ចេញផ្សាយថ្ងៃអង្គារ០៤កើតខែពិសាខ ឆ្នាំកុរ ឯកសក័ព.ស.២៥៦២ ត្រូវនិងថ្ងៃទី០៧ខែឧសភាឆ្នាំ២០១៩!
ទីបំផុតអ្នកសារព័ត៌មាន Reuters ទាំងពីររូបដែលត្រូវបានតុលាការមីយ៉ាន់ម៉ាកាត់ទោសដាក់ពន្ធនាគារកាលពីខែសីហា ឆ្នាំ២០១៨ ក្នុងម្នាក់ៗ០៧ឆ្នាំនោះ ត្រូវបានរដ្ឋាភិបាលមីយ៉ាន់ម៉ាសម្រេចដោះលែងឲ្យមានសេរីភាពវិញហើយជាមួយអ្នកទោសសរុបចំនួន ៦,៥២០នាក់ដែលត្រូវបានលើកលែងទោសដូចគ្នា នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅមុននេះបន្តិចនាព្រឹកថ្ងៃអង្គារទី០៧ ខែឧសភា ឆ្នាំ២០១៩។
អ្នកសារព័ត៌មានរបស់ទីភ្នាក់ងារព័ត៌មានអន្តរជាតិដ៏ល្បី Reuters ប្រចាំនៅប្រទេសមីយ៉ាន់ម៉ា លោក វ៉ា ឡូណេ (Wa Lone) អាយុ៣២ឆ្នាំ និងលោក ក្យរ អឿអូ (Kyaw Soe Oo) អាយុ២៨ឆ្នាំត្រូវបានតុលាការមីយ៉ាន់ម៉ាកាលពីខែសីហា ឆ្នាំ២០១៨ សម្រេចថា ពិតជាបានល្មើសនឹងច្បាប់ចែងពីការការពារព័ត៌មានសម្ងាត់ជាតិមីយ៉ាន់ម៉ាកាលពីសម័យ អាណានិគម នៅពេលដែលពួកគេ ទាំងពីរ បានប្រមូល និងទទួលបានព័ត៌មានផ្ទៃក្នុងសំខាន់ៗរបស់ ប្រទេសមីយ៉ាន់ម៉ា ក្នុងកំពុងឡុងការធ្វើសេចក្តីរាយការណ៍របស់ពួកគេជុំវិញអំពើសម្លាប់រង្គាលលើ ជនជាតិភាគតិច រ៉ូហ៊ីងយ៉ា ។
គួរបញ្ជាក់ថា លោកប្រធានាធិបតី វីន ម្យីនត៍ (Win Myint) បានសម្រេចចិត្តលើកលែងទោសឱ្យអ្នកទោសរាប់ពាន់នាក់កាលពីខែមេសាកន្លងទៅ។ ការសម្រេចចិត្តបែបនេះគឺជាទម្លាប់នៅក្នុងប្រទេសមីយ៉ាន់ម៉ា ដែលអាជ្ញាធរតែងតែងដោះលែង ឬលើកលែងទោសឱ្យអ្នកទោសនៅអំឡុងពិធីបុណ្យប្រពៃណីចូលឆ្នាំថ្មីកាលពីថ្ងៃទី១៧ ខែមេសា៕
ធ្វើសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress
