ព័ត៌មានពីភ្នំពេញ
ចេញផ្សាយថ្ងៃពុធ៦កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៤ ខែកញ្ញា ឆ្នាំ ២០១៩!
ឯកឧត្ដម ឧត្តមសេនីយ៍ឯក ស ថេត នៅថ្ងៃពុធ ៦កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៤ ខែកញ្ញា ឆ្នាំ២០១៩ នេះចំពោះករណីដែលមន្ត្រីក្រោមឱវាទបានប្រើពាក្យសម្ដីប្រចាកផ្ទុយពីក្រមសីលធម៌របស់កងកម្លាំងពេលកំពុងបំពេញភារកិច្ចតួនាទីការងារកាលពីយប់ថ្ងៃទី២ ខែកញ្ញា ឆ្នាំ២០១៩នេះលោកបានពិនិត្យហើយ និងបានកោះហៅលោកវរសេនីយ៍ទោ ចាន់ ពៅ ជាអធិការរងខណ្ឌឫស្សីកែវ ដើម្បីដាក់ពិន័យខាងកងកម្លាំង និងពិនិត្យមើលបើឃើញថាមានកំហុសពិតមែននោះនិងអាចប្រឈមផ្អាកការងារមួយរយៈ។
ចំពោះលោកវរសេនីយ៍ទោ ចាន់ ពៅ អធិការរងខណ្ឌឫស្សីកែវដែលបានផ្ញើសារជាសម្លេងគំរាមថានឹងសម្លាប់នាយផ្នែកចរាចរណ៍ខណ្ឌឫស្សីកែវដោយសារតែរឿងមិនព្រមដោះលែងបក្ខពួករបស់ខ្លួនដែលស្រវឹងហើយត្រូវចាប់វាស់ជាតិអាល់កុលកាលពីយប់ថ្ងៃទី២ ខែកញ្ញា ឆ្នាំ២០១៩ កម្លាំងអធិការដ្ឋាននគរបាលខណ្ឌឫស្សីកែវដែលបានដាក់តាមគោលដៅត្រួតពិនិត្យ អាវុធជាតិផ្ទុះ និងជាតិស្រវឹងនៅតាមបណ្ដោយផ្លូវជាតិលេខ៥ ខាងមុខវិទ្យាល័យឫស្សីកែវ ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ រីឯចំណែកជនរងគ្រោះដែលរងការគំរាមថាសម្លាប់នោះគឺលោកអនុសេនីយ៍ឯក លី រ៉ូហ្សាត មានតួនាទីជានាយផ្នែកចរាចរណ៍ខណ្ឌឫស្សីកែវ។
ករណីខាងលើសូមជម្រាបថា កាលពីយប់ថ្ងៃទី២ ខែកញ្ញា ឆ្នាំ២០១៩ កម្លាំងអធិការដ្ឋាននគរបាល ខណ្ឌឫស្សីកែវ បានដាក់គោលដៅត្រួតពិនិត្យអាវុធជាតិផ្ទុះ និងជាតិស្រវឹងនៅតាមបណ្ដោយផ្លូវជាតិលេខ៥ មុខវិទ្យាល័យឫស្សីកែវ ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ហើយបន្ទាប់ពីអនុវត្ដន៍ការងារបានប្រហែលជាកន្លះម៉ោងកម្លាំងសមត្ថកិច្ចខណ្ឌឫស្សីកែវ បានពិនិត្យឃើញអ្នកមានជាតិស្រវឹង លើសកម្រិតចំនួន ៣នាក់ ដែលជាអ្នកបើកម៉ូតូក្នុងនោះមានម្នាក់មិនបានសហការផ្លុំ។កម្លាំងសមត្ថកិច្ច ក៏បានបញ្ជូនទៅស្នងការដ្ឋានដើម្បីចាត់ការតាមផ្លូវច្បាប់។
ពេលនោះស្រាប់តែលោកវរសេនីយ៍ទោ ចាន់ ពៅ អធិការរងរូបនោះបានទូរស័ព្ទមកលោកនាយផ្នែកចរាចរណ៍ដោយបញ្ជាអោយដោះលែងមនុស្សម្នាក់ដែលមានជាតិស្រវឹងលើសកំរិតក៏ប៉ុន្ដែលោកនាយផ្នែកបានប្រាប់ទៅវិញថា គាត់គ្មានសិទ្ធិដោះលែងទេគាត់គ្រាន់តែជានាយផ្នែកហើយក៏ប្រាប់ឲ្យលោកអធិការរងរូបនោះទូរស័ព្ទទៅលោកអធិការងទទួលផ្នែកចរាចរណ៍ដែលកំពុងដឹកនាំកម្លាំងទៅ ប្រាប់ហើយស្រាប់តែលោកអធិការរងរូបនោះក៏បានបិទទូរស័ព្ទទៅ។ មួយសន្ទុះក្រោយមកក៏ឃើញបុរសម្នាក់ដែលមានជាតិស្រវឹងលើសម្នាក់នោះត្រូវបានដោះលែង។
ក្រោយមកលោកអធិការរងរូបនោះបានផ្ញើសារសម្លេងគំរាមថាសម្លាប់មកលើរូបលោកនាយផ្នែក ធ្វើអោយលោកនាយផ្នែកមានការភិតភ័យយ៉ាងខ្លាំង ព្រោះអីធ្លាប់ដឹងហើយថាកន្លងមកលោកអធិការរងរូបនេះធ្លាប់បាញ់គំរាមមន្ត្រីប៉ូលិសរួចមកហើយគ្មាននរណាហ៊ានធ្វើអ្វីលោកអធិការរងរូបនេះឡើយ ធ្វើអោយលោកអធិការរងរូបនេះឡើងចាងគំរាមសម្លាប់គេឯងជាបន្តបន្ទាប់។
លោកនាយផ្នែកដែលជាជនរងគ្រោះសំណូមពរអោយថ្នាក់ដឹកនាំជួយរកយុត្តិធម៌អោយរូបគាត់ផង ព្រោះអធិការរងទំនើងរូបនេះគំរាមសម្លាប់រូបគាត់ អោយស្លាប់ចោលប្រពន្ធចោលកូន។ហើយខណ:នេះដែរមជ្ឈដ្ឋានទូទៅកំពុងរង់ចាំមើលចំណាត់ការថ្នាក់លើមកលើលោកវរសេនីយ៍ទោ ចាន់ ពៅ អធិការរងខណ្ឌឫស្សីកែវទទួលផ្នែកសេនាធិការ ដែលបានគំរាមសម្លាប់មកលើលោកអនុសេនីយ៍ឯកលី រ៉ូហ្សាត ជានាយផ្នែកចរាចរណ៍ខណ្ឌឬស្សីកែវ៕
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net )
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨
