ព័ត៌មានពីខេត្តកណ្ដាល ស្រុកអង្គស្នួល
ចេញផ្សាយថ្ងៃអាទិត្យ ០៩រោច ខែចេត្រ ឆ្នាំកុរ ឯកសក័ព.ស.២៥៦២ ត្រូវនិងថ្ងៃទី២៨ ខែមេសាឆ្នាំ២០១៩!
ក្រុមឈ្មួញដឹកដី ដឹកថ្ម និងដឹកទំនិញផ្សេងៗបានទម្លាយរឿងអាស្រូវរបស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តមួយកន្លែង ផ្លូវជាតិលេខ៤ ស្ថិតនៅមុខសាលាស្រុកអង្គស្នួល ខេត្តកណ្ដាលថា អនុវត្តការងារមិនត្រឹមត្រូវតាមច្បាប់ និងគោលការណ៍របស់ក្រសួងសាធារណការ និងដឹកជញ្ជូននោះទេ ដោយពួកគេ ប្រើប្រាស់តួនាទីគាបសង្កត់យកលុយពីអ្នកដឹកថ្ម ដឹកខ្សាច់ ដឹកដី និងដឹកទំនិញផ្សេងៗ តាមអំពើចិត្ត។
តាមប្រភពព័ត៌មានពីក្រុមឈ្មួញផ្នែកដឹកជញ្ជូនទាំងនោះបាននិយាយប្រាប់សារព័ត៌មាននិងគេហទំព័រ”ខ្មែរអច្ឆរិយ:”យេីងថាក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្ដ ផ្លូវជាតិលេខ៤ អង្គស្នួលនេះមានប្រធានឈ្មោះធុយ វណ្ណា ជាអ្នកដាក់ផែនការឱ្យមន្ត្រីកូនចៅ ប្រើវិធីសាស្ត្រគ្រប់យ៉ាង គាបសង្កត់យកលុយពីរថយន្ដដឹកថ្ម ដឹកខ្សាច់ ដឹកដី និងដឹកទំនិញផ្សេងៗ បើទោះបីពួកគេដឹក អីវ៉ានស្របច្បាប់ និងមិនលើសទម្ងន់ក៏ដោយ។ ការគាបឱ្យបង់លុយនេះ គឺក្រុមមន្ត្រីប្រចាំការមិនតម្រូវឱ្យចូលថ្លឹងនោះទេដោយតម្រូវឱ្យចតនៅលើផ្លូវខាងក្រៅហើយឱ្យអ្នកបើកបរចូលទៅបង់លុយតាមការកំណត់ចាប់ពី១ម៉ឺនរៀលរហូតដល់៤ម៉ឺនរៀលឬលើសពីនេះទៀត។
ជាមួយនឹងការគាបសង្កត់រថយន្ដដែលដឹកអីវ៉ាន់ក្រិតទម្ងន់ត្រឹមត្រូវនេះដែរក្រុមមន្ត្រីប្រចាំការស្ថាននីយ៍ជញ្ជីងថ្លឹងរថយន្ដស្រុកអង្គស្នួលផ្លូវជាតិលេខ៤របស់លោកប្រធានធុយ វណ្ណា នេះបានឃុបឃិតជាមួយក្រុមឈ្មួញដឹកទំនិញលើសទម្ងន់ (លើសចំណុះ) រាប់រយរាប់ពាន់រថយន្ដទៀត ដោយតម្រូវឱ្យបង់លុយ យ៉ាងតិចបំផុត១០ម៉ឺនរៀល ទៅដល់៤០ម៉ឺនរៀល និងអាចលើសពីចំនួននេះ។ សូមបញ្ជាក់ថា នៅលើផ្លូវជាតិលេខ៤ ក្នុងមួយថ្ងៃៗ មានរថយន្ដដឹកទំនិញធុនធំ មិនតិចជាង ៥០០គ្រឿង នោះទេ? មានន័យថា លោកធុយ វណ្ណា ប្រធានស្ថានីយ៍ជញ្ជីងថ្លឹងរថយន្ដ ផ្លូវជាតិលេខ៤ អង្គស្នួលនេះ គឺគ្រប់ទឹកតែម្ដងហើយ។
ក្រុមឈ្មួញដឹកទំនិញតាមរថយន្ដធុនធំបានលើកឡើងថា បានជាក្រុមមន្ត្រីប្រចាំជញ្ជីងថ្លឹងរថយន្ដខាងលើ ហ៊ានធ្វើអ្វីៗតាមអំពើចិត្តបែបនេះ គឺដោយសារមានការឃុបឃិត បើកដៃពីប្រធានមន្ទីរសាធារណការនិងដឹកជញ្ជូនខេត្តកណ្ដាលទើបអ្វីៗអាចប្រព្រឹត្តទៅដោយរលូន។
ដោយសារមានការលេចធ្លាយរឿងអាស្រូវនេះ បានធ្វើឱ្យមហាជន និងប្រជាពលរដ្ឋ សំណូមពរដល់លោក ស៊ុន ចាន់ថុល រដ្ឋមន្ត្រីក្រសួងសាធារណ:ការ និងដឹកជញ្ជូន មេត្តាជួយចាត់វិធានការលុបបំបាត់ទង្វើមិនប្រក្រតីរបស់ក្រុមមន្ត្រីប្រចាំជញ្ជីងថ្លឹងរថយន្តនៅលើផ្លូវជាតិលេខ៤ អង្គស្នួល នេះឱ្យអនុវត្តការងារត្រឹមត្រូវផង។
សូមជម្រាបអង្គភាពសារព័ត៌មាន និងគេហទំព័រ”ខ្មែរអច្ឆរិយៈ”យើងខ្ញុំរង់ចាំការបកស្រាយបន្ថែមពីសាម៉ីខ្លួនឫអ្នកពាក់ព័ន្ធបើមានប្រតិ្តកម្មណាមួយ និងអាចផ្តល់ព័ត៌មានមកការិយាល័យនិពន្ធ ០១២:៥០៥៣៤៤ បើ គិតថាការចុះផ្សាយមិនពិតអង្គភាពយើងខ្ញុំនិងធ្វើការកែតម្រូវនៅរៀងរាល់ម៉ោងធ្វើការ។
ធ្វេីសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net
