ភ្នំពេញ ៖ ចោរប្លន់ប្រដាប់អាវុធមួយក្រុម បានធ្វើសកម្មភាពលួចប្លន់ម៉ូតូអស់លាក់ ខណៈប្រជាពលរដ្ឋប្រទះឃើញ ដែលពួកគេយកម៉ូតូទៅលាក់ទុកក្នុងព្រៃ មួយកន្លែងក្នុងបុរី ព្រីនថោន ខណៈដែលមានបំណងចង់យកចេញវិញ តែត្រូវប្រជាពលរដ្ឋបានរាយការណ៍ទៅកម្លាំងនគរបាលចុះឡោមព័ទ្ធ ចាប់បានជនសង្ស័យចំនួន០៣នាក់ និងម៉ូតូ៣គឿង នៅថ្ងៃទី២០ ខែសីហា ឆ្នាំ២០១៨ ក្នុងភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ។
មន្ដ្រីនគរបាលខណ្ឌពោធិ៍សែនជ័យ បានឲ្យខ្មែរអច្ឆរិយ: ដឹងថា នៅមុនពេលកើតហេតុ ក្រុមចោរប្លន់ប្រដាប់អាវុធខាងលើ បានធ្វើសកម្មភាពកាច់សោកម៉ូតូ មួយគ្រឿង ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1BZ-5958 បានសម្រេច ហើយរួចជិះគេចខ្លួនចូលក្នុងព្រៃ និងយកទៅលាក់ទុកនៅក្នុងផ្ទះល្វែងមួយកន្លែង ដែលគេទុកចោល លុះមកដល់វេលាកើតហេតុ ជនសង្ស័យទាំងនោះបានមកយកម៉ូតូ ក្នុងគោលបំណងយកចេញ តែត្រូវបានប្រជាពលរដ្ឋ ប្រទះឃើញក៏រាយការណ៍ទៅនគរបាល ភ្លាមនោះកម្លាំងប៉ុស្តិ៍កាកាប២ សហការជាមួយកម្លាំងខណ្ឌបានចុះបង្ក្រាបជាក់ស្តែងទាន់ពេលវេលា។
កម្លាំងនគរបាល បានធ្វើការឃាត់ខ្លួនជនសង្ស័យចំនួន០៣នាក់ ដែលស្ថិតក្នុងការសង្ស័យនៅឡើយ និងម៉ូតូដែលជនសង្ស័យជិះម៉ាកហុងដាឌ្រីម សេរីឆ្នាំ២០១៤ ពាក់ស្លាកលេខភ្នំពេញ1CW-5779 មួយគ្រឿង, ម៉ូតូម៉ាក Zoomer-X ពណ៌សលាយលឿង ពាក់ស្លាកលេខ ភ្នំពេញ1GG-7230។
ដោយឡែក ម៉ូតូដែលជនសង្ស័យលួចបានហើយ យកមកលាក់ទុកក្នុងគុម្ពព្រៃ មួយគ្រឿងម៉ាកហុងដាឌ្រីម សេរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ1BZ-5958។
ក្រោយប្រតិបត្ដិការ ជនសង្ស័យទាំង០៣នាក់ខាងលើ រួមជាមួយវត្ថុតាងត្រូវបានបញ្ជូនទៅផ្នែកជំនាញ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីបន្ដការសួរនាំ និងចាត់ការបន្ដតាមនីតិវិធី ៕
ខ្មែរអច្ឆរិយ: