ព័ត៌មានពីខេត្តស្វាយរៀង – ស្រុកចន្ទ្រា
ចេញផ្សាយពុធ១៣កើត ខែពិសាខ ឆ្នាំកុរ ឯកស័កព.ស.២៥៦២ ត្រូវនឹងថ្ងៃទី១៦ ខែឧសភា ឆ្នាំ២០១៩!
អត្ថបទ:ដោយ វង្ស ចាន់សម័យ
សាច់ជ្រូកនាំចូលខុសច្បាប់ពីប្រទេសវៀតណាមចំនួន២៣២គីឡូក្រាមដែលក្រុមឈ្មួញដឹកតាមច្រករបៀងអង្គរម្តេញ ត្រូវបានកងរាជអាវុធហត្ថស្រុកចន្ទ្រាចេញល្បាត ប្រទះឃើញចាប់ប្រគល់ឲ្យជំនាញពេទ្យសត្វដុតកំទេចចោលនៅថ្ងៃទី១៥ ខែឧសភា ឆ្នាំ២០១៩ នៅភូមិចេក ឃុំសំរោង ស្រុកចន្ទ្រា ខេត្តស្វាយរៀង។
បើតាមសមត្ថកិច្ចកងរាជអាវុធហត្ថស្រុកចន្ទ្រា ខេត្តស្វាយរៀង បានឲ្យដឹងថា នៅព្រឹកថ្ងៃទី១៥ ខែឧសភា ឆ្នាំ២០១៩ កម្លាំងកងរាជអាវុធហត្ថស្រុកចន្ទ្រា ចុះល្បាតតាមគោលដៅខាងលើស្រាប់តែប្រទះឃើញម៉ូតូមួយបើកបរដោយបុរសម្នាក់បានដឹកសាច់ជ្រូកមួយបាវ ។ ប្រភពនេះបានបន្តទៀតថា ក្រោយពីប្រទះឃើញកម្លាំងយើងបានឃាត់សួរនាំអ្នកដឹកសាច់ជ្រូកខាងលើបានប្រាប់ថា ខ្លួនបានដឹកពីប្រទេសវៀតណាមតាមច្រករបៀងអង្គរម្តេញ ដើម្បីយកទៅលក់ហើយពេលនោះសមត្ថកិច្ចអាវុធហត្ថឃាត់ទុករង់ចាំជំនាញពេទ្យសត្វមកពិនិត្យមើល។
ក្រោយពីពិនិត្យរួច និងយោងតាមបទបញ្ជារបស់គណៈបញ្ជាការឯកភាពខេត្តស្វាយរៀង បញ្ជាឲ្យមានការទប់ស្កាត់ហាមឃាត់ការនាំសត្វជ្រូករស់ សាច់ជ្រូក និងផលិតផលពីសត្វ ចូលមកខេត្តស្វាយរៀងនោះ ទើបសមត្ថកិច្ចកងរាជអាវុធហត្ថស្រុកចន្ទ្រាសហការគ្នាជាមួយជំនាញដុតកំទេចចោលតែម្តង។
បើតាមលោក ប៉ែន ចន្ធី ប្រធានការិយាល័យផលិតកម្មសត្វនៃមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង បានមានប្រសាសន៍ថាក្រោយពីទទួលបានព័ត៌មានពីកម្លាំងកងរាជអាវុធហត្ថស្រុកចន្ទ្រា បានឃាត់សាច់ជ្រូកបានចំនួន២៣២គីឡូក្រាមមកនោះ ជំនាញរបស់លោកបានចុះទៅពិនិត្យហើយបើសាច់ជ្រូកទាំងអស់នោះនាំចូលពីប្រទេសជិតខាងវាពិតជាខុសច្បាប់ ហើយបើគ្មានលិខិតស្នាមនោះនិងត្រូវដុតកំទេចចោល បើសិនជាសាច់ជ្រូកក្នុងស្រុកមានច្បាប់នោះសមត្ថកិច្ចយើងមិនហាមឃាត់នោះទេ៕
ធ្វើសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net