ព័ត៌មានពីរាជធានីភ្នំពេញ
ចេញផ្សាយថ្ងៃសៅរ៍០១រោជ ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែមេសា ឆ្នាំ២០១៩។
មន្ដ្រីនគរបាលជាន់ខ្ពស់ម្នាក់ នៃស្នងការដ្ឋាននគរបាលរាជធានីភ្នំពេញបានប្រាប់អង្គភាពគេហទំព័រ”ខ្មែរអច្ឆរិយ:”ឲ្យដឹងនៅព្រឹកថ្ងៃទី២០ ខែមេសា ឆ្នាំ២០១៩នេះថា ពាក់ព័ន្ធបណ្ដឹងរបស់មន្ដ្រីជាប់កិច្ចសន្យានៅអង្គភាពប្រឆាំងអំពើពុករលួយ (ACU) នោះអធិការរងខណ្ឌដង្កោម្នាក់ និងមន្ដ្រីនគរបាល២រូបមានទាំងជំនាញចរាចរណ៍ទៀតនោះ ត្រូវបានហៅមកសួរនាំនៅស្នងការដ្ឋាននគរបាលរាជធានីភ្នំពេញ។
ប្រភពព័ត៌មានដដែលបានបញ្ជាក់ទៀតថា ការហៅអធិការរង និងមន្ដ្រីនគរបាលមកសួរនាំនេះតាំងពីថ្ងៃទី១៤ ខែមេសា ឆ្នាំ២០១៩ម្ល៉េះ ប៉ុន្ដែរហូតមកដល់ពេលនេះមិនមានចំណាត់ការណាមួយនោះឡើយ ដោយរង់ចាំការសម្រេចពីលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។
គួរជម្រាបថា មន្ត្រីកិច្ចសន្យានៃអង្គភាពប្រឆាំងអំពើពុករលួយម្នាក់ បានដាក់ពាក្យប្តឹងទៅកាន់ស្នងការនគរបាលរាជធានីភ្នំពេញ លោកឧត្តមសេនីយ៍ផ្កាយ៣ ស ថេត ដោយចោទប្រកាន់ទៅលើមន្ត្រីនគរបាលខណ្ឌដង្កោមួយក្រុមដឹកនាំដោយអធិការរងម្នាក់ថា បានតាមប្រើហិង្សាព្រួតវាយយ៉ាងខ្លាំងលើរូបគាត់ដោយសារតែការច្រឡំករណីគ្រោះថ្នាក់ចរាចរណ៍។
ប៉ុន្ដែយ៉ាងណាក៏ដោយមន្ដ្រីនគរបាលជាន់ខ្ពស់ នៃស្នងការដ្ឋាននគរបាលរាជធានីភ្នំពេញបានអះអាងថា ករណីនេះត្រូវបានបែងចែកជា២ផ្សេងគ្នាដោយមួយពាក់ព័ន្ធបទល្មើសព្រហ្មទណ្ឌ ដែលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញបានហៅនគរបាល៣រូបមកសួរនាំ និងកំពុងតែបើកការស៊ើបអង្កេត។
ដោយឡែកមួយករណីទៀត ពាក់ព័ន្ធនឹងបទល្មើសចរាចរណ៍ដោយការិយាល័យនគរបាលចរាចរណ៍ផ្លូវគោកកំពុងតែស្រាវជ្រាវដោយសំអាងថា ក្នុងហេតុការណ៍នេះមន្ដ្រីជាប់កិច្ចសន្យារបស់ ACU បានបង្កគ្រោះថ្នាក់ចរាចរណ៍ និងមានជាតិអាកុលហួសកម្រិតកំណត់ ដែលនាំឲ្យមានការទទួលខុសត្រូវតាមផ្លូវច្បាប់ផងដែរ។
យោងតាមពាក្យបណ្តឹងរបស់លោក ឃឹម ខុម អាយុ៦៤ឆ្នាំ មានអាសយដ្ឋាននៅភូមិព្រែករទាំង សង្កាត់ព្រែក កំពឹស ខណ្ឌដង្កោ រាជធានីភ្នំពេញ ជាមន្ត្រីកិច្ចសន្យានៃ អង្គភាពប្រឆាំងអំពើពុករលួយ បានឲ្យឹដឹងថា ករណីនេះបានកើតឡើងនៅវេលាម៉ោង៨ យប់ថ្ងៃទី៩ ខែមេសា ឆ្នាំ២០១៩ ស្ថិតនៅវត្តព្រែកថ្លឹង សង្កាត់ព្រែកកំពឹស ខណ្ឌដង្កោ។
នៅក្នុងពាក្យបណ្តឹងដែលបណ្តាញព័ត៌មានអង្គភាពគេហទំព័រ”ខ្មែរអច្ឆរិយ:”ទទួលបាននៅរសៀលថ្ងៃទី១១ ខែមេសា ឆ្នាំ២០១៩នេះ ជនរងគ្រោះបានចោទទៅលើមន្ត្រីនគរបាលចំនួន៥នាក់ ក្នុងនោះអធិការរងម្នាក់មានឈ្មោះ នាក់ ណារ៉ូ និងមន្ត្រីនគរបាលប៉ុស្តិ៍ដង្កោ ៤រូបផ្សេងទៀត៕
សេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net