ព័ត៌មានពីខេត្តមណ្ឌលគិរី
ចេញផ្សាយថ្ងៃសុក្រ១១កើត ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី១២ ខែកក្កដាឆ្នាំ២០១៩!
នៅរសៀលថ្ងៃទី ១១ កក្កដា ២០១៩ លោក សឹង សំអុល និងអ្នកពាក់ព័ន្ធដែលត្រូវបានឃាត់ខ្លួនសួរចម្លើយពីបទល្មើសព្រៃឈើតាំងពីថ្ងៃទី ០៩ កក្កដា នៅបញ្ជាការដ្ឋានកងរាជអាវុធហត្ថខេត្តមណ្ឌលគិរី ពីសំណាក់កម្លាំងជំនាញ គណៈកម្មការថ្នាក់ជាតិ ដេីម្បីទប់ស្កាត់ និងបង្ក្រាបបទល្មើសធនធានធម្មជាតិ ត្រូវបានបញ្ជូនទៅសាលាដំបូងខេត្តមណ្ឌលគិរី ប៉ុន្តែការសាកសួរនៅមិនទាន់បានបញ្ចប់នៅឡើយទេ គិតត្រឹមល្ងាចថ្ងៃដដែលនេះ ។
ព្រះរាជអាជ្ញារង និង ជាអ្នកនាំពាក្យសាលាដំបូងខេត្តមណ្ឌលគិរី លោក ម៉ម វ៉ាន់ដា បានឲ្យដឹងនៅល្ងាចថ្ងៃទី១១ ខែកក្កដាឆ្នាំ២០១៩នេះថា ក្នុងចំណោមមនុស្ស ៤នាក់ មាន៣នាក់ជាប់ពាក់ព័ន្ធត្រូវបញ្ជូនមកសាលាដំបូងខេត្ត ក្នុងនោះមាន លោក សុឹងសំអុល ម្នាក់ដែរ ។
លោកថា ការសាកសួរលោក សុឹង សំអុល និងមនុស្ស២នាក់ទៀតមិនទាន់បញ្ចប់នោះទេ រង់ចាំសួរបន្ត នៅថ្ងៃស្អែក (១២ កក្កដា) ចំណែកលោក សុឹង សំអុល និងអ្នកពាក់ព័ន្ធបានបញ្ជូនមកផ្ញើនៅបញ្ជាការដ្ឋានកងរាជអាវុធហត្ថខេត្ត ១យប់សិនដោយសារការសាកសួរស្ដាប់ចម្លើយមិនទាន់ចប់ ។
សូមរម្លឹកថា ករណីចុះប្រតិបត្តិការបង្ក្រាបបទល្មើសព្រៃឈើនៅខេត្តមណ្ឌលគិរី កម្លាំងគណៈកម្មការជាតិ ដេីម្បីទប់ស្កាត់ និង បង្ក្រាបបទល្មើសធនធានធម្មជាតិ ដែលដឹកនាំដោយ លោកឧត្តមសេនីយ៍ឯក ហុង វិណុល ក្រោមការបញ្ជាផ្ទាល់ ពីនាយឧត្តមសេនីយ៍ សៅ សុខា បានចុះបង្ក្រាបទ្រង់ទ្រាយធំ កាលពីរសៀលថ្ងៃទី ០៩ ខែកក្កដា ឆ្នាំ២០១៩នេះ ។
ការបង្ក្រាបនេះដោយឃាត់ខ្លួនបានមនុស្ស ចំនួន៤នាក់ ក្នុងនោះមានមេការក្រុមហ៊ុន ២នាក់ អ្នកបើករថយន្តម្នាក់ ប្រធានក្រុមហ៊ុនម៉ាស្ទ័រខេសាន់ម្នាក់ ឈ្មោះឧកញ៉ា ស៊ឹង សំអុល និងដកហូតបានរថយន្ដជាង៤០គ្រឿង និងបំផ្លាញរថយន្ត ៤គ្រឿង ចោលនៅក្នុងព្រៃតែម្ដង កាលពីថ្ងៃទី ១០កក្កដា ចំណែករថយន្តល្មើសជាង ៤០គ្រឿងទៀត ដែលត្រូវបានបង្ក្រាប និងរឹបអូសផងដែរ រង់ចាំកាត់ចោល និងបំផ្លាញចោលនៅពេលក្រោយ ៕
ធ្វើសេចក្ដីរាយការណ៍ដោយអង្គភាពសារព័ត៌មាន និងគេហទំព័រ(ខ្មែរអច្ឆរិយ:) http://www.khpress.net