ខេត្តព្រះវិហារ
ចេញផ្សាយថ្ងៃសុក្រ ១៥ កើត ខែចេត្រ ឆ្នាំកុរ ឯកស័ក ព.ស ២៥៦៣ត្រូវនឹងថ្ងៃទី១៩ខែមេសាឆ្នាំ២០១៩។
យោងតាមប្រភពព័ត៌មានបានឲ្យដឹងថាយ៉ាងហោចណាស់មនុស្សប្រុសស្រីចំនួន១៩នាក់ បានរងរបួសធ្ងន់ ស្រាលដោយសារក្រឡាប់រថយន្ត ក្រោយត្រឡប់មកពីធ្វើដំណើរទៅលេងកំសាន្តនៅប្រាសាទកោះកែរបានបែកកង់រថយន្តផ្នែកខាងមុខ បណ្តាលឱ្យរេចង្កូតក្រឡាប់រថយន្តតែម្តងហេតុការណ៍នេះបានកើតឡើងនៅវេលាម៉ោង១៩និង០៥នាទីថ្ងៃទី១៨ ខែមេសា ឆ្នាំ២០១៩ ស្ថិតនៅចំណុចស្រែច្នាប ក្នុងភូមិស្វាយដំណាក់ថ្មី ឃុំរមទម ស្រុករវៀង ខេត្តព្រះវិហារ។
លោកវរសេនីយ៍ឯក សាយ ដេត អធិការនគរបាលស្រុករវៀង បានឱ្យដឹងនៅព្រឹកថ្ងៃទី១៩ ខែមេសា ឆ្នាំ២០១៩នេះថា មុនពេលកើតហេតុរថយន្តខាងលើ បានដឹកមនុស្សពេញមកពីលេងកំសាន្តនៅប្រាសាទកោះកែរលុះដល់កន្លែងកើតហេតុស្រាប់តែរថយន្តបែកកង់ខាងមុខបណ្តាលឱ្យរេចង្កូតក្រឡាប់តែម្តងធ្វើឱ្យអ្នករួមដំណើរ១៩នាក់ ស្រី៨នាក់រងរបួសធ្ងន់ស្រាល។
លោកអធិការនគរបាលស្រុករវៀងបានបន្តថា ក្រោយកើតហេតុកម្លាំងសមត្ថកិច្ចបានទៅដល់ភ្លាមៗ និងទាក់ទងរថយន្តដឹកអ្នករបួសទៅកាន់មណ្ឌលសុខភាពភ្នំដែកភ្លាមៗចំណែកអ្នករបួសធ្ងន់ចំនួន៣នាក់បានបញ្ជូនទៅព្យាបាលនៅមន្ទីរពេទ្យបង្អែកខេត្តព្រះវិហារភ្លាមៗផងដែរ។
លោក សាយ ដេត បានបន្តថា អ្នកបើកបររថយន្តមានឈ្មោះ ហៀប ចាន់ហុក ភេទប្រុស អាយុ២៧ឆ្នាំ រស់នៅភូមិស្វាយដំណាក់ចាស់ ឃុំរបទម ស្រុករវៀង ខេត្តព្រះវិហារ បានរត់គេចខ្លួន។ ដោយឡែករថយន្ត ដែលក្រឡាប់ម៉ាកតូយ៉ូតា ពណ៍ស មួយបាំងកន្លះ ពាក់ស្លាកលេខភ្នំពេញ2AB 1160ត្រូវបានសមត្ថកិច្ចយកទៅរក្សាទុកនៅប៉ុស្តិនគរបាលរមទម៕
សេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net
