ព័ត៌មានពីខេត្តកំពង់ឆ្នាំង
ចេញផ្សាយថ្ងៃពុធ៣ ខែជេស្ន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែមិថុនា ឆ្នាំ២០១៩!
លោក នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស នៅថ្ងៃទី០៤ ខែមិថុនា ឆ្នាំ២០១៩ នេះបានប្រាប់ឲ្យកងកម្លាំងអាវុធហត្ថទាំងអស់ត្រូវតែមានស្មារតីជឿជាក់លើការដឹកនាំរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងការពាររដ្ឋធម្មនុញ្ញជាដាច់ខាត និងមិនឲ្យមានបដិវត្តន៍ពណ៌នៅក្នុងប្រទេសកម្ពុជា។
ការលើកឡើងយ៉ាងដូច្នេះបានធ្វើឡើងក្នុងឱកាសដែល លោក នាយឧត្តមសេនីយ៍ សៅ សុខា អញ្ជើញជាអធិបតីភាពក្នុងពិធីបិទវគ្គបណ្តុះបណ្ដាល បើកបររថយន្តជំនាន់ទី០១ និងបើកវគ្គហ្វឹកហ្វឺនបើកបររថពាសដែកប្រើប្រាស់សព្វាវុធ និងបាញ់គ្រាប់ពិតជំនាន់ទី២ នៅមជ្ឈមណ្ឌលហ្វឹកហ្វឺន កងរាជអាវុធហត្ថភ្នំជំរាយនាព្រឹកថ្ងៃអង្គារ ទី០៤ ខែមិថុនា ឆ្នាំ២០១៩នេះ។
នាយឧត្តមសេនីយ៍ សៅ សុខា បានបញ្ជាក់ថា «ជានិច្ចកាលកម្លាងអាវុធហត្ថ ត្រូវមានស្មារតីជឿជាក់លើការដឹកនាំរបស់ សម្តេចតេជោ ហ៊ុន សែន មានសាមគ្គីឯកភាពផ្ទៃក្នុងរឹងមាំគោរពច្បាប់របស់រដ្ឋ វិន័យកងទ័ពឋានានុក្រមយោធាគោរពនិងអនុវត្តម៉ឺងម៉ាត់នូវរាល់បទបញ្ជារបស់រាជរដ្ឋាភិបាល ការពារ រដ្ឋធម្មនុញ្ញជាដាច់ខាត មិនឲ្យបដិវត្តន៍ពណ៌ កើតឡើងនៅប្រទេសកម្ពុជាឡើយ ទោះបីស្ថិតក្នុងរូបភាព ឬពេលវេលាណាក៏ដោយ»។
នាយឧត្តមសេនីយ៍ បានបន្ដទៀតថា កម្លាំងអាវុធហត្ថត្រូវបន្តពង្រឹងការអនុវត្តតួនាទី ភារកិច្ច បង្ការ ការពារ ទប់ស្កាត់ និងបង្ក្រាបនូវរាល់បទល្មើស ដើម្បីពង្រឹងនីតិរដ្ឋ ស្របទៅតាមតួនាទី ភារកិច្ចទទួលខុសត្រូវរៀងៗខ្លួន ពិសេស បទល្មើសព្រហ្មទណ្ឌ បទល្មើសគ្រឿងញៀន ការជួញដូរមនុស្ស អំពើភេរវកម្ម សកម្មភាពបំផ្លិចបំផ្លាញធនធានធម្មជាតិ អំពើរំលោភច្បាប់ មានជាអាទិ៍ដូចជា៖ ការរត់គេចពន្ធ ជាដើម ។-ល-។
ក្នុងនោះផងដែរ នាយឧត្តមសេនីយ៍ សៅ សុខា បានប្រាប់ដល់កងកម្លាំងទាំងអស់ត្រូវយកចិត្តទុកដាក់ថែរក្សា មធ្យោបាយឧបករណ៍ គ្រឿងបំពា ក់លើកកម្ពស់ស្មារតីសន្សំសំចៃ ប្រឆាំងភាពខ្លះខ្ជាយ ពិសេស លើកកម្ពស់មនសិការ ចូលរួមអនុវត្តទិសស្លោក (ជួយគិត ជួយធ្វើ និងរួមគ្នាទទួលខុសត្រូវ) តាមតួនាទីភារកិច្ចរៀងៗខ្លួន។
ក្នុងឱកាស បើកវគ្គហ្វឹកហ្វឺនបើកបររថពាសដែក ប្រើប្រាស់សព្វាវុធ និងបាញ់គ្រាប់ពិត លោក នាយឧត្តមសេនីយ៍ មេបញ្ជាការ ក៏បានរំលឹកនូវការយកចិត្តទុកដាក់មួយចំនួន រួមមាន
១- មជ្ឈមណ្ឌលហ្វឹកហ្វឺនភ្នំជំរាយ និងជំនាញដែលមានការពាក់ព័ន្ធ នៅបញ្ជាការដ្ឋាន កងរាជអាវុធហត្ថលើផ្ទៃប្រទេស ត្រូវភ្ជាប់ជាប់តួនាទី ភារកិច្ច, ចាត់ចែង, គ្រប់គ្រង, ធានាជីវភាពរស់នៅ, ធានាប្រេងឥន្ធនៈ, ឧបករណ៍ មធ្យោបាយ សម្ភារៈបម្រើឲ្យវគ្គ ធ្វើយ៉ាងណាឲ្យកម្មវិធីនៃវគ្គសិក្សានេះដំណើរការទៅដោយរលូន។
២- ត្រូវយកចិត្តទុកដាក់ ដល់ផ្នែកគរុកោសល្យ ត្រៀមមេរៀនបង្រៀន បង្រៀនឲ្យអស់កម្មវិធី ដោយធានាបានថា ក្រោយបញ្ចប់វគ្គសិក្សា សិក្ខាកាមទាំងអស់នឹងទទួល បាននូវចំណេះដឹង និងសមត្ថភាពពិតប្រាកដ ។
៣- ចំពោះកម្មសិក្សា ត្រូវយល់ថា នេះជាឱកាស ជាកិត្តិយស ត្រូវក្រេបជញ្ជក់ចំណេះដឹង និងកសាងឲ្យខ្លួននូវជំនាញវិជ្ជាជីវៈ ដូច្នេះ ត្រូវគោរពម៉ឺងម៉ាត់នូវវិន័យ ប្រឹងប្រែងរៀនសូត្រ ស្តាប់ការឧទ្ទេសនាមរបស់គ្រូយោធាចារ្យ ហើយក្រោយពេលបញ្ចប់វគ្គ សិក្ខាកាមត្រូវមានសមត្ថភាព និងចំណេះដឹងពិតប្រាកដ។
៤- ត្រូវយកចិត្តទុកដាក់ថែទាំ និងប្រុងប្រយ័ត្នខ្ពស់ ផ្នែកបច្ចេកទេស ពីព្រោះមធ្យោបាយដែលយើងយកមកប្រើប្រាស់ សម្រាប់ការសិក្សានៅពេលនេះ គឺជាមធ្យោបាយស្ថិតនៅ ក្នុងក្របខ័ណ្ឌបំពាក់ ដូច្នេះ បើអស់លោកមិនច្បាស់ ហាមដោះ រុះរើ និយាយឲ្យចំមិនអនុញ្ញាត ឲ្យអស់លោកយកមធ្យោបាយនេះ សម្រាប់ធ្វើជាការពិសោធន៍ ជាដាច់ខាត ត្រូវតែពិនិត្យ និងថែទាំបច្ចេកទេសឲ្យបានជាប្រចាំ។
នាយឧត្តមសេនីយ៍ សៅ សុខា បានបញ្ជាក់ផងដែរថា ការបើកវគ្គបណ្តុះបណ្តាលនាថ្ងៃនេះ គឺសំដៅគោលបំណង៣យ៉ាង ជាចម្បង
១- ដើម្បីរួមចំណែកបង្ការ-ទប់ស្កាត់ និងកាត់បន្ថយចំនួនមនុស្សស្លាប់ របួស ពិការ ការខូចខាតបាត់បង់មធ្យោបាយសម្ភារ ទ្រព្យសម្បត្តិ ដែលបណ្តាលមកពីគ្រោះថ្នាក់ដោយសារចរាចរណ៍។ ដោយសារ ការមិនយល់ មិនគោរពច្បាប់ចរាចរណ៍ផ្លូវគោក ក្នុងនោះគ្រោះថ្នាក់ដែលកើតចេញពីការមិនយល់ដឹង និងការធ្វេសប្រហែស ម្យ៉ាងទៀតកងរាជអាវុធហត្ថជាមន្ត្រីប្រតិបត្តិច្បាប់ ដែលមានតួនាទី ភារកិច្ច ជាអ្នកតាមដាន ឃ្លាំមើល ត្រួតពិនិត្យ ជួយសម្រួលចរាចរណ៍ ត្រូវតែជាគម្រូល្អ ដល់ពលរដ្ឋក្នុងសង្គម ក្នុងការគោរព និងអនុវត្តច្បាប់ចរាចរណ៍ថែមទៀតផង ។
២- ដឹកជញ្ជូនជាជំនាញឯកទេសមួយ នៃជំនាញឯកទេសផ្សេងៗទៀត ដែលមាននៅក្នុងរចនាសម្ពន្ធចាត់តាំងកងរាជអាវុធហត្ថ បច្ចុប្បន្ន កងរាជអាវុធហត្ថកំពុងខ្វះអ្នកបើកបរ និងជាជ្រុងមួយនៃការធ្វើកំណែទម្រង់ ដើម្បីពង្រឹងរចនាសម្ព័ន្ធផងដែរ។
៣- មេបញ្ជាការកងរាជអាវុធហត្ថ ចង់ផ្តល់ជូនបុគ្គលិក ក្នុងកងរាជអាវុធហត្ថគ្រប់រូបទទួលបាននូវវិជ្ជាជីវៈមួយ ដែលពួកគេម្នាក់ៗអាចយកទៅប្រើប្រាស់បាន សម្រាប់ប្រកបរបរចិញ្ចឹមជីវិតរបស់ពួកគេផ្ទាល់ខ្លួន នៅពេលដែលពួកគេចាកចេញពីជួរកងរាជអាវុធហត្ថ៕
ធ្វេីសេចក្ដីរាយការណ៍ដោយអង្គភាពសារព័ត៌មាន និងគេហទំព័រខ្មែរអច្ឆរិយ: http://www.khpress.net