ខេត្តកំពង់ធំ ៖ កាលពីវេលាម៉ោង១៦និង៥៥នាទី ថ្ងៃសៅរិ៍ ១៤កើត ខែស្រាពណ៌ ឆ្នាំចរ សំរិទ្ធិព.ស២៥៦២ ត្រូវនឹងថ្ងៃ២៥ ខែសីហា ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្ដបើកកិនអ្នកបើកបរម៉ូតូ លើផ្លូវទំនប់ ចំណុចទឹកវឹល ភូមិផ្លុង ឃុំទីពោធិ៍ ស្រុកសន្ទុក ខេត្តកំពង់ធំ បណ្ដាលអោយក្មេងប្រុស២នាក់ ស្លាប់ភ្លាមៗនៅកន្លែងកើតហេតុ។
តាមប្រភពពីសមត្ថកិច្ចបានអោយ ខ្មែរអច្ឆរិយ:ដឹងថា គ្រោះថ្នាក់ចរាចរណ៍រថយន្ត កិនម៉ូតូ ក្នុងទឹសដៅបញ្ជាសគ្នា បណ្តាលឱ្យមនុស្ស ស្លាប់០២នាក់(ប្រុស) ម៉ូតូជនរងគ្រោះ ម៉ាហុងដាC125ពណ៌ខ្មៅ ផ្លាកលេខកំពង់ធំ1J.5120 (បើកបរទឹសដៅពីលិចទៅកើត) ដោយឈ្មោះ គង់.មករា ភេទប្រុស អាយុ១៨ឆ្នាំ នៅភូមិតាំងក្រសាំង ឃុំតាំងក្រសាំង ស្រុកសន្ទុក ខេត្តំពង់ធំ (ពាក់មួកសុវត្ថិភាព) (ស្លាប់នៅកន្លែងកើតហេតុ) អ្នករួមដំណើរឈ្មោះហេង.គឹម ហាន ភេទប្រុសអាយុ១៩ឆ្នាំ ភូមិវាំងខាងត្បូង ឃុំតាំងក្រសាំង ស្រុកសន្ទុក ខេត្តកំពង់ធំ (ស្លាប់នៅកន្លែងកើតហេតុ) (មិនពាក់មួកសុវត្ថិភាព)។
ចំណែករថយន្តបង្ករហេតុម៉ាកឡិចស៊ីស Lx470ពណ៌ស ផ្លាកលេខកំពង់ធំ 2B.0601(បើកបរទឹសដៅពីកើតទៅលិច) ដោយឈ្មោះ សួស.សុវណ្ណា ភេទប្រុស អាយុ៤៩ឆ្នាំ នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ (មេបញ្ជាការងអាវុធហត្ថស្រុកសន្ទុក និង ជាប្រធានស្នាក់ការសន្តិសុខ៦០១) (បើកគេចខ្លួនពីកន្លែងកើតហេតុ)។
មូលហេតុនេះបង្ករឡើងដោយអ្នកបើកបរម៉ូតូដួលលើទ្រូងផ្លូវ ហើយត្រូវបានរថយន្ត បើកបរបញ្ជាសទឹសគ្នា ក្នុងល្បឿនលឿនផងនោះ បណ្ដាលអោយកិនមនុស្សស្លាប់នៅកន្លែងកើតហេតុតែម្ដង ។
បន្ទាប់ពីកិនមនុស្សស្លាប់ អ្នកបើកបររថយន្ដបានបើករត់គេចខ្លួនបាត់ស្រមោល ក្រោយកើតហេតុសមត្ថកិច្ច ចុះវាស់វែងធ្វើកំណត់ហេតុ ប្រគល់សព ជូនសាច់ញាតិចាត់ចែងធ្វើបុណ្យតាមប្រពៃណី ចំណែកវត្ថុតាងយកមករក្សាទុក នៅអធិការដ្ឋាននគរបាល ស្រុកសន្ទុក រងចាំដំណោះស្រាយតាមផ្លូវច្បាប់នៅពេលក្រោយ ។
ចំពោះបញ្ហាគ្រោះថ្នាក់ចរាចរណ៍ខាងលើនេះ មន្ត្រីរាជការនិងប្រជាពលរដ្ឋស្នើសុំទៅសមត្ថកិច្ចជំនាញនិងស្ថាប័ណច្បាប់មានវិធានការ ដើម្បីឃាត់ខ្លួនជនបង្ករមកដោះស្រាយតាមផ្លូវច្បាប់ជូនជនរងគ្រោះដោយយុត្តិធម៍ ៕
ខ្មែរអច្ឆរិយ: