ព័ត៌មានពីខេត្តស្ទឹងត្រែង ៖
ចេញផ្សាព័ត៌មានថ្ងៃសុក្រ១០រោច ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី២៦ ខែកក្កដាឆ្នាំ២០១៩!
មន្ដ្រីយោធា២នាក់ ដែលធ្លាក់ចូលទឹកគួចខ្លាំងយកទៅបាត់នៅស្រុកសៀមប៉ាង ខេត្តស្ទឹងត្រែងនោះ ត្រូវសមត្ថកិច្ចរកឃើញទាំងពីរនាក់ហើយ នៅព្រឹកថ្ងៃទី២៦ ខែកក្កដា ឆ្នាំ២០១៩នេះ ដែលអណ្ដែតទៅចម្ងាយប្រមាណ១០គីឡូម៉ែត្រ ពីកន្លែងកើតហេតុ ពោលនៅចំណុចខាងក្រោមកោះទន្សាយ ស្រុកសៀមប៉ាង។
លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បានប្រាប់បណ្ដាញព័ត៌មានឲ្យដឹងនៅមុននេះបន្ដិចថា សពមន្ដ្រីយោធាម្នាក់ ត្រូវបានប្រទះឃើញនៅវេលាម៉ោង០៧និង៤១នាទីព្រឹកនេះ ដែលមានឈ្មោះ សុខ សុវណ្ណឌី ជាអ្នកជិះពីក្រោយ និងមានជំងឺគ្រុនចាញ់ ហើយរហូតមកដល់ម៉ោងជាង៨ព្រឹកនេះ សពម្នាក់ទៀតក៏ត្រូវបានសមត្ថកិច្ចរកឃើញដូចគ្នា ដែលមានចម្ងាយ៥០០ម៉ែត្រពីសពដែលរកឃើញដំបូង។
លោកឧត្តមសេនីយ៍ត្រី អៀង វ៉ាន់ឌី បានបន្ថែមថា សពជនរងគ្រោះដែលរកឃើញដំបូង ត្រូវបានយកឡើងលើគោកហើយ ដោយមានក្រុមគ្រួសារ និងសមត្ថកិច្ចជំនាញកំពុងធ្វើការពិនិត្យ។ ដោយឡែក សពជនរងគ្រោះទី២ ដែលជាអ្នកឌុបនោះ មិនទាន់យកឡើងលើគោកបាននៅឡើយទេ ពោលតម្រូវឲ្យដាក់ទូកអូសសពចេញមកសិន ដោយសារស្ថានភាពទីតាំងមានការលំបាក។
ជាមួយគ្នានេះ លោកឧត្តមសេនីយ៍ទោ ម៉ៅ តារា ស្នងការនគរបាលខេត្តស្ទឹងត្រែង ក៏បានបញ្ជាក់ដូចគ្នាផងដែរថា សពមន្ដ្រីយោធាទាំងពីរនាក់ត្រូវបានរកឃើញ ហើយត្រូវបានសមត្ថកិច្ច និងប្រជាពលរដ្ឋសហការគ្នា ទាញឡើងយកមកលើគោក ដើម្បី ធ្វើការពិនិត្យ និងបញ្ជូនទៅធ្វើបុណ្យតាមប្រពៃណី។
សូមជម្រាបថា មន្ត្រីយោធាខ្មែរ២រូប ដែលឈរជើងការពារទឹកដីនៅតំបន់ព្រំដែនអូរអាឡៃ ក្នុងស្រុកសៀមបាង ខេត្តស្ទឹងត្រែង កន្លែងដែលទ័ពឡាវធ្លាប់ចូលកាន់កាប់ ត្រូវបានទឹកហូរកួចយកទៅបាត់ពេលពួកគេកំពុងធ្វើដំណើរ ទៅព្យាបាលជំងឺគ្រុនចាញ់កាលពីថ្ងៃទី២៤ ខែកក្កដា ឆ្នាំ២០១៩កន្លងទៅនេះ។យុទ្ធជនទាំងពីររូបដែលជួបគ្រោះអកុសលនេះ មានឈ្មោះ សុខ សុវណ្ណឌី និងឈ្មោះ ភី នីដាលិ។ ពួកគេបម្រើការងារក្នុងអង្គភាព កងអនុសេនាធំទី៣ វរសេនាតូច កាំភ្លើងធំ បញ្ជាការស្រាលយោធភូមិភាគទី១ ប្រចាំការនៅភូមិសាស្ត្រអូរអាឡៃ។ យុទ្ធជនទាំងពីររូបជាកងទ័ព ដែលទើបនឹងប្រឡងជាប់ចូលបម្រើកងទ័ព កាលពីឆ្នាំ២០១៨។
យោងតាមមន្ដ្រីយោធា នៃយោធភូមិភាគទី១ ជនរងគ្រោះឈ្មោះ ភីនី ដាលិ មានតួនាទីជា នាយក្រុមស៊ើបការណ៍ មានស្រុកកំណើតនៅផ្សារតានី ឃុំភ្នំកុង ស្រុកអង្គរជ័យ ខេត្តកំពត និងម្នាក់ទៀតឈ្មោះ សុខ សុវណ្ណឌី មានស្រុកកំណើតនៅភូមិកោះតាកូវ ឃុំឫស្សី ស្រុកកំពង់ត្រាច ខេត្តកំពត គ្រាដែលព័ត៌មាន នៃគ្រោះអកុសលរបស់យុទ្ធជនខ្មែរទាំងពីររូបកំពុងទទួលបានការអានិតអាសូរខ្លាំងពីមហាជន។
ការិយានិពន្ធនាយក:០១២:៥០៥៣៤៤/០៩៣:៤៤៥៥៥៨
ធ្វើសេចក្ដីរាយការណ៍ដោយអង្គភាពសារព័ត៌មាន និងគេហទំព័រ ” ខ្មែរអច្ឆរិយ: ” http://www.khpress.net