ព័ត៌មានពីខេត្តមណ្ឌលគិរី
ចេញផ្សាយថ្ងៃច័ន្ទ១០រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៣ខែកញ្ញា ឆ្នាំ ២០១៩!
យោងតាមប្រភពព័ត៌មានដែលសារព័ត៌មាននិងគេហទំព័រខ្មែរអច្ឆរិយ:ទទួលបានកាលពីល្ងាចថ្ងៃទី២២ កញ្ញា២០១៩ លោក តែ គឹមសាន ប្រធានសមាគមរ៉ែមាសចុងផ្លាស់ត្រូវបានសាលាដំបូងខេត្តមណ្ឌលគិរី បញ្ជូនខ្លួនទៅពន្ធនាគារហើយ។
សូមបញ្ជាក់ថាកាលពីថ្ងៃទី២០ ខែកញ្ញា ឆ្នាំ២០១៩ នៅក្នុងប្រតិបត្តិការចុះបង្ក្រាបបទល្មើសធនធានធម្មជាតិព្រៃឈើរបស់គណៈកម្មការជាតិ និងថ្នាក់ខេត្តមណ្ឌលគិរី បានបន្តបេសកកម្ម របស់ខ្លួនចុះស្រាវជ្រាវលើបទល្មើសផ្សេងៗ រួមមានព្រៃឈើ និងរ៉ែមាសផងដែរ ជាលទ្ធផលសមត្ថកិច្ចចំរុះបានធ្វើការឃាត់ខ្លួនលោក តែ គឹមសាន ប្រធានសហគមន៍រ៉ែមាសចុងផ្លាស់ សង្ស័យជាប់ពាក់ព័ន្ធបទល្មើសមួយចំនួនដែលខុស ច្បាប់។
សមត្ថកិច្ចចំរុះ បានឃាត់ខ្លួនលោក តែ គឹមសាន មានកម្លាំងកងរាជអាវុធហត្ថខេត្ត សហការជាមួយកងកម្លាំងជំនាញជាច្រើនដឹកនាំដោយ ចឹង សុចន្ថា អភិបាលរងខេត្តមណ្ឌលគិរី កាលពីល្ងាចថ្ងៃទី២០ ខែកញ្ញា ឆ្នាំ២០១៩ ក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី។
ឧត្ដមសេនីយ៍ត្រី ហែម បូណារ៉ែល មេបញ្ជាការអាវុធហត្ថខេត្តមណ្ឌលគិរី បានបញ្ជាក់ប្រាប់បណ្ដាញព័ត៌មាននៅព្រឹកថ្ងៃទី២១ ខែកញ្ញា ឆ្នាំ២០១៩នេះថា ពិតជាមានការឃាត់ខ្លួនជនសង្ស័យនេះមែន ដោយសារមន្ត្រីជំនាញចំរុះខេត្ត បានរកឃើញការស្តុកលាក់ទុកឈើជាច្រើនម៉ែត្រគូបជាវត្ថុតាងនៅក្នុងរោងអាជីវកម្មរ៉ែមាសរបស់គាត់ហើយជនសង្ស័យត្រូវបានសមត្ថកិច្ចបញ្ជូនទៅកាន់ទីបញ្ជាការដ្ឋានអាវុធហត្ថខេត្តដើម្បីបន្តនីតិវិធីតាមផ្លូវច្បាប់។
លោកចឹង សុចន្ថា អភិបាលរងខេត្តមណ្ឌលគិរី ទទួលបន្ទុកប្រធានគណៈកម្មការបង្ក្រាបធនធានធម្មជាតិខេត្ត បានប្រាប់ផងដែរថា ការឃាត់ខ្លួនជនសង្ស័យរូបនេះ ក្រោយកម្លាំងជំនាញស្រាវជ្រាវរកឃើញបុគ្គលនេះ មានការស្តុកទុកឈើគ្រប់ប្រភេទជាច្រើនម៉ែត្រគូប។
លោកស្វាយ សំអ៊ាង អភិបាលខេត្តមណ្ឌលគិរី បានថ្លែងប្រាប់បណ្ដាញព័ត៌មាន ថា ករណីនេះទុកឲ្យខាងមន្ត្រីអនុវត្តច្បាប់ចាត់ការឲ្យបានតឹងរ៉ឹងបំផុតរាល់បទល្មើស ឬបុគ្គលណាដែលបានប្រព្រឹត្តផ្ទុយនិងច្បាប់មិនថាអ្នកក្រ ឬអ្នកមានលុយនោះទេ អ្នកប្រព្រឹត្តខុសត្រូវទទួលទោស មិនមែនអ្នកមានប្រាក់ ឬអាងនេះ អាងនោះ រួចខ្លួននោះទេ ដើម្បីស្របទៅតាមប្រទេសមានច្បាប់គ្រួសារមានវិន័យ។
ជាចុងក្រោយនេះមហាជនរង់ចាំមើលថាតើវាសនាលោកតែ គឹមសាន ប្រធានសហគមន៍រ៉ែមាសចុងផ្លាស់ជាប់ពាក់ព័ន្ធបទល្មើសមួយចំនួនដែលខុសច្បាប់ជាប់ពន្ធនាគារបានរយះពេលប៉ុន្មានរង់ចាំតាមដានទាំងអស់គ្នា។
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net )
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨