ព័ត៌មានពីភ្នំពេញ
ចេញផ្សាយថ្ងៃអង្គារ០៤រោច ខែចេត្រ ឆ្នាំកុរ ឯកសក័ព.ស.២៥៦២ត្រូវនិងថ្ងៃទី២៣ ខែមេសាឆ្នាំ២០១៩!
ឯកឧត្តម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ កាលពីថ្ងៃទី២២ ខែមេសា ឆ្នាំ២០១៩ បានផ្ញើលិខិតមួយច្បាប់ជូនព្រះរាជអាជ្ញានៃអយ្យការអមសាលាដំបូងខេត្តកំពង់ធំ ស្តីពីការសម្រេចផ្អាកមុខងារលោក ជា សុវណ្ណថេត ព្រះរាជអាជ្ញារងនៃអយ្យការអមសាលាដំបូង ខេត្តកំពង់ធំ ជាបណ្តោះអាសន្នពាក់ព័ន្ធទៅនឹងករណីចោទប្រកាន់ពីបទផ្តើមគំនិតក្នុងអំពើឈូសឆាយព្រៃលិចទឹកប្រពឹត្តនៅចំណុចបឹងអាត្រាព្រួល ភូមិទួលនាងសាវ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០១៩ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញាត្តិមាត្រា២៨ នៃក្រមព្រហ្មទណ្ឌ និងមាត្រា៩៨ នៃច្បាប់ស្តីពីជលផល។
ឯកឧត្តម ជិន ម៉ាលីន បញ្ជាក់ថា នេះជាបែបបទរដ្ឋបាលកាលណាមន្ត្រីណាមួយជាប់បណ្តឹងអាជ្ញា ឬស្ថិតក្នុងដំណើរនីតិវិធីតុលាការច្បាប់តម្រូវឱ្យផ្អាកការងារសិនដើម្បីជាប្រយោជន៍នៃការស៊ើបអង្កេតបើរកឃើញកំហុសត្រូវបញ្ចប់តំណែងលប់ឈ្មោះចេញពីក្របខណ្ឌ និងទទួលទោសតាមការសម្រេចរបស់តុលាការបើមិនមានកំហុសទេនឹងត្រូវអនុញ្ញាតឱ្យចូលបំពេញការងារវិញដូចដើម។ ពាក់ព័ន្ធបញ្ហានេះ ឯកឧត្តម សុខ លូ អភិបាលខេត្តកំពង់ធំបានប្រាប់នៅព្រឹកថ្ងៃទី២៣ ខែមេសា ឆ្នាំ២០១៩នេះថា កាលពីថ្ងៃទី១៧ ខែមេសា ឆ្នាំ២០១៩ក្រោមការបញ្ជាផ្ទាល់របស់លោកកម្លាំងគណៈបញ្ជាការឯកភាពខេត្តបានចុះទៅឃាត់ខ្លួនមនុស្សចំនួន៩នាក់រួមជាមួយគ្រឿងចក្រជាច្រើនគ្រឿង ខណៈពួកគេកំពុងធ្វើសកម្មភាពឈូសឆាយដីព្រៃលិចទឹកដែលជាសម្បត្តិរបស់រដ្ឋ ដែលបច្ចុប្បន្នមនុស្សទាំងអស់នោះត្រូវបានតុលាការសម្រេចឃុំខ្លួនជាបណ្តោះអាសន្នហើយ។
ឯកឧត្តម អភិបាលខេត្តបន្ថែមថា ក្នុងនាមគណៈបញ្ជាការឯកភាពខេត្តយើងមានតួនាទីការពារ និងប្រឆាំងដាច់ខាតចំពោះបុគ្គលណាដែលហ៊ានរំលោភបំពានលើទ្រព្យសម្បត្តិរបស់ជាតិចំពោះលោកព្រះរាជអាជ្ញារង ជា សុវណ្ណថេត យើងទុកជូនតុលាការបន្តនីតិវិធីទៅតាមផ្លូវច្បាប់។ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌បាតាម Telegram នៅព្រឹកថ្ងៃទី២៣ ខែមេសា ឆ្នាំ២០១៩នេះថា ក្រសួងយុត្តិធម៌ ពិតជាបានសម្រេចចេញលិខិតផ្អាកមុខងារលោក ជា សុវណ្ណថេត ព្រះរាជអាជ្ញារងនៃអយ្យការអមសាលាដំបូង ខេត្តកំពង់ធំ ជាបណ្តោះអាសន្នប្រាកដមែន៕
ធ្វេីសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net
