មណ្ឌលគិរី- ក្រុងសែនមនោរម្យ ៖ ស្ត្រីជើងខ្លាំងមុខដដែលរកស៊ីជួញដូរសត្វព្រៃចំនួន២នាក់ នៅក្នុងផ្សារក្រុងសែនមនោរម្យ ខេត្តមណ្ឌលគិរីត្រូវបានក្រុមអន្តរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ សហការណ៍ជាមួយកងរាជអាវុធហត្ថលើផ្ទៃប្រទេស អង្គការសម្ព័ន្ធមិត្តសត្វព្រៃ (WILDLIIFEALLIANCE ) និងផ្នែករដ្ឋបាលព្រៃឈើសែនមនោរម្យ បាន ចុះចាប់ដល់ក្នុងផ្ទះជាលើកទី២ កាលពីថ្ងៃទី០៨ខែសីហាឆ្នាំ២០១៨។
សមត្ថកិច្ចបានឲ្យសារព័តមានខ្មែរអច្ឆរិយ: ឲ្យដឹងថា មន្ត្រីជំនាញបានចុះឃាត់ចាប់សត្វព្រៃនៅទីតាំងចំនួន២កន្លែង ប្រមូលសាច់សត្វព្រៃប្រមាណ៦៧.៧គីឡូក្រាម បានឃាត់ខ្លួនអ្នកលក់ដូរសាច់សត្វព្រៃចំនួន២នាក់:
ទី១ ឈ្មោះ សោម គឹម សាង ភេទ ស្រី អាយុ២៩ ឆ្នាំ ជនជាតិ ខ្មែរ មុខរបរ លក់ដូរ ស្ថិតនៅភូមិ កណ្តាល សង្កាត់ ស្ពានមានជ័យ ក្រុង សែនមនោរម្យ ជាមុខសញ្ញាចាស់ដែលសមត្ថកិច្ចចុះបង្ក្រាបកាលពី៥ខែមុន និងទី ២ ឈ្មោះ សាំង វុទ្ធី ភេទប្រុស មានទីលំនៅភូមិដើមស្រល់ សង្កាត់មនោរម្យ ខេត្តមណ្ឌលគិរី ។
មន្ត្រីជំនាញបានឲ្យខ្មែរអច្ឆរិយ: ដឹងទៀតថា សត្វព្រៃដែលចាប់បានរួមមាន ១.កាំប្រម៉ា ៧.២០ គីឡូ ២,សាច់ជ្រូកព្រៃជាង៤០ គីឡូ ៣,ក្តាន់ញ៉ែង ៥ក្បាលស្មើរនិង៧.៥០ គីឡូ ៤,សាច់ឈ្លូស១៦ គីឡូ ក្រពះប្រម៉ា ចំនួន០២៕
បច្ចប្បន្ន អ្នកលក់ដូរសាច់សត្វព្រៃទាំង២ ត្រូវបានសមត្ថកិច្ចជំនាញធ្វើការពិន័យជាមួយទឹកប្រាក់សរុបចំនួន៧លាន៥សែន៤ម៉ឺន៤ពានរៀល រួចធ្វើការដោះលែងអោយទៅផ្ទះវិញ ចំណែកសាច់សត្វព្រៃបញ្ជូនទៅ ខ័ណ្ឌរដ្ឋបាលព្រៃឈើខេត្តមណ្ឌលគិរី ដុតកំទិចចោល ។
លោកជ័យ សុខា នាយផ្នែករដ្ឋបាលព្រៃឈើសែនមនោរម្យបានឲ្យដឹងថា ចំពោះស្ត្រីខាងលើមិនត្រូវបានបញ្ជូនទៅសាលាដំបូងទេ ព្រោះបទល្មើសនេះជាប្រភេទសត្វព្រៃធម្មតា ដោយមិនចាត់ចូលជាប្រភេទសត្វកម្រ។លោកនាយផ្នែកបញ្ជាក់ថា ករណីនេះត្រឹមតែពិន័យអន្តរកាលប៉ុណ្ណោះ។
ប្រជាពលរដ្ឋរស់នៅក្រុងសែនមនោរម្យបាននិយាយថា ទីតាំងផ្ទះស្ត្រីឈ្មោះ សោម គឹម សាង បានលួចរកស៊ីលក់សត្វព្រៃរាប់ឆ្នាំមកហើយមិនដែលឃើញមានសមត្ថកិច្ចក្នុងខេត្តណាម្នាក់ចេញមុខបង្ក្រាបទេ ទើបតែពេលនេះមានជំនាញអង្គការវ៉ាយអេត ចុះចាប់បង្ក្រាបបាន២លើកមកហើយនៅតែមិនព្រមឈប់ប្រកបរបរខុសច្បាប់នេះទៀត បើតាមប្រភពពីប្រជាពលរដ្ឋអាជីករដែលនៅទីនោះបានលួចប្រាប់ថា ស្ដ្រី ឈ្មោះ សោម គឹម សាង នេះមូលហេតុដែលមិនខ្លាចច្បាប់ មិនរៀងចាលដោយសាមានខ្នងបង្អែកពីក្រោយអ្នកធំមានងារជាឧកញ្ញា ទើបឈ្មោះនេះផ្គើននិងច្បាប់។
ករណីនេះបានធ្វើអោយប្រជាពលរដ្ឋដាក់ជាចម្ងល់ថាទោះបីបទល្មើសនេះជាប្រភេទសត្វព្រៃធម្មតាក៏ដោយ គួតែច្បាប់ផ្តន្ទាទោស ពីបទល្មើសមិនរៀងចាលដើម្បីអោយបុគ្គលនេះបានយល់អំពីច្បាប់ ៕
(ដោយខ្មែរអច្ឆរិយ:)
