ព័ត៌មានពីរាជធានីភ្នំពេញ
ចេញផ្សាយថ្ងៃពុធ០៩កើត ខែបុស្ស ឆ្នាំជូត ទោស័កព.ស២៥៦៤ ត្រូវនឹងថ្ងៃទី២៣ខែធ្នូ ឆ្នាំ២០២០
ឯកឧត្តមបណ្ឌិត ហ៊ុន ម៉ាណែត កូនប្រុសច្បងរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ត្រូវបានគណបក្សប្រជាជនកម្ពុជា ដំឡើងឋានៈជា អនុប្រធានគណៈចលនាមហាជននៃគណៈកម្មាធិការកណ្តាលរបស់ខ្លួន នៅថ្ងៃទី២៣ ខែធ្នូ ឆ្នាំ២០២០នេះ។
ការតែងតាំង ឯកឧត្តមបណ្ឌិត ហ៊ុន ម៉ាណែត ត្រូវបានធ្វើឡើងតាមសេចក្តីសម្រេចរបស់គណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា ដែលមុនការតែងតាំងនេះ លោកមានតួនាទីជាប្រធានយុវជនគណបក្សប្រជាជនកម្ពុជាថ្នាក់កណ្តាល និងជាសមាជិកគណៈចលនាមហាជន នៃគណៈកម្មាធិការកណ្តាលផងដែរ។
ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានបញ្ជាក់ប្រាប់បណ្តាញព័ត៌មានឱ្យដឹងថា គណៈចលនាមហាជន នៃគណៈកម្មាធិការកណ្តាល គណបក្សប្រជាជនកម្ពុជា នាបច្ចុប្បន្ននេះ ដឹកនាំដោយ លោកស្រីឧបនាយករដ្ឋមន្ត្រី ម៉ែន សំអន។ ឯកឧត្តមអះអាងថា ការដំឡើងឋានៈនេះ គឺបន្ថែមលើមុខងារបច្ចុប្បន្នរបស់ ឯកឧត្តមបណ្ឌិត ហ៊ុន ម៉ាណែត។
ឯកឧត្តមបានបញ្ជាក់បន្ថែមថា គណៈចលនាមហាជន មានតួនាទីសំខាន់ ក្នុងការឃោសនាផ្សព្វផ្សាយ អំពីគោលនយោបាយ ដែលធ្វើយ៉ាងណាឱ្យមហាជនមានការយល់ដឹង ជឿជាក់ និងដើរតាមការដឹកនាំរបស់គណបក្ស និងរាជរដ្ឋាភិបាល។
សូមបញ្ជាក់ថា ឯកឧត្តមបណ្ឌិត ហ៊ុន ម៉ាណែត ត្រូវបានគណបក្សប្រជាជនកម្ពុជា ប្រកាសតែងតាំងជា ប្រធានយុវជនគណបក្សប្រជាជនកម្ពុជាថ្នាក់កណ្តាលជាផ្លូវការ កាលពីទី១៣ ខែមិថុនា ឆ្នាំ២០២០។ ការតែងតាំងនេះ បានទទួលការគាំទ្រយ៉ាងខ្លាំងក្លាពីសំណាក់យុវជននានា នៅក្នុងគណបក្សប្រជាជនកម្ពុជាផងដែរ៕
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net)
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨
