ព័ត៌មានពីខេត្តបន្ទាយមានជ័យ- ស្រុកអូរជ្រៅ
ចេញផ្សាព័ត៌មានថ្ងៃអាទិត្យ១២រោច ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី២៨ ខែកក្កដាឆ្នាំ២០១៩!
នៅថ្ងៃអាទិត្យ១២រោច ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី២៨ ខែកក្កដាឆ្នាំ២០១៩!លោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានអញ្ជើញជាអធិបតីភាពក្នុងពិធីបញ្ចុះបឋមសីលាសាងសង់អាគាររដ្ឋបាលមូលដ្ឋានកងរាជអាវុធហត្ថស្រុកអូរជ្រៅថ្មីចំនួន០១ខ្នងជាន់ផ្ទាល់ដី ។
ឧត្តមសេនីយ៍ត្រីបោន ប៊ិន បានឲ្យដឹងថា អាគារនេះសាងសង់ឡើងអំពីថ្មដំបូលប្រក់ក្បឿងស្រកាលិញ ដែលមានទំហំ០៧ម៉ែត្រ x ២២ម៉ែត្រ កំពស់ ០៥ម៉ែត្រនៅលើផ្ទៃដីទំហំ៧០ម៉ែត្រ x ៣០ម៉ែត្រ ។ ឧត្តមសេនីយ៍ត្រីបានបន្តទៀតថា ការសាងសង់អាគារមូលដ្ឋានកងរាជអាវុធហត្ថស្រុកអូរជ្រៅគឺយោងតាមគោលការណ៍ និងសេចក្តីណែនាំពីសំណាក់ នាយឧត្តមសេនីយ៍ សៅ សុខា អគ្គមេបញ្ជាការង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ឲ្យគ្រប់បណ្តាទីបញ្ជាការកងរាជអាវុធហត្ថ រាជធានី-ខេត្ត មូលដ្ឋានស្រុក-ក្រុង និងស្នាក់ការសន្តិសុខ សាងសង់ទីជម្រកសម្រាប់កងកម្លាំង និងកន្លែងធ្វើការ ស្នាក់នៅ ផ្ទះបាយ ឃ្លាំងដាក់សម្ភារៈនិងសាលប្រជុំប្រកបទៅតាមស្តង់ដារនិងគុណភាពដែលជាតម្រូវការចាំបាច់ទៅតាមរបៀបរបបការងារផងដែរ។
ឧត្តមសេនីយ៍ត្រីបានបន្ថែមថា ក្រោយពីការសាងសង់អាគាររដ្ឋបាលចប់ជាស្ថាពរ លោកនឹងបន្តសាងសង់អាគារស្នាក់នៅសម្រាប់កងកម្លាំង ផ្ទះបាយ ឃ្លាំងដាក់សម្ភារៈ និងបន្ទប់អនាម័យបន្ថែមទៀត។ លោកវរសេនីយ៍ត្រី ជា ពិសី មេបញ្ជាការមូលដ្ឋានកងរាជអាវុធហត្ថស្រុកអូរជ្រៅ បានបញ្ជាក់ឲ្យដឹងថា ការសាងសង់អាគាររដ្ឋបាលរបស់មូលដ្ឋានកងរាជអាវុធហត្ថស្រុកអូរជ្រៅ គឺជាគំនិតផ្តួចផ្តើម និងឧបត្ថម្ភដោយលោក ឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងដោយមានការចូលរួមពីសំណាក់អាជីវករ និងសប្បុរសជនមួយចំនួននៅមូលដ្ឋានស្រុកអូរជ្រៅផងដែរ ។
@- ធ្វើសេចក្ដីរាយការណ៍ដោយ
អង្គភាពសារព័ត៌មាន និងគេហទំព័រ ” ខ្មែរអច្ឆរិយ:”
(http://www.khpress.net )
@- ការិយាល័យនិពន្ធនាយក
០១២:៥០៥៣៤៤/០៩៣:៤៤៥៥៥៨