ក្រុងព្រះសីហនុ ៖ សេចក្តីរាយការណ៍ពីសមត្ថកិច្ចអោយដឹងថា រថយន្តកុងតឺនរ័មួយគ្រឿង ដែលអ្នកបើកបរអះអាងថា ដាច់ហ្វ្រាំងពេលចុះពីផ្លូវចំណោតលោកយាយម៉ៅ បានជ្រុលបុករះប៉ះរថយន្ត២គ្រឿងនិងប៉ះម៉ូតូប៉ូលីសមួយគ្រឿងទៀត មុននិងបុកចូលប៉ុស្តិប៉ូលីសចរាចរណ៍(P4)ផ្លូវបំបែករ៉ា ក្រុងព្រះសីហនុវេលាម៉ោងជិត២រសៀលថ្ងៃ២១កក្កដា២០១៨នេះ បណ្តាលអោយខូចខាតរថយន្តនិងម៉ូតូ ប៉ុន្តែមិនមានមនុស្សរងគ្រោះថ្នាក់ទេ។ ក្រោយកើតហេតុ អ្នកបើកបររថយន្តកុងតឺនរ័ត្រូវបាននគរបាលឃាត់ខ្លួនជាបណ្តោះអាសន្នដើម្បីដោះស្រាយបន្តតាមនិតិវិធីច្បាប់។
យោងតាមរបាយការណ៍ពីសមត្ថកិច្ចបញ្ជាក់ថា គ្រោះថ្នាក់ចរាចរណ៍នេះកើតឡើង ដោយ រថយន្តមួយគ្រឿងម៉ាក International ប្រភេទ កុងទីន័រ ពណ៌ស ពាក់ស្លាកលេខ ព្រះសីហនុ 3A- 0549 បើកបរដោយឈ្មោះ ទុយ វិចិត្រ ភេទប្រុស អាយុ ២៣ឆ្នាំ មានទីលំនៅ ភូមិអូរចន្ទី ឃុំព្រៃស្លឹក ស្រុកទាំង ខេត្តតាកែវ (កម្មសិទ្ធិក្រុមហ៊ុន មុីងលាំង) មានទិសដៅ ពីកើត-លិច ។
លុះដល់ចំណុចកើតហេតុខាងលើ បានខូចប្រព័ន្ធហ្វ្រាំង ជាន់មិនសុី ក៏បុករថយន្ត ០១គ្រឿង ម៉ាក Hyundai ពណ៌ទឹកប្រាក់ ពាក់ស្លាកលេខ ភ្នំពេញ 2AM-1945 ឈប់ចតនៅមុខផ្ទះ ជាកម្មសិទ្ធិរបស់ឈ្មោះ YANG FACUI ជនជាតិ ចិន ស្នាក់នៅ ភូមិ៣ សង្កាត់៣ ក្រុង-ខេត្តព្រះសីហនុ រួចក៏បានជ្រុលទៅបុករថយន្ត ០១គ្រឿងទៀត ម៉ាក Nissan ពាក់ស្លាកលេខ ចង្កូតស្តាំ PP.1793 ឈប់ចតនៅចំណុច P4 ជា កម្មសិទ្ធិរបស់ឈ្មោះ សេង ចាន់រតនា ភេទប្រុស ជាមន្ត្រីកងរាជអាវុធហត្ថ ខេត្តព្រះសីហនុ រួចបន្តជ្រុលទៅបុក ម៉ូតូ ០១គ្រឿងម៉ាក Honda Air Blade ពណ៌ខ្មៅ គ្មានស្លាកលេខ ឈប់ចតនៅចំណុច P4 ជាកម្មសិទ្ធរបស់ឈ្មោះ សឿង សុផាន់ ភេទប្រុស អាយុ ៣៧ឆ្នាំ ជានគរបាលចរាចរណ៍ ៕