ព័ត៌មានពីខេត្តព្រះសីហនុ
ចេញផ្សាព័ត៌មានថ្ងៃពុធ៨រោច ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី២៤ ខែកក្កដាឆ្នាំ២០១៩!
តុលាការខេត្តព្រះសីហនុ បានសម្រេចសោះលែង អ្នកសារព័ត៌មានចំនួន២រូប ដែលពាក់ព័ន្ធនឹងបញ្ហាដីធ្លី នៅខេត្តមាត់សមុទ្រនេះ ឱ្យនៅក្រៅឃុំជាបណ្តោះអាសន្នហើយ នៅល្ងាចថ្ងៃទី២៣ ខែកក្កដា ឆ្នាំ២០១៩នេះខណៈពលរដ្ឋ៥នាក់ដែលពាក់ព័ន្ធនឹងករណីនេះត្រូវតុលាការឃុំខ្លួនជាបណ្តោះអាសន្ន
នេះបើតាមមេបញ្ជាការអាវុធហត្ថ ខេត្តព្រះសីហនុ ឧត្តមសេនីយ៍ត្រី ហេង ប៊ុនទី ដែលបានបញ្ជាក់ប្រាប់អង្គភាពព័ត៌មាននៅមុននេះបន្តិចលោក ហ៊ុន សុខា ប្រធានក្លឹបអ្នកកាសែតឯករាជ្យ និងលោក កែវ រតនា ចាងហ្វាងកាសែត TN និងពលរដ្ឋ៥នាក់ខាងលើនេះ ត្រូវបានកម្លាំងអាវុធហត្ថខេត្តព្រះសីហនុ ឃាត់ខ្លួននារសៀលថ្ងៃទី១៩ ខែកក្កដា ឆ្នាំ២០១៩ ពាក់ព័ន្ធទៅនឹងបទល្មើសហិង្សាលើអ្នកកាន់កាប់អចលនវត្ថុ ដោយសុច្ចរិត នៅក្នុងខេត្តព្រះសីហនុ។
តុលាការបានដាក់លោក ហ៊ុន សុខា និង លោក កែវ រតនា ឱ្យស្ថិតនៅក្រោមការត្រួតពិនិត្យតាមផ្លូវតុលាការ។
ចំណែកពលរដ្ឋទាំង៥នាក់ ត្រូវបានឃុំខ្លួនក្នុងនោះរួមមាន:
– ទី១ ស្រី្តឈ្មោះ ហង្ស ចិន្ដា អាយុ៥២ឆ្នាំ មុខរបរមេផ្ទះ រស់នៅក្រុម៣ ភូមិ១ សង្កាត់៣ ក្រុងព្រះសីហនុ។
– ទី២ ស្ត្រីឈ្មោះ ហង្ស សុភា អាយុ៤៩ឆ្នាំ មុខរបរមេផ្ទះ រស់នៅក្រុម៣ ភូមិ១ សង្កាត់៣ ក្រុងព្រះសីហនុ។
– ទី៣ ស្ត្រីឈ្មោះ សែន លក្ខិណា អាយុ៣២ឆ្នាំ មុខរបរមេផ្ទះ រស់នៅក្រុម៣ ភូមិ១ សង្កាត់៣ ក្រុងព្រះសីហនុ។
– ទី៤ ស្ត្រីឈ្មោះ ប៉ែន ស៊ឺណា អាយុ៥៧ឆ្នាំ មុខរបរមេផ្ទះ រស់នៅក្រុម៣ ភូមិ១ សង្កាត់៣ ក្រុងព្រះសីហនុ។
– ទី៥ លោក ហេង រយ៉ូង អាយុ៥០ឆ្នាំ មុខរបរប្រជាការពារ រស់នៅក្រុម៣ ភូមិ១ សង្កាត់៣ ក្រុងព្រះសីហនុ។
ការិយានិពន្ធនាយក:០១២:៥០៥៣៤៤/០៩៣:៤៤៥៥៥៨
ធ្វើសេចក្ដីរាយការណ៍ដោយអង្គភាពសារព័ត៌មាន និងគេហទំព័រ ” ខ្មែរអច្ឆរិយ: ” http://www.khpress.net
