសេនីយ៍គន់ គីមអនុប្រធាននិងជាអគ្គលេខាធិការរងផងដែរ។គួរបញ្ជាក់ថា គ្រួសារទទួលបានរបបដីឡើងផ្ទះនេះជាប្រពន្ធនិងកូនស្រីយោធិនពិការពលីម្នាក់គឺលោកអនុសេនីយ៍ទោម៉ោញ តាំងអតីតយោធាកងពលលេខ ១២បច្ចុប្បន្នកងពលតូចថ្មើរជើងលេខ ៥១ លោកម៉ោញ តាំងបានចូលបម្រើកងទ័ពនៅឆ្នាំ ១៩៨៣ហើយនៅឆ្នាំ ១៩៩៦ គាត់បានជួបគ្រោះអកុសលជាន់មីនដាច់ជើងម្ខាងពេលបំពេញបេសកកម្មក្នុងសមរភូមិនៅស្រុកម៉ាឡៃ ខេត្តបន្ទាយមានជ័យនិងបានស្លាប់នៅឆ្នាំ ២០២០កន្លងមកនេះ។
ក្រោយពីបានជួបសំណេះសំណាលរវាងក្រុមការងារលេខាធិការដ្ឋាន ស.អ.ក ខេត្តបន្ទាយមានជ័យនិងគ្រួសារយោធាពាក់លីរួចមកអ្នកស្រីគីម សៀននិងកូនស្រីឡោ ធារីហៅតាំងធារី បានលើកម្រាមដៃដប់គោរពថ្លែងអំណរគុណយ៉ាងជ្រាលជ្រៅគោរពជូនចំពោះសម្ដេចតេជោហ៊ុន សែននិងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែនសូមសម្ដេចទាំងទ្វេជួបតែសុខភាពល្អបរិបូរណ៌ កម្លាំងមាំមួនជន្មាយុយឺនយូរជារៀងរហូត។
ពីរនាក់ម្ដាយនិងកូនស្រីក៏បានសូមគោរពថ្លែងអំណរគុណជូនដល់ឯកឧត្តមនាយឧត្តមសេនីយ៍គន់ គីមអនុប្រធាននិងជាអគ្គលេខាធិការនៃសមាគមន៍អតីតយុទ្ធជនកម្ពុជាព្រមទាំងក្រុមការងារសមាគមន៍អតីតយុទ្ធជនកម្ពុជាខេត្តបន្ទាយមានជ័យនិងមន្ទីរសង្គមកិច្ចអតីតយុទ្ធជននិងយុវនីតិសម្បទា ខេត្តបន្ទាយមានជ័យនិងក្រុមសារព័ត៌មានទាំងអស់ដែលបានចុះផ្សាយជួយពួកគាត់និងកូនស្រីបានទទួលនៅផ្ទះមួយខ្នង និងដីសម្រាប់កសាងជីវិតថ្មីរបស់ពួកគាត់ផងដែរ ។