ព័ត៌មានពីខេត្តមណ្ឌលគិរី-ស្រុកអូររាំង
ចេញផ្សាយថ្ងៃសៅរ៍ ៤រោច ខែចេត្រ ឆ្នាំកុរ ឯកស័កព.ស២៥៦៣ ត្រូវនឹងថ្ងៃទី១១ ខែមេសា ឆ្នាំ២០២០!
នៅថ្ងៃសៅរ៍ ៤រោច ខែចេត្រ ឆ្នាំកុរ ឯកស័កព.ស២៥៦៣ ត្រូវនឹងថ្ងៃទី១១ ខែ មេសា ឆ្នាំ២០២០ ដើម្បីឆ្លើយតបតាមតម្រូវការរបស់ប្រជាពលរដ្ឋ ដែលបានលើកឡើងក្នុងវេទិកាសាធារណៈថ្នាក់ជាតិ ដោយស្នើដល់អាជ្ញាធរខេត្ត រួមទាំងថ្នាក់ជាតិ ជួយជួសជុលផ្លូវក្នុងភូមិអណ្តូងក្រឡឹង និងផ្លូវទៅភូមិរការ មានការលំបាក ជាពិសេស នារដូវវស្សា ដើម្បីងាយស្រួលដល់ការធ្វើដំណើររបស់ប្រជាពលរដ្ឋ នៅស្រុកអូររាំងឯកឧត្តម ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី បានអញ្ជើញជាអធិបតី ក្នុងពិធីបើកការដ្ឋានសាងសង់ផ្លូវគ្រួសក្រហមចំនួន ពីរខ្សែ ប្រវែងជាង ៣០គីឡូម៉ែត្រ។
ឯកឧត្តម ស្វាយ សំអ៊ាង អភិបាលខេត្ត បានឱ្យដឹងថា ការសាងសង់ផ្លូវគ្រួសក្រហមចំនួន ២ខ្សែ ប្រវែងសរុបចំនួន ៣១,៣០០ម៉ែត្រ:
* ទី១ ផ្លូវទៅភូមិអណ្តូងក្រឡឹងប្រវែង៧,៣០០ម៉ែត្រ ទទឹង០៦ម៉ែត្រ និងដាក់លូ ០២កន្លែង
* ទី២ ផ្លូវទៅភូមិរការ ប្រវែង ២៤,០០០ម៉ែត្រ ស្ថិតនៅក្នុងឃុំសែនមនោរម្យ ស្រុកអូររាំង
ផ្លូវទាំងពីរខ្សែខាងលើនេះគឺជាគម្រោងរបស់អាជ្ញាធរខេត្តមណ្ឌលគិរី ស្ថាបនាដោយក្រុមតេជោ សៀមរាប។
ឯកឧត្តម បានបន្ថែមថាការសាងសង់ផ្លូវទាំងពីរខ្សែនេះ គឺដើម្បីបម្រើផលប្រយោជន៍ប្រជាពលរដ្ឋទូទៅ ជាពិសេសប្រជាពលរដ្ឋរស់នៅក្នុងស្រុកអូររាំងនេះតែម្តងហើយក៏សូមឱ្យអាជ្ញាធរមូលដ្ឋានត្រូវចូលរួមសហការជាមួយប្រជាពលរដ្ឋដើម្បីធ្វើយ៉ាងណា ការស្ថាបនាផ្លូវនេះឲ្យទទួលបានជោគជ័យ បន្ថែមលើសនេះ ឯកឧត្តម អភិបាលខេត្ត ក៏បានណែនាំដល់អាជ្ញាធរមូលដ្ឋានត្រូវបន្តអប់រំផ្សព្វផ្សាយពីវិធានការបង្ការ ទប់ស្កាត់ ការឆ្លងរីករាលដាលនៃជំងឺកូវីដ១៩ ដល់បងប្អូនប្រជាពលរដ្ឋដូចជា នាំគ្នាលាងដៃជាមួយសាប៊ូ ទឹកអាល់កុល រឺជែល ជាប្រចាំ ចៀសវាងការចាប់ដៃគ្នា ត្រូវប្រើកាយវិការសំពះត្រូវពាក់ម៉ាស់ នៅក្នុងទីប្រជុំជនហើយត្រូវតាមដានសុខភាពប្រសិនមានអាការៈក្អកមិនបាត់ ក្តៅខ្លួន ខ្លាំង សូមប្រញាប់ទៅមណ្ឌលសុខភាព និងមន្ទីរពេទ្យ រឺខលទៅលេខទូរសព្ទ័១១៥ ដើម្បីទទួលបានសេវាពិនិត្យសុខភាពឲ្យបានត្រឹមត្រូវ។
ម្យ៉ាងវិញទៀតសូមឱ្យអាជ្ញាធស្រុក និងសមត្ថកិច្ចទាំងអស់ ត្រូវតាមដាន និងក្ដាប់ឱ្យបានច្បាស់លាស់នូវស្ថិតិប្រជាពលរដ្ឋ ដែលបានចូលមកដល់មូលដ្ឋានជាពិសេសពលរដ្ឋដែលវិលត្រលប់មកពីក្រៅប្រទេស និងត្រូវអប់រំណែនាំពួកគាត់ឱ្យបានយល់ និងអនុវត្តឱ្យបានខ្ជាប់ខ្ជួនអំពីវិធានការ នៃការដាក់ខ្លួនឯងឱ្យនៅដាច់ពីគេក្នុងរយៈពេល១៤ថ្ងៃ។
នាឱកាសនោះ ឯកឧត្តម អភិបាលខេត្ត បាននាំយកអង្ករចំនួន ២តោន មី ផ្តល់ជូនរដ្ឋបាលស្រុកអូរររាំង ដើម្បីចែកចាយបន្តដល់ប្រជាពលរដ្ឋនៅមូលដ្ឋាន ដែលកំពុងខ្វះខាតនាពេលបច្ចុប្បន្ន ដែលជំងឺកូវីដ១៩ កំពុងរាតត្បាតនៅនៅក្នុងតំបន់ និងពិភពលោក ដោយឡែកសម្រាប់អ្នកចូលរួមចំនួន ៤០នាក់ក្នុង១ម្នាក់ ទទួលបានថវិកា ៤ម៉ឺនរៀល សារុង ឫក្រមា។
ហើយជាកិច្ចចុងក្រោយ ឯកឧត្តម អភិបាលរួមទាំងក្រុមការងារ ក៏បានអញ្ជើញចុះពិនិត្យទីតាំងវិទ្យាល័យអូររាំង ស្ថិតនៅស្រុកអូររាំង ទុកសម្រាប់ដាក់ពលករ ដែលមកពីក្រៅប្រទេស ឲ្យពួកគាត់នៅដាច់ដោយឡែករយៈពេល១៤ថ្ងៃ តាមការណែនាំរបស់ក្រសួងសុខាភិបាលផងដែរ៕
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net)
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨