ព័ត៌មានពីខេត្តរតនគិរី – ក្រុងបានលុង
ចេញផ្សាយថ្ងៃសុក្រ ០៦កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃ០៤ខែតុលា ឆ្នាំ ២០១៩!
ករណីឃាតកម្មគិតទុកជាមុនបាញ់ប្រហារនឹងអាវុធខ្លីបានធ្វើឲ្យផ្អើលទាំងព្រឹកនៅក្នុងហាងកាហ្វេវៀតណាមមួយកន្លែង ស្ថិតក្នុងសង្កាត់បឹងកន្សែង ក្រុងបានលុង ខេត្តរតនគិរី កើតមានឡើងកាលពីវេលាម៉ោង៩និង២០នាទី ថ្ងៃទី០៣ ខែតុលាឆ្នាំ២០១៩ ដែលបានធ្វើឱ្យមានការភ្ញាក់ផ្អើលនោះ រំលងក្រោយពេលកើតហេតុជាងមួយម៉ោងត្រូវបានសមត្ថកិច្ចជំនាញព្រហ្មទណ្ឌសហការជាមួយកម្លាំងអធិការក្រុងបានលុង ធ្វើការឃាត់ខ្លួនជនសង្ស័យបានភ្លាមនាំខ្លួនមកស្នងការដ្ឋាននគរបាលខេត្តដើម្បីសាកសួរស្ដាប់ចម្លើយ ក្រោយពេលជនសង្ស័យធ្វើសកម្មភាពសម្លាប់ជនរងគ្រោះ (ផន ទុំ) រួចហើយបើករថយន្តមកអង្គុយផឹកស្រានៅរមនីយដ្ឋានបឹងយក្សឡោម ជនសង្ស័យឃាត់ខ្លួននោះមានឈ្មោះ នួន មករា (ហៅក្រឹម) ភេទប្រុស អាយុ៣១ឆ្នាំ ជនជាតិខ្មែរ មុខរបរជាមន្ដ្រីនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តរតនគិរី រស់នៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។
បន្ទាប់ពីការឃាត់ខ្លួនជនសង្ស័យបានសារភាពថា មូលហេតុដែលឈានដល់ការបាញ់សម្លាប់នេះ ដោយសារតែជនរងគ្រោះឈ្មោះ ផន ទុំ មានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី រូបនេះបានទំនាក់ទំនងស្នេហាត្រីកោណជាមួយប្រពន្ធរបស់គេដែលមិនទាន់លែងលះគ្នាដាច់ស្រេចផងមករស់នៅជាមួយគ្នាយកមកធ្វើបាប ព្រមទាំងបានគំរាមប្រមាថមកលើរូបគេថែមទៀតផងដែលធ្វើឲ្យគេខឹងទប់កំហឹងមិនបាននោះ។
ចំណែកជនរងគ្រោះស្លាប់ក្នុងថ្លុកឈាមនោះមានឈ្មោះ ផន ទុំ អាយុ៣១ឆ្នាំ មុខរបរនគបាលមានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី ការបាញ់ប្រហារនេះនៅក្នុងខណ:ពេលជនរងគ្រោះមកកំពុងអង្គុយផឹកកាហ្វេស្រាប់តែជនដៃដល់ជិ:រថយន្តម៉ាកនីសាន់ពណ៌សពាក់ស្លាកលេខ២N-៥០១១ មកឈប់នៅមុខហាងរួចចុះដើរសំដៅមករកជនរងគ្រោះតែម្ដងរួចដកកាំភ្លើងខ្លីបាញ់មកលើជនរងគ្រោះបណ្ដាលឲ្យជនរងគ្រោះដួលធ្លាក់ទៅលើកៅអីប្រកាច់ស្លាប់ក្នុងថ្លុកឈាមតែម្ដង ក្រោយកើតហេតុជនដៃដល់បានដើរឡើងជិ:រថយន្តបើក ចេញទៅបាត់។
ក្រោយពីការឃាត់ខ្លួនសាកសួរស្ដាប់ចម្លើយរួចម
កសមត្ថកិច្ចជំនាញបានដាក់ការសន្និដ្ឋានថារឿងនេះជាករណីចេញពីភ្លើងប្រច័ណ្ឌ និងគំនុំក្នុងគ្រួសារ
បច្ចុប្បន្នសមត្ថកិច្ចកំពុងធ្វើការឃាត់ខ្លួនជនសង្ស័យនិងវត្ថុតាងនៅស្នងការដ្ឋាននគរបាលខេត្តដើម្បីកសាងសំណុំរឿងបំពេញបែបបទតាមនីតិវិធីរួចបញ្ជូនទៅសាលាដំបូងខេត្តចាត់ការបន្តតាមច្បាប់។
នេះហើយជាលទ្ធផលចុងក្រោយដែលទទួលបានសំរាប់អ្នកទាំងពីរគឺអ្នកដែលឈ្នះដេកគុគរីឯអ្នកចាញ់ស្លាប់ខ្លួនដោយសារខ្វះការពិចារណាគិតខ្លីសុទ្ធតែអ្នកច្បាប់- ចឹងតើបានច្បាប់ស្ដីពីការប្រើប្រាស់អាវុធជាតិផ្ទុះបានចែងថាអ្នកដែលមានសិទ្ធប្រើប្រាស់អាវុធត្រូវមានតួនាទីឋានន្នរស័ក្តកំរិតណា?ហេតុអីអនុវត្តន៍មិនបានច្បាប់នេះជាក់ស្ដែងដូចករណីនេះតើអ្នកណា?ជាអ្នកទទួលខុសត្រូវបញ្ហានេះគួរតែថ្នាក់លើអង្គភាពមានវិធានការឲ្យបានក្ដៅគគុកនិងមានប្រសិទ្ធិភាពផងដើម្បីបញ្ចៀសបញ្ហានេះ។
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net )
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨