ខេត្តស្ទឹងត្រែង ៖ នៅវេលាម៉ោងប្រមាណ៣រសៀលថ្ងៃទី២៦ ខែមិថុនា ឆ្នាំ២០១៨នេះនៅច្រកអន្តរជាតិត្រពាំងគ្រៀលព្រំ ដែនកម្ពុជា-ឡាវ កម្លាំងនគរបាលប្រឆាំងគ្រឿងញៀនក្រសួងមហាផ្ទៃ ចាប់បានថ្នាំញៀនចំនួន១២០ដុំ (ប្រមាណជាង១២០គីឡូក្រាម) ខណៈក្រុមឈ្មួញដឹកចេញពីប្រទេសឡាវចូលមកកម្ពុជា ។
យោងតាមមន្ត្រីប៉ូលីសច្រកទ្វារអន្តរជាតិត្រពាំងគ្រៀលក្រុងស្ទឹងត្រែងឱ្យដឹងទៀតថា ថ្នាំញៀនចំនួន១២០ដុំ គឺក្នុង មួយដុំប្រហែលជា១គីឡូ ត្រូវបានរកឃើញលើរថយន្តក្រុងដឹកអ្នកដំណើរ «សូរិយា» ខណៈចេញពីច្រកទ្វារអន្តរជាតិ និងបន្តគោលដៅទៅរាជធានីភ្នំពេញ ។
ប្រភពដដែលបន្តថា ការឃើញថ្នាំញៀនដ៏ច្រើននោះ ត្រូវបាននាំចេញពីប្រទេសឡាវ ក្នុងការឆែកឆេរកឃើញថ្នាំញៀននេះ សមត្ថកិច្ចក៏បានឃាត់មនុស្សប្រុសចំនួន៣នាក់ ដែលមានការពាក់ព័ន្ធក្នុងករណីនេះទី១ គឺតៃកុងរថយន្ត ទី២អ្នកបកប្រែភាសា និងទី៣សង្ស័យជាម្ចាស់ថ្នាំញៀនតែម្តង ៕
