ព័ត៌មានពីខេត្តមណ្ឌលគិរី.ក្រុងសែនមនោរម្យ
ចេញផ្សាយថ្ងៃអាទិត្យ០៦រោច ខែជេស្ន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែមិថុនា ឆ្នាំ២០១៩!
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី អញ្ជើញជាអធិបតី ក្នុងពិធីប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋក្នុងផ្សារសែនមនោរម្យចំនួន២៧៧ប័ណ្ណ ដោយមានការចូលរួមពីសំណាក់លោកលោកស្រី ប្រធាន អនុប្រធានមន្ទីរអង្គភាពជុំវិញខេត្ត ដែលបានប្រព្រឹត្តទៅនៅផ្សារសែនមនោរម្យ ស្ថិតនៅក្រុងសែនមនោរម្យ នាព្រឹកថ្ងៃសៅរ៍ ៥រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២២ ខែមិថុនា ឆ្នាំ២០១៩។
លោក ម៉ៅ ចំរើន ប្រធានមន្ទីររៀបចំដែនដីនគររូបនីយកម្មសំណង់ និងសុរិយោដីខេត្តមណ្ឌលគិរីបានឲ្យអង្គភាពសារព័ត៌មាននិងគេហទំព័រ(ខ្មែរអច្ឆរិយៈ)យេីងដឹងថា ក្បាលដីដែលត្រូវចែកវិញ្ញាបនបត្រសម្គាល់ម្ចាស់អចលនវត្ថុ នៅក្នុងបរិវេណផ្សារសែនមនោរម្យ មានចំនួន ២៧៧ ប័ណ្ណ ក្នុងនោះរួមមាន÷
១- ប្រភេទប្រើប្រាស់ ដីលំនៅដ្ឋានចំនួន ២៧៥ ប័ណ្ណ និង ដីសាធារណៈចំនួន ០២ ប័ណ្ណ
២- ប្រភេទទ្រព្យរួមមាន ទ្រព្យរួមប្តីប្រពន្ធមានចំនួន ២០៩ ប័ណ្ណ ទ្រព្យខាងប្តី ចំនួន ០៣ប័ណ្ណ ទ្រព្យខាងប្រពន្ធ ចំនួន២១ប័ណ្ណ ទ្រព្យលីវ ៤១ ប័ណ្ណ ទ្រព្យអវិភាគចំនូន ០១ ប័ណ្ណ ទ្រព្យរដ្ឋ ០២ ប័ណ្ណ និង ទ្រព្យគ្មានទិន្នន័យចំនួន ១២ ប័ណ្ណ ។
ឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា ដោយមានការយកចិត្តទុកដាក់ពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើប្រទានកម្មជាកម្មសិទ្ធិដីធ្លីជូនប្រជាពលរដ្ឋបានកាន់កាប់ប្រើប្រាស់ធានាកម្មសិទ្ធិស្របច្បាប់ ដែលរស់នៅក្នុងបរិវេណផ្សារសែនមនោរម្យ ដែលរងគ្រោះដោយសារអគ្គីភ័យ ឆាបឆេះផ្សារ កាលពីថ្ងៃទី១០ ខែ កុម្ភៈ ឆ្នាំ២០១៨ កន្លងទៅ ដែលបង្ករអោយខូចខាតផ្ទះ សរុបចំនួន ២៧៩ខ្នងផ្ទះ ។
ឯកឧត្តម បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមចំណែកក្នុងការរៀបចំសាងសងផ្ទះសម្បែងក្នុងបរិវេណផ្សានេះ អោយមានរបៀបរៀបរយ ត្រូវគោរពទៅតាមកំណត់ច្បាប់នៃសាងសងសំណង់ទាំងនោះ ដើម្បីធានាបាននូវសុវត្ថិភាព សោភ័ណ្ឌភាព ក្នុងបរិវេណផ្សារទាំងមូល និង ត្រូវចូលរួមរក្សាអនាម័យ បរិស្ថាន សណ្តាប់ធ្នាប់សាធារណៈ ជាបញ្ហាសំខាន់ដែលយើងទាំងអស់គ្នា ត្រូវចូលរួអនុវត្តឲ្យបានល្អប្រសើរ ។
ទន្ទឹមនឹងនៅផងដែរ ឯកឧត្តម បានជំរុញដល់អភិបាលក្រុងសែនមនោរម្យ ត្រូវបង្កើតក្រុមការងារគណៈកម្មការគ្រប់គ្រងផ្សារនេះ ដើម្បីអោយមានភាពងាយស្រួល ក្នុងការសម្របសម្រួល នៅពេលដែលមានបញ្ហអ្វីមួយកើតឡើង។
ធ្វើសេចក្ដីរាយការណ៍ដោយអង្គភាពសារព័ត៌មាន និងគេហទំព័រ(ខ្មែរអច្ឆរិយ:) http://www.khpress.net