ខេត្តព្រះសីហនុ
ចេញផ្សាយថ្ងៃសុក្រ ១៥ កើត ខែចេត្រ ឆ្នាំកុរ ឯកស័ក ព.ស ២៥៦៣ត្រូវនឹងថ្ងៃទី១៩ខែមេសាឆ្នាំ២០១៩។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់ប្រាប់បណ្ដាញព័ត៌មានគេហទំព័រ” ខ្មែរអច្ឆរិយ: “ឲ្យដឹងនៅព្រឹកថ្ងៃទី១៩ ខែមេសា ឆ្នាំ២០១៩ថា នៅពេលនេះកម្លាំងនគរបាលរបស់លោក បានចាប់ខ្លូនមនុស្ស០៦នាក់ដែលបានដឹកនាំនិងចូលរួមប្រើហិង្សាទៅលើមន្ដ្រីនគរបាល និងប្រជាការពារនៅពេលដែលកងកម្លាំងបានចុះទៅអន្ដរាគមន៍ឲ្យពួកគេបើកផ្លូវឡើងវិញក្រោយយកដុំថ្ម និងមែកឈើទៅដាក់បិទផ្លូវជាតិបង្កឲ្យកកស្ទះចរាចរណ៍ប្រហែល១ម៉ោងនៅព្រឹកថ្ងៃទី១៩ ខែមេសា ឆ្នាំ២០១៩នេះ។
ការចាប់ខ្លួនមនុស្សទាំង០៦នាក់នេះធ្វើឡើងនៅព្រឹកថ្ងៃសុក្រនេះ ខណៈឃាត់ខ្លួន០២នាក់កាលពីម្សិលមិញ សរុបរហូតដល់ពេលនេះឃាត់ខ្លួនចំនួន០៨នាក់ហើយលោកឧត្តមសេនីយ៍ស្នងការបានចាត់ទុកថា គឺជាបទល្មើសព្រហ្មទណ្ឌដែលមិនអាចលើកលែងឲ្យបាននឹងចាត់វិធានការតាមផ្លូវច្បាប់តែម្ដង។
លោកឧត្តមសេនីយ៍ទោ ជួន ណារិន្ទ បានបញ្ជាក់យ៉ាងដូច្នេះថា (ពេលដែលកម្លាំងរបស់យើង និងប្រជាការពារចុះទៅសម្របសម្រួល និងរើសដុំថ្មចេញពីផ្លូវស្រាប់តែប្រជាពលរដ្ឋទាំងនោះបានគុំដុំថ្មទៅលើពួកគេបណ្ដាលឲ្យមន្ដ្រីនគរបាលរបស់យើង០៤នាក់ និងប្រជាការពារ០២នាក់ រងរបួសបែកក្បាលហើយរថយន្ដ៣គ្រឿងបានរងការខូចខាតផងដែរ)។
មន្ត្រីជាន់ខ្ពស់សាលាខេត្តព្រះសីហនុបានបញ្ជាក់មកកាន់បណ្តាញព័ត៌មានគេហទំព័រ” ខ្មែរអច្ឆរិយ:”ថា អ្វីក៏ដោយរាប់ទាំងបញ្ហាដីធ្លីអាជ្ញាធរ និងមន្ត្រីជំនាញពាក់ព័ន្ធតែងតែមានយន្តការដោះស្រាយតាមប្រព័ន្ធតុលាការ និងតាមគណៈកម្មាធិការដោះស្រាយទំនាស់ដីធ្លី ហើយត្រូវបញ្ឈប់សកម្មភាពតវ៉ាបិទផ្លូវឬប្រើហិង្សាទៅលើសមត្ថកិច្ច ដែលទង្វើខុសច្បាប់ទាំងស្រុង ដូច្នេះសូមទទូចដល់អ្នកពាក់ព័ន្ធទាំងអស់ត្រូវងាកមករកការតវ៉ាតាមផ្លូវច្បាប់ទើបជាការប្រសើរ។
សូមបញ្ជាក់ថា ប្រជាពលរដ្ឋជាង១០០នាក់ ដែលអាជ្ញាធរហៅថា ជនអនាធិបតេយ្យនោះនៅព្រឹកថ្ងៃទី១៩ ខែមេសា ឆ្នាំ២០១៩នេះបាននាំគ្នាតវ៉ាសាជាថ្មីដោយយកដុំថ្មធំៗ និងមែកឈើទៅដាក់បិទផ្លូវជាតិលេខ៤ នៅឃុំបិតត្រាំង ស្រុកព្រៃនប់ ខេត្តព្រះសីហនុ បណ្តាលឲ្យមានការកកស្ទះចរាចរណ៍យ៉ាងខ្លាំង សម្រាប់ប្រជាពលរដ្ឋដែលធ្វើដំណើរឆ្លងកាត់ទីនោះ។
នេះជាថ្ងៃទី២ហើយដែលប្រជាពលរដ្ឋទាំងនោះបាននាំគ្នាបិទផ្លូវជាតិលេខ៤ ដោយសារខឹងអាជ្ញាធរចុះទៅរុះរើខ្ទម និងសំណង់អនាធិបតេយ្យខុសច្បាប់របស់ពួកគាត់នៅឃុំបិតត្រាំងដែលសង់លើដីមានម្ចាស់កម្មសិទ្ធិពិតប្រាកដកាលពីម្សិលមិញជាង៦០០ខ្នង។
ជាមួយគ្នានេះចំពោះហេតុការណ៍នេះសមត្ថកិច្ចក៏បានឃាត់ខ្លួនមនុស្ស០២នាក់ផងដែរ រួមមាន
ឈ្មោះ ខ្លូត តុសិតា ភេទស្រី អាយុ៣៩ ឆ្នាំមុខរបរមេផ្ទះ ស្នាក់នៅបណ្ដោះអាសន្នដូចកន្លែងកើតហេតុ ដែលត្រូវឃាត់ខ្លួន ដោយសារការគប់ដុំថ្ម និងប្រើដំបងវាយលើកំលាំងសមត្ថកិច្ចចំរុះបណ្តាលឲ្យរងរបួសជាច្រើននាក់ និងឈ្មោះ កែវ សាង ភេទប្រុស អាយុ៥៣ឆ្នាំ មានមុខរបរជាអ្នកនេសាទ នៅស្រុកព្រៃនប់ ដែលពាក់ព័ន្ធនឹងការដឹកនាំបិទផ្លូវ៕
សេចក្ដីរាយការណ៍ដោយអង្គភាពសារព័ត៌មាន និង គេហទំព័រ”ខ្មែរអច្ឆរិយៈ”
http/www.khpress.net
