សេចក្តីរាយការណ៏បានឲ្យដឹងថា មានករណីផ្ទុះអាវុធជាច្រើនគ្រាប់ គ្រាដែលមន្ត្រីឧទ្យានុរក្សកំពុងប្រតិបត្តិការបង្ក្រាបការដឹកជញ្ជួនឈើខុសច្បាប់ ក្នុងដែនជម្រកការពារសត្វព្រៃកែវសីមា កាលពីម៉ោង៤ទៀបភ្លឺ ថ្ងៃទី១០ សីហា ២០១៨ នៅចំនុចទឹកខួប លើបណ្តោយផ្លូវជាតិលេខ៧៦ ភូមិអូរអាម ឃុំស្រែខ្ទុម ស្រុកកែវសីមា។
លោក កែវ សុភគ៌ ប្រធានមន្ទីរបរិស្ថានខេត្តបានឲ្យដឹងថា វេលាម៉ោង១២ និង៤៧នាទីយប់ចូលថ្ងៃទី១០ខែសីហា ឆ្នាំ២០១៨ ជំនាញដែនជម្រកសត្វព្រៃកែវសីមាបានចុះប្រតិបត្តិការនៅចំណុចទីតាំងកិនថ្ម បានជួបម៉ូតូដឹកឈើចំនួន០១គ្រឿងដឹកឈើកកោះឡាំងជ្រុងចំនួន៤ដុំ និងឈើនៅក្បែម៉ូតូចំនួនប្រាំមួយដុំទៀត និងបានឃាត់ចាប់ម៉ូតូម៉ាកវេវ ដែលដឹកជញ្ជូនស្បៀងទៅឲ្យក្រុមអារឈើស្រឡៅឡាំងជ្រុងនៅក្នុងព្រៃ។
លោកប្រធានមន្ទីរបន្តថា ជំនាញក៏បានរឹបអូសវត្ថុតាងទាំងអស់មករក្សាទុកនៅស្នាក់ការកែវសីមា លុះដឹកមកដល់ចំណុចទឹកខួប ស្ថិតនៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ក៏ត្រូវបានជនសង្ស័យមួយក្រុម បានយករថយន្តចំនួនពីរគ្រឿងម៉ាកកាមរីហើមពណ៏ស្លែ និងពណ៏ខ្មៅ មកបិតរាំងផ្លូវឡានដឹកវត្ថុតាង មិនឲ្យទៅមុខ។ភ្លាមៗនោះក៏មានរថយន្តមួយគ្រឿងទៀត ម៉ាកកាមរីឆ្លាមពណ៏ខ្មៅ ដឹកមនុស្សពេញប្រមាណ១០នាក់ទៀត មករារាំងរំដោះយកវត្ថុតាង ដែលសង្ស័យថាមានមេក្លោងឈ្មោះយាយក្រហម ជាអ្នកបើកបរ។
លោក ឌិន ប៊ុនធឿន នាយកដែនជម្រកសត្វព្រៃកែវសីមាឲ្យដឹងថា ស្ថិតនៅក្នុងស្ថានភាពប្រឈមនេះ លោកបានបញ្ជាឲ្យមន្ត្រីនគរបាលសហការជាមួយដែនជម្រក និងមន្ត្រីជំនាញបរិស្ថានបាញ់បំបែកកង់ឡានអស់ចំនួនប្រាំគ្រាប់។ លោកបន្តថា ដើម្បីការពារសុវត្ថិភាព លោកបានសុំកម្លាំងពីអធិការស្រុកឲ្យត្រៀម ចាំទៅជួយពេលដឹកវត្ថុតាងយកមករក្សាទុកនៅស្នាក់ការដែនជម្រក ដើម្បីចាត់ការតាមនិតិវិធី ។ ហើយក្រុមនេះតែងតែកាងឲ្យរថយន្ត និងម៉ូតូដឹកឈើជារៀងរាល់យប់ចេញពីតំបន់ដែនជម្រក។
លោក វ៉ាន់ ដានីន អធិការនគរបាលស្រុកកែវសីមាបានឲ្យដឹងថា អាវុធដែលបានបាញ់ម៉ាក AK៤៧ ប្រភេទស្វាយបត់ លេខ២៤៥៧ និងអាវុធមួយដើមទៀតម៉ាក K៥៩ លេខ៨៩៨៩៨៧ ។
លោក កែវ សុភគ៌ ប្រធានមន្ទីរបរិស្ថានខេត្តបានបញ្ជាក់ថា គិតត្រឹមម៉ោង១១ថ្ងៃទី១០ សីហា ២០១៨ កម្លាំងជំនាញនឹងកម្លាំងសហការកំពុងកសាងសំនុំរឿងបញ្ជូនទៅសាលាដំបូង នឹងរង់ចាំបញ្ជាពីលោកព្រះអាជ្ញារដើម្បីឃាត់ខ្លួនអ្នកពាក់ព័ន្ឋ ព្រោះមុខសញ្ញាត្រូវបានជំនាញកំណត់បានអស់ហើយ។
ទោះជាយ៉ាងណាលោកប្រធានមន្ទីរបានស្នើរដល់ប្រជាពលរដ្ឋដែលកំពុងអាស្រ័យផលនៅក្នុងតំបន់ដែនជម្រកសត្វព្រៃកែវសីមា សូមជៀសវាងពីការកាប់ឈើថ្មី ឬដឹកជញ្ជូនឈើខុសច្បាប់ចេញពីតំបន់ហាមឃាត់ នឹងត្រូវរាយការណ៏ជាបន្ទាន់ចំពោះសកម្មភាពទាំងឡាយណា ដែលប្រព្រឹត្តខុសច្បាប់ដ្បិតប្រជាពលរដ្ឋគឺជាភ្នែកច្រមុះរបស់សមត្ថកិច្ចជំនាញ៕