ខេត្តព្រះសីហនុ
ចេញផ្សាយថ្ងៃព្រហស្បត៍១៤កេីត ខែចេត្រ ឆ្នាំកុរ ឯកស័ក ព.ស ២៥៦៣ត្រូវនឹងថ្ងៃទី១៨ខែមេសាឆ្នាំ២០១៩។
តាមរបាយការណ៍របស់សមត្ថកិច្ចខេត្តព្រះសីហនុ បានឱ្យដឹងថា នៅរសៀលថ្ងៃទី១៨ ខែមេសា ឆ្នាំ២០១៩នេះកម្លាំងសមត្ថកិច្ចបានសម្រេចឃាត់ខ្លួនមនុស្ស០២នាក់ដែលជាមេខ្លោង នៃការតវ៉ាបិទផ្លូវជាតិលេខ០៤នៅពេលដែលអាជ្ញាធរចុះអនុវត្តសាលដីការរុះរើសំណង់ខ្ទមអនាធិបតេយ្យរបស់ពួកគេនៅលើដីមានម្ចាស់កម្មសិទ្ធិនៅឃុំបិតត្រាំង ស្រុកព្រៃនប់ ខេត្តព្រះសីហនុ នាព្រឹកមិញនេះ។
ជនសង្ស័យទាំង០២នាក់នោះ រួមមាន
ទី១ឈ្មោះ ខ្លូត តុសិតា ភេទស្រី អាយុ៣៩ ឆ្នាំមុខរបរមេផ្ទះ ស្នាក់នៅបណ្ដោះអាសន្នដូចកន្លែងកើតហេតុ ដែលត្រូវឃាត់ខ្លួន ដោយសារការគប់ដុំថ្ម និងប្រើដំបងវាយលើ ឈ្មោះ ថោង ចិន្តា ភេទ ប្រុស៤១ ឆ្នាំមុខរបរទីប្រឹក្សាអមទីស្តីការគណៈរដ្ឋមន្ត្រី មានទីលំ នៅផ្ទះលេខV១០៧ សង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ និងកំលាំងសមត្ថកិច្ចចំរុះ បណ្តាលអោយរងរបួសជាច្រើននាក់
ទី២មានឈ្មោះ កែវ សាង ភេទប្រុស អាយុ៥៣ឆ្នាំ មានមុខរបរជាអ្នកនេសាទ នៅស្រុកព្រៃនប់ ដែលពាក់ព័ន្ធនឹងការដឹកនាំបិទផ្លូវ។
សូមបញ្ជាក់ថា នៅព្រឹកថ្ងៃទី១៨ ខែមេសា ឆ្នាំ២០១៩នេះ មានក្រុមប្រជាពលរដ្ឋប្រមាណជាង ១០០គ្រួសារ ដែលបានទៅសង់ខ្ទមអនាធិបតេយ្យ នៅលើដីមានម្ចាស់កម្មសិទ្ធិ នៅចំណុចភូមិចំណោតរាមឃុំបិតត្រាង(អូរត្រាវ)ស្រុកព្រៃនប់ ខេត្តព្រះសីហនុ បាននាំគ្នាតវ៉ា យកដើមឈើមកបាំងបិទផ្លូវជាតិលេខ០៤ បណ្តាលឱ្យកកស្ទះមួយស្របក់ ក្រោយពេលអាជ្ញាធរ និងសមត្ថកិច្ច បានចុះរុះរើសំណង់អនាធិបតេយ្យរបស់ពួកគេនៅតំបន់នេះ។
ប៉ុន្តែទោះជាយ៉ាងនេះក្តី កម្លាំងនគរបាលបានរៀបចំបំបែក និងសម្រួលសណ្តាប់ធ្នាប់ឲ្យធ្វើចរាចរណ៍ធម្មតាវិញភ្លាមៗផងដែរ៕
សេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net