ដោយ ៖ លីម៉ា
ចេញផ្សាយថ្ងៃព្រហស្បត៍១៤កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៨ខែមេសាឆ្នាំ២០១៩
នៅទីបំផុតអតីតប្រធានាធិបតីប៉េរូលោក Alan Garcia បានទទួលមរណភាពហើយនៅក្នុងមន្ទីរពេទ្យក្រោយពីលោកបានទាញកាំភ្លើងបាញ់ខ្លួនឯងត្រង់ក្បាលនៅចំពោះមុខក្រុមសមត្ថកិច្ចប៉េរូ ដែលបានចុះទៅចាប់ខ្លួនលោកដល់លំនៅឋាន ពាក់ព័ន្ធនឹងការចោទប្រកាន់រឿងពុករលួយ-ស៊ីសំណូកកាលពីអំឡុងពេលលោកកាន់អំណាច។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មាន Reuters នាយប់ថ្ងៃពុធ ទី១៧ ខែមេសា ឆ្នាំ២០១៩។
ប៉ូលិសប្រទេសប៉េរូបានបញ្ជាក់ថា លោក Garcia អាយុ ៦៩ឆ្នាំ បានព្យាយាមបាញ់សម្លាប់ ខ្លួននៅចំពោះមុខសមត្ថកិច្ចហើយក្រោយផ្ទុះករណីនេះរួចលោកត្រូវបានគេបញ្ជូនទៅកាន់ មន្ទីរពេទ្យ Casimiro យ៉ាងទាន់ហន់ដើម្បីទទួលការវះកាត់ និងសង្គ្រោះបន្ទាន់ប៉ុន្តែនៅតែមិនអាចទាន់ពេល។ កាលពីអំឡុងពេលលោក Garcia កំពុងស្ថិតនៅក្នុងបន្ទប់ សង្គ្រោះបន្ទាន់មន្ត្រីសុំមិនបញ្ចេញឈ្មោះម្នាក់បានប្រាប់ភ្នាក់ងារទូរទស្សន៍អាមេរិកប្រចាំនៅប៉េរូថា ពេលនេះលោក Garcia កំពុងស្ថិតនៅក្នុងការសង្គ្រោះបន្ទាន់នៅមន្ទីរពេទ្យហើយកូនប្រុសរបស់លោក និងប្រជាជន ប៉េរូ ដែលគាំទ្ររូបលោកយ៉ាងច្រើនកុះករ កំពុងឈរនៅខាងក្រៅមន្ទីរពេទ្យដើម្បីផ្តល់កម្លាំងចិត្ត។
គួរបញ្ជាក់ថា ហេតុការណ៍ខាងលើនេះបានកើតមានឡើង កាលពីព្រឹកថ្ងៃពុធនេះតែម្តង (ពេលវេលានៅអាមេរិកឡាទីន)។ លោក Garcia គឺជាអតីតមេដឹកនាំល្បីឈ្មោះមួយរូបរបស់ប៉េរូ ដែលបានកាន់អំណាចពីឆ្នាំ១៩៨៥ ដល់ឆ្នាំ១៩៩០ ហើយនិងបានឈ្នះឆ្នោតមួយអាណត្តិទៀតរយៈពេល ០៥ឆ្នាំកាលពីឆ្នាំ២០០៦។
រហូតមកដល់ឆ្នាំ២០១៨ លោក Garcia បានទទួលរងការចោទប្រកាន់ពីបទប្រព្រឹត្ត អំពើពុករលួយ និងការស៊ីសំណូកអំឡុងពេលលោកកាន់អំណាច ដែលជាហេតុបានធ្វើឲ្យលោកព្យាយាម សុំសិទ្ធិជ្រកកោននយោបាយនៅអ៊ុយរ៉ាហ្គា ប៉ុន្តែអាជ្ញាធរប៉េរូបានចេញបម្រាមមិនឲ្យលោក ចាកចេញពីប្រទេសនោះឡើយ ដោយសារលោកកំពុងស្ថិតនៅក្នុងការចោទប្រកាន់ ហើយអាជ្ញាធរអ៊ុយរ៉ាហ្គាយធ្វេីវិញនោះ ក៏បានបដិសេធសំណើរបស់លោកថែមទៀត៕
សេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net