ព័ត៌មានពីខេត្តព្រៃវែង
ចេញផ្សាយច័ន្ទ០៣រោច ខែចេត្រ ឆ្នាំ កុរ ឯកស័ក ព.ស.២៥៦២ ត្រូវនឹងថ្ងៃទី ២២ខែ មេសា ឆ្នាំ២០១៩
យោងតាមប្រភពព័ត៌មានបានបង្ហើបប្រាប់អង្គភាពគេហទំព័រ”ខ្មែរអច្ឆរិយៈ” ថានៅក្នុងកាស៊ីណូហេរ៉ូ (៧៧៧)មានទីតាំងនៅជិតច្រកទ្វារអន្តរជាតិបន្ទាយចក្រី ស្ថិតនៅភូមិកគោ ឃុំបន្ទាយចក្រី ស្រុកព្រះស្ដេច ខេត្តព្រៃវែង បានបើកលេងល្បែងស៊ីសងគ្រប់ប្រភេទ អស់រយៈពេលជាច្រើនខែមកហើយ ។
ដោយគ្មានច្បាប់អាជ្ញាប័ណ្ណពីក្រសួងសេដ្ឋកិច្ចនិងហិរញ្ញវត្ថុសម្រាប់ធ្វើអាជីវកម្ម។មានត្រឹមតែស.ជ.ណពីទីស្ដីការគណៈរដ្ឋមន្ត្រីសម្រាប់សាងសង់មជ្ឈមណ្ឌលកំសាន្ត ភោជនីយដ្ឋាន សណ្ឋាគារ ក្លឹបម៉ាស្សា ក្លឹបឌឺស្កូ ខារ៉ាអូខេ បាញ់ស៊ីប និងកន្លែងភ្នាល់ល្បែងប៉ុណ្ណោះ។
តែផ្ទុយទៅវិញកាស៊ីណូមួយនេះបែរជាបំពានធ្វើអាជីវកម្មអស់រយ:ពេលជាច្រើនខែមកហេីយដោយពុំទាន់បានបំពេញកាតព្វកិច្ចតាមផ្លូវច្បាប់ឬអាជ្ញាប័ណ្ណពីក្រសួងសេដ្ឋកិច្ច ម្យ៉ាងវិញទៀតស.ជ.ណដែលចេញក្រោយឆ្នាំ២០១៧ គឺមិនមានដាក់បញ្ចូលល្បែងបក្សីកីឡា(មាន់ជល់)នោះទេ?ដូច្នេះមិនគួរណាថៅកែកាស៊ីហេរ៉ូ(៧៧៧)ហ៊ានបើកលេងជល់មាន់ និងអនុញ្ញាត្តិឲ្យខ្មែរចូលលេងដោយសេរីរបៀបផ្គើននឹងច្បាប់។
ហេតុនេះសូមលោក ម៉ី វ៉ាន់ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយដ្ឋាន ឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុមេត្តាពិចារណាចំពោះសកម្មភាពកាស៊ីណូហេរ៉ូ(៧៧៧)នេះឡើងវិញផងទាន។
តាមប្រភពព័ត៌មានពីមហាជនវិញបានបង្ហេីបប្រាប់អង្គភាពគេហទំព័រ”ខ្មែរអច្ឆរិយៈ”យេីងដឹងថា កាស៊ីណូហេរ៉ូ(៧៧៧)ខាងលើមានថៅកែឈ្មោះ ជា ភាជ នាយកក្រុមហ៊ុនសម្បត្តិចក្រី៧៧៧ឯ.ក។ទទួលបានស.ជ.ណពីទីស្ដីការគណៈរដ្ឋមន្ត្រីលេខ៧៦១ ចុះថ្ងៃទី០២ខែកក្កដាឆ្នាំ២០១៨ គឺពុំមានល្បែងភ្នាល់បក្សីកីឡានោះទេ ហើយក៏មិនទាន់មានអាជ្ញាប័ណ្ណបង់ពន្ធពីក្រសួងសេដ្ឋកិច្ចនិងហិរញ្ញវត្ថុសម្រាប់បើកធ្វើអាជីវកម្មនោះដែរផងដែរ។
បែរជាកាស៊ីណូមួយនេះអាចបើកអាជីវកម្មលេងល្បែងស៊ីសងភ្នាល់ចាក់លុយគ្រប់ប្រភេទបានយ៉ាងរលូន
ចាប់តាំងពីខែធ្នូ ឆ្នាំ២០១៨ រហូតមកដល់បច្ចុប្បន្ន ជាពិសេសគឺល្បែងជល់មាន់តែម្ដង!។ ហើយអ្នកចូលលេងភាគច្រើនជាជនអន្តោរប្រវេសន៍វៀតណាម ដែលឆ្លងចូលមកដោយជិៈទូកកាត់ទន្លេ ដើម្បីវាងសមត្ថកិច្ចច្រកទ្វារព្រោះពួកគេអត់មានលិខិតស្នាមអ្វីទេឆ្លងដែន។ មិនតែប៉ុណ្ណោះកាស៊ីណូមួយនេះ ថែមទាំងអនុញ្ញាតឲ្យប្រជាជនខ្មែរយើងចូលលេងល្បែងយ៉ាងច្រើនកុះករជារៀងរាល់ថ្ងៃ។
និយាយរួមថៅកែកាស៊ីណូខាងលើកំពុងធ្វើនំអត់ម្សៅ ធ្វើអាជីវកម្មទាំងមិនទាន់មានអាជ្ញាប័ណ្ណ និងបើកល្បែងបក្សីកីឡាដោយអនុវត្តន៍ផ្ទុយពីច្បាបទាំស្រុង
ឆ្លើយតបនិងការលើកឡើងខាងលើលោក ជា ភាជ ថៅកែកាស៊ីណូហេរ៉ូ(៧៧៧)បានឆ្លើយប្រាប់ភ្នាក់ងារសារព័ត៍មានឲ្យដឹងរសៀលថ្ងៃទី២១ខែមេសាឆ្នាំ២០១៩នេះថា កាស៊ីណូលោកមានច្បាប់ដោយឡែកអាជ្ញាប័ណ្ណលោកបានទៅធ្វើហើយប៉ុន្តែមិនទាន់ធ្លាក់មកព្រោះរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុមិននៅ។
លោក អ៊ុយ សាគុណ នាយករដ្ឋបាលសាលាខេត្តព្រៃវែង បានថ្លែងថា ចំពោះកាស៊ីណូនេះលោកមិនច្បាស់ទេចាំមើលសួរគេសិន ប៉ុន្តែលោក ចាន់ ចន ស្នងការរងខេត្តព្រៃវែងទទួលកិច្ចការព្រំដែនបានថ្លែងថា ចំពោះកាស៊ីណូនេះមានគេប្ដឹងដែរប៉ុន្តែមិនដឹងយ៉ាងម៉េច ហើយលោកចាំតែមានបទបញ្ជាពីស្នងការគឺនិងចាត់ការភ្លាម រីឯលោក ព្រុំ សន្ធរ ស្នងការខេត្តព្រៃវែងមិនអាចសុំការបកស្រាយបានទេនៅល្ងាចថ្ងៃទី២១ខែមេសាឆ្នាំ២០១៩យេីងនេះ៕ធ្វេី
ធ្វើសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net